

D2174

@##། །རྒྱ་གར་སྐད་དུ། མ་ཧཱ་ཡཀྵ་སེ་ནཱ་པ་ཏ་ཡེ་ནཱི་ལཱམྦ་ར་དྷ་ར་བཛྲ་པཱ་ཎི་མ་ཧཱ་ག་ན་བི་དྷིཿ། བོད་སྐད་དུ། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་གྱི་སྦྱོར་ཀ་ཆེན་པོའི་ཆོ་ག་། བཅོམ་ལྡན་འདས་ཕྱག་ན་རྡོ་རྗེ་གོས་སྔོན་པོ་ཅན་ལ་ཕྱག་འཚལ་ལོ། །དུས་གསུམ་བདེ་གཤེགས་ཐམས་ཅད་ཀྱིས། །རིག་སྔགས་གསང་སྔགས་བདག་པོ་རུ། །དབང་བསྐུར་འབྱུང་པོ་ཚར་གཅོད་པ། །གསང་སྔགས སྡུད་མཛད་ཁྱོད་ཕྱག་འཚལ།།བཅོམ་ལྡན་ཕྱག་ན་རྡོ་རྗེ་ཡི། །རྒྱུད་རྣམས་མ་ལུས་ཀུན་དང་ནི། །རྣལ་འབྱོར་ཕ་རྒྱུད་མ་རྒྱུད་ཀྱི། །རྣལ་འབྱོར་ཆེན་པོའི་རྒྱུད་དང་ནི། །རྣལ་འབྱོར་རྒྱུད་དང་སྤྱོད་པའི་རྒྱུད། །རྒྱུད་རྣམས་ ཀུན་དང་མི་འགལ་ཕྱིར།།མན་ངག་ཅུང་ཟད་དྲན་པ་འདི། །བློ་དམན་བསྒྲུབ་པའི་དོན་དུ་ནི། །རྣལ་འབྱོར་ཆ་རྐྱེན་བསྟན་པར་བྱ། །སྦྱོར་བའི་རིམ་པ་དཔག་མེད་ཀྱང་། །སྒྲུབ་པ་པོ་ཡི་དོན་སླད་དུ། །དགོས་ པ་བསྡུས་པ་བསྟན་པ་འདི།།སྒྲུབ་པོ་སློབ་དཔོན་དང་བྲལ་ན། །སྦྱོར་བ་འདི་རྣམས་བསྟན་པར་གསུངས། །དེ་ལ་སྦྱོར་བ་རིམ་བཞིན་བསྟན། །དང་པོ་ཚོགས་གཉིས་རྫོགས་བྱའི་ཕྱིར། །བདག་ཉིད་སྐད་ ཅིག་ལྷར་སྤྲུལ་ལ།།སྙིང་གར་ཟླ་བའི་མཎྜལ་བསམ། །ཧཱུཾ་གི་འོད་ཟེར་འཕྲོས་པ་ལས། །སྒྲིབ་པ་སྦྱངས་ནས་ཕྱི་ནང་གསལ། །མདུན་དུ་ཟླ་བའི་གཟུགས་བརྙན་དང་། །པདྨའི་གཟུགས་བརྙན་གསུམ་མམ་ གཅིག་།ལ་ལ་གཞལ་ཡས་སྤྲུལ་པར་འདོད། །དེ་རུ་དཀྱིལ་འཁོར་བསམ་པ་དང་། །བསོད་ནམས་དོན་ཕྱིར་སྤྱན་དྲངས་བསྟིམ། །བླ་མ་སྦྱང་སོགས་བྱས་ནས་ཀྱང་། །གཞན་སོགས་མན་ངག་བཞིན་དུ་བྱ། །ཕྱག་འཚལ་ཕྱི ནང་གསང་བས་མཆོད།།མཚམས་མེད་མི་དགེ་སྡོམ་ཉམས་ནས། །རྩ་བའི་དམ་ཚིག་ཉམས་པ་ཀུན། །སྒྱུ་མའི་སེམས་ཀྱིས་བཤགས་པར་བྱ། །དགེ་བ་ཀུན་ལ་རྗེས་ཡི་རང་། །ཆོས་ཀྱི་འཁོར་ལོ་བསྐོར་བར་བསྐུལ། ། མྱ་ངན་མི་འདའ་གསོལ་བ་འདེབས། །རྡོ་རྗེ་ཅན་ལ་སྐྱབས་སུ་མཆི། །རྡོ་རྗེ་རྣམས་ལ་ལུས་འབུལ་ལོ། །བསོད་ནམས་ཅི་བསགས་ཐམས་ཅད་ཀུན། །བྱང་ཆུབ་ཆེན་པོར་བསྔོ་བར་བྱ། །ཚད་མེད་བཞི་ཡང་བསྒོམ་པར་བྱ། །དེ་ནས ཕྱི་ནང་སྣོད་བཅུད་ཀུན།།སྟོང་པ་ཉིད་དུ་བསྒོམ་པར་བྱ། །དེ་ནས་ནམ་མཁའི་ཆོས་འབྱུང་ལ། །ཡི་གེ་ཆོ་འཕྲུལ་འཕྲོས་པ་ལས། །འབྱུང་བའི་དཀྱིལ་འཁོར་རིམ་བཞིན་བསྐྱེད། །དེ་ཡི་སྟེང་དུ་རི་རབ་བསྐྱེད། །དེ་སྟེང་རྡོ་རྗེ་ རྒྱ་གྲམ་ལ།།འཁོར་ལོ་རྩིབས་བཅུ་འབར་བས་མཚན། །ཟླ་བའི་སྟེང་དུ་གནོད་མཛེས་སྤྲུལ། །ཡི་གེ་ཧཱུཾ་གི་འཕྲོ་འདུ་ལས། །ཁྲོ་བོ་བཅུ་སྤྲུལ་ཧཱུཾ་བཞི་ཡི། །གསང་སྔགས་བཟླས་ནས་བཀའ་བསྒོ་བྱ། །ཁྲོ་བོ་སྤྲུལ་པས་བགེགས་རྣམས་བཀུག་།ཡང་སྒོ་སྐུ་གསུང་ཐུགས་ཀྱི་ནི། །ཕུར་བུའི་ སྔགས་བརྗོད་ཐོ་བས་བརྡུང་།།བསྲེགས་ནས་ནམ་མཁའ་ཉིད་དུ་འགྱུར། །དེ་ནས་ཧཱུཾ་གི་འཕྲོ་འདུ་ཡིས། །རྡོ་རྗེ་གུར་དང་ར་བར་འགྱུར། །ཡི་གེ་བྷྲཱུཾ་གྱི་འཕྲོ་འདུ་ལས། །གནོད་མཛེས་འོད་དུ་ཞུ་ནས་ཀྱང་། །གཞལ་ཡས་ཁང་ནི་མཛེས་པར་གྱུར། །དེ་སྟེང་པདྨ་འདབ་བརྒྱད་གདན། །རང་ གི་སེམས་ཀྱི་ཆོ་འཕྲུལ་ལས།།ཟླ་བའི་དཀྱིལ་འཁོར་ཆེན་པོ་ལ། །ཡི་གེ་ཨཱ་ལིས་མཚན་པར་བྱ། །ཉི་མའི་དཀྱིལ་འཁོར་ཆེན་པོ་ལ། །ཡི་གེ་ཀཱ་ལིས་མཚན་པར་བྱ། །ཧཱུཾ་ལས་རྡོ་རྗེ་དེ་ཉིད་མཚན། །བྱིན་རླབས་བསྡུས་ནས་འོད་དུ་ཞུ། །དེ་ལས་སྐུ་ནི་བསྐྱེད་པར་བྱ། །པདྨ་དབུས་ཀྱི་ལྟེ་བ་ ལ།།བཅོམ་ལྡན་རྡོ་རྗེ་གོས་སྔོན་ཅན། །ཤར་གྱི་པདྨའི་འདབ་མ་ལ། །ཁྲོ་བོ་རྣམ་པར་རྒྱལ་བ་བསྐྱེད། །ལྷོ་ཡི་པདྨའི་འདབ་མ་ལ། །བཅོམ་ལྡན་མགོན་པོ་ནག་པོ་བསྐྱེད། །ནུབ་ཀྱི་པདྨའི་འདབ་མ་ལ། །ལུས་ངན་རྒྱལ་པོ་བསྐྱེད་པར་བྱ། །བྱང་གི་པདྨའི་འདབ་མ་ལ། །བདུད་རྩི་འཁྱིལ་པ་ བསྐྱེད་པར་བྱ།།བྱང་ཤར་དུ་ནི་གནོད་སྦྱིན་བསྐྱེད། །ཤར་ལྷོ་རུ་ནི་རོ་ལངས་མ། །ལྷོ་ནུབ་རྡོ་རྗེ་མཁའ་འགྲོ་མ། །ནུབ་བྱང་དུ་ནི་འཇིགས་བྱེད་མ། །མཚམས་རྣམས་སུ་ནི་ལྷ་མོ་བཞི། །འོད་སྐྱེད་མ་དང་ཡིད་འཕྲོག་མ། །ཀུན་བཟང་མ་དང་གླུ་སྒྲ་མ། །ཤར་གྱི་སྒོ་རུ་སྲོག་གཅོད་མ། །ལྷོ་ཡི་སྒོ་རུ་ དབུགས་རྔུབ་མ།།ནུབ་ཀྱི་ཕྱོགས་སུ་ཁྲག་འཐུང་མ། །བྱང་གི་ཕྱོགས་སུ་ཤ་ཟ་མ། །དེ་ལྟར་དཀྱིལ་འཁོར་བསྐྱེད་ནས་ཀྱང་། །ཡི་གེ་ཧཱུཾ་གི་འོད་ཟེར་དང་། །སྔགས་དང་ཕྱག་རྒྱའི་ཚིགས་བཅད་སྒྲས། །རང་བཞིན་དཀྱིལ་འཁོར་སྤྱན་དྲངས་ལ། །མཆོད་བསྟོད་བྱས་ནས་དམ་ཚིག་ལ། ། བྱིན་རླབས་བསྟིམས་ཏེ་དབང་བསྐུར་རོ། །དེ་ལྟའི་དཀྱིལ་འཁོར་ཆེན་པོ་ལ། །ཐུན་བཞི་ཐུན་བརྒྱད་པར་དག་ཏུ། །བསྒོམས་ནས་བརྟན་པར་གྱུར་པས་ན། །ལས་རྣམས་གཞན་ནམ་རྫོགས་རིམ་ལ། །གཞུག་པར་བྱ་བ་ཁོ་ན་ཡིན། །འཁོར་ལོ་ཆེན་པོའི་སྦྱོར་ཀ་སྟེ་དང་པོའོ།། །།བཅོམ ལྡན་རྡོ་རྗེ་བསྣམས་ལ་ཕྱག་འཚལ་ལོ།།དཀྱིལ་འཁོར་ཆེན་པོ་མི་ནུས་པས། །ལྷ་རྣམས་སོ་སོ་ཀུན་ལ་ཡང་། །རྒྱན་གཅིག་པ་ལ་སྦྱོར་བ་བསྟན། །དང་པོ་གཙོ་བོའི་སྦྱོར་བ་ནི། །བདག་ཉིད་སྐད་ཅིག་ལྷར་སྤྲུལ་ལ། །ཡི་གེ་ཧཱུཾ་གི་མན་ངག་སོགས། །རིམ་པ་བཞིན་དུ་ཤེས་ པར་བྱ།།ཕྱག་འཚལ་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་བ་དང་། །གསོལ་བ་གདབ་ཅིང་སྐྱབས་སུ་གསོལ། །ལུས་འབུལ་དགེ་རྩ་བསྔོ་བར་བྱ། །ཚད་མེད་བཞི་བསྒོམ་སྟོང་ཉིད་བསྒོམ། །སྟོང་པའི་ངང་ལས་ཡི་གེ་ཧཱུཾ། །དེ་ལས་ཕྱག་མཚན་རྡོ་རྗེར་གྱུར། །དེ་ཉིད་ལས་ ནི་སྐུ་བསྐྱེད་དོ།།སྐུ་མདོག་སྔོན་པོ་ཞལ་གཅིག་པ། །མཆེ་བ་གཙིགས་མཛད་སྤྱན་མིག་བཟློག་།ཕྱག་གཡས་རྡོ་རྗེ་བསྣམས་མཛད་ནས། །ཕྱག་གཡོན་ནམ་མཁའ་ལྡིང་ནི་བསྣམས། །གཡོན་བརྐྱང་གཡས་བསྐུམ་ཀླུ་ལ་ཤིས། །གཡས་པ་རྡོ་རྗེ་བསྣམས་མཛད་ནས། །གཡོན་པ་རྩེ་ གསུམ་བསྣམས་པ་ནི།།གཤིན་རྗེ་དག་ལ་ཤིས་པར་བསྟན། །གཡས་པ་རྡོ་རྗེ་གསོར་ནས་ནི། །གཡོན་པ་དྲིལ་བུ་བསྒྲགས་པ་ནི། །གནོད་སྦྱིན་དྲག་ལ་ཤིས་པར་བསྟན། །ཡེ་ཤེས་དཀྱིལ་འཁོར་སྤྱན་དྲངས་བསྟིམས། །བྱིན་རླབས་དབང་བསྐུར་བྱས་ནས་ཀྱང་། །ཐུན་མཚམས་བཞིར་ ནི་བརྟན་པར་བསྒོམ།།གཙོ་བོའི་སྦྱོར་ཀ་སྟེ་གཉིས་པའོ།། །།བཅོམ་ལྡན་འདས་རྣམ་པར་རྒྱལ་བ་ལ་ཕྱག་འཚལ་ལོ། །སྐད་ཅིག་ལྷར་སྤྲུལ་ཐུགས་ཀ་རུ། །ཉི་མའི་སྟེང་དུ་ཧཱུཾ་སོགས་རྫོགས། །ཕྱག་འཚལ་མཆོད་ཅིང་བཤགས་པར་བྱ། །རྗེས་སུ་ཡི་རང་ལ་སོགས་བྱ། །སྟོང་པ་ཉིད་དུ་ བསྒོམས་ནས་ཀྱང་།།སྟོང་པའི་ངང་ལས་ཆོ་འཕྲུལ་དུ། །རྡོ་རྗེ་པདྨའི་ཉི་ཟླའི་སྟེང་། །དེ་སྟེང་ཧཱུཾ་ལས་རྡོ་རྗེར་གྱུར། །རྡོ་རྗེ་ལས་ནི་སྐུ་བསྐྱེད་དོ། །ཁྲོ་ཆེན་ཁམས་གསུམ་རྣམ་རྒྱལ་ནི། །སྐུ་མདོག་དམར་པོ་དབུ་གསུམ་པ། །ཕྱག་དྲུག་དང་པོ་རྡོ་རྗེའོ། །གཡོན་གྱི་དང་པོ་དགྲ་སྟའོ། །བར་མ་ གཉིས་ཀྱིས་འཆིང་བྱེད་པ།།གུང་མོ་མཐེ་བོང་ངོས་བཏུད་ནས། །གཞན་རྣམས་ཡོངས་སུ་བརྐྱང་བ་ཡིན། །དེ་ཉིད་སྙིང་གར་བཟུང་ནས་ནི། །དེ་འོག་གཡས་པས་ཞགས་པ་བསྣམས། །གཡོན་པ་རལ་གྲི་བསྣམས་པའོ། །ཡེ་ཤེས་སྤྱན་དྲངས་བསྟིམས་ནས་ཀྱང་། །བྱིན་རླབས་ དབང་བསྐུར་བྱས་ནས་ནི།།ཐུན་མཚམས་བཞི་རུ་བརྟན་པར་བསྒོམས། །སྙིང་གའི་མན་ངག་གསལ་ནས་ཀྱང་། །ལྕེ་ནི་རྡོ་རྗེར་བྱིན་གྱིས་བརླབས། །བཟླས་བརྗོད་འཕྲོས་འདུས་བསྙེན་པ་བྱ། །དུས་གྲངས་མཚན་མ་ཐིམ་པ་དང་། །བསྒྲུབ་པ་གང་འདོད་བརྩམ་པར་བྱའོ། །རྣམ་པར་རྒྱལ་ བའི་སྦྱོར་ཀ་སྟེ་གསུམ་པའོ།། །།བཅོམ་ལྡན་འདས་དཔལ་མགོན་པོ་ནག་པོ་ལ་ཕྱག་འཚལ་ལོ། །སྐད་ཅིག་ལྷ་རུ་སྤྲུལ་ནས་ཀྱང་། །ཧཱུཾ་གི་མན་ངག་རྫོགས་པ་ཡིས། །ཕྱག་འཚལ་མཆོད་པ་ལ་སོགས་བྱ། །སྟོང་པ་ཉིད་ཀྱི་ངང་ཉིད་ལས། །རིན་ཆེན་གདན་སོགས་རྫོགས་བྱས་ལ། ། ཡི་གེ་ཧཱུཾ་ལས་བེ་ཅོན་གྱུར། །དེ་ཉིད་ལས་ནི་སྐུ་རྫོགས་གྱུར། །དཔལ་ལྡན་མགོན་པོ་ནག་པོ་ནི། །སྐུ་མདོག་ནག་པོ་དུད་སྤྲིན་འདྲ། །ཞལ་གཅིག་པ་ལ་ཕྱག་གཉིས་པ། །གཡས་པ་ཙནྡན་བིང་ཆེན་བསྣམས། །གཡོན་པ་ཞགས་པ་བསྣམས་པའོ། །ཞབས་ནི་བརྐྱང་བསྐུམ ཚུལ་དུ་བཞུགས།།ཡེ་ཤེས་མགོན་པོ་སྤྱན་དྲངས་བསྟིམ། །བྱིན་རླབས་དབང་བསྐུར་ལ་སོགས་བྱ། །དེ་ལྟར་བསྟན་ནས་བཟླས་བརྗོད་བྱ། །མགོན་པོ་མདུན་དུ་སྤྱན་དྲངས་ནས། །བཟླས་བརྗོད་ལ་སོགས་རྫོགས་བྱས་ལ། །དེ་ནས་སྒྲུབ་པ་བརྩམ་པར་བྱ། །མགོན་པོ་ལས་ཀྱི་ སྦྱོར་ཀ་སྟེ་བཞི་པའོ།། །།ལུས་ངན་གསུང་མཆོག་སྤྲུལ་ལ་ཕྱག་འཚལ་ལོ། །སྐད་ཅིག་ལྷར་སྤྲུལ་ཧཱུཾ་གིས་ནི། །སྤྱན་དྲངས་ལ་སོགས་རྫོགས་བྱས་ལ། །ཕྱག་འཚལ་མཆོད་པ་ལ་སོགས་བྱ། །སྟོང་པའི་ངང་ལས་པད་སོགས་གདན། །ཡི་གེ་ཧཱུཾ་ལས་མཆོད་རྟེན་གྱུར། །དེ་ཉིད་ལས་ནི་སྐུ བསྐྱེད་དོ།།ལུས་ངན་སྐུ་མདོག་ལྗང་གུའོ། །ཞལ་གཅིག་ཕྱག་གཡས་མཆོད་རྟེན་བསྣམས། །གཡོན་པ་ལེའུ་ལེ་བསྣམས་པའོ། །ཡེ་ཤེས་སྤྱན་དྲངས་བསྟིམས་ནས་ནི། །བྱིན་གྱིས་བརླབ་ཅིང་དབང་བསྐུར་རོ། །བཟླས་བརྗོད་བསྙེན་པ་རྫོགས་ནས་ནི། །དེ་ནས་སྒྲུབ་པ་བརྩམ་པར་བྱའོ། ། ལུས་ངན་པོའི་སྦྱོར་ཀ་སྟེ་ལྔ་པའོ།། །།ཁྲོ་ཆེན་བདུད་རྩི་འཁྱིལ་ལ་ཕྱག་འཚལ་ལོ། །སྐད་ཅིག་ལྷར་སྤྲུལ་ཧཱུཾ་གིས་ནི། །སྦྱོར་བ་ལ་སོགས་རྫོགས་པར་བྱ། །དེ་ནས་ཕྱག་འཚལ་མཆོད་སོགས་བྱ། །སྟོང་པའི་ངང་ལས་རྡོ་རྗེའི་གདན། །དེ་སྟེང་ཧཱུཾ་ལས་རྡོ་རྗེའོ། །དེ་ཉིད་ལས་ནི་སྐུ རྫོགས་གྱུར།།ཁྲོ་ཆེན་བདུད་རྩི་འཁྱིལ་པ་སྐུ་སྔོན་པོ། །ཞལ་གཅིག་ཕྱག་གཉིས་བྲང་དུ་བསྣོལ། །ཞབས་གཉིས་བརྐྱང་བསྐུམ་ཚུལ་དུ་བཞུགས། །ཡེ་ཤེས་དཀྱིལ་འཁོར་སྤྱན་དྲངས་བསྟིམ། །བྱིན་གྱིས་བརླབ་ཅིང་དབང་བསྐུར་རོ། །བསྙེན་པ་ལ་སོགས་ རྫོགས་ནས་ནི།།དེ་ནས་བསྒྲུབ་པ་བརྩམ་པར་བྱའོ། །བདུད་རྩི་འཁྱིལ་པའི་སྦྱོར་ཀ་སྟེ་དྲུག་པའོ།། །།མཁའ་འགྲོ་མ་རྣམས་ལ་ཕྱག་འཚལ་ལོ། །གནོད་སྦྱིན་མཁའ་འགྲོ་ལ་སོགས་ཀྱང་། །སྤྲུལ་པ་དང་ནི་རང་རྒྱུད་ཀྱི། །མན་ངག་རྣམས་ནི་ཤེས་པར་བྱ། །མདུན་དུ་སྤྲུལ་དང་ བསྐྱེད་པ་ནི།།གཙོ་བོའི་དབང་དུ་བྱ་བ་དང་། །སོ་སོ་རང་རང་དབང་དུའོ། །དེ་རྣམས་ཆོ་ག་ལ་སོགས་ཀྱང་། །མན་ངག་བཞིན་དུ་ཤེས་པར་བྱའོ། །གནོད་སྦྱིན་ཁ་དོག་དམར་ནག་ལ། །ཞལ་གཅིག་པ་ལ་ཕྱག་གཉིས་པ། །གཡས་གཡོན་གྲི་གུག་ཅང་ཏེའུ་བསྣམས། །རོ་ལངས་མ་ནི་སྔོ་སྐྱ་ སྟེ།།ཞལ་གཅིག་པ་ལ་ཕྱག་གཉིས་པ། །རྡོ་རྗེ་ལྕགས་སྒྲོག་བཟུང་ནས་ནི། །གུང་མོ་སྲིན་ལག་ལ་སོགས་གསུམ་པོ་རྣམས། །དམ་པོར་བཀུག་པས་ཡོངས་སུ་བསྡམས། །མཐེབ་མཛུབ་བཞི་རྣམས་རབ་བརྐྱང་སྟེ། །སྤྱི་བོར་ངེས་པར་བསྣོལ་ནས་བསྡམས། །རྡོ་རྗེ་མཁའ་འགྲོ་ མདོག་སེར་སྐྱ།།ཕྱག་གཉིས་སྤྱི་བོར་སྦྱར་ནས་སུ། །མེ་ལྕེའི་ཕྲེང་བ་ཡོངས་སུ་འཛིན། །འཇིགས་བྱེད་མདོག་ནི་སྔོ་ནག་ལ། །ཞལ་གསུམ་ཕྱག་དྲུག་ཞབས་གཉིས་པ། །གཡས་ཀྱི་དང་པོ་གླང་པོ་བསྣམས། །གཡོན་པ་གླང་པོའི་པགས་པ་བསྣམས། །དེ་འོག་གཡས་པ་རྡོ་ རྗེ་བསྣམས།།གཡོན་པ་དགྲ་སྟ་བསྣམས་པའོ། །དེ་འོག་གཡས་པ་ལྕགས་ཀྱུ་བསྣམས། །གཡོན་པ་མི་མགོ་རློན་པ་བསྣམས། །གནོད་སྦྱིན་མཁའ་འགྲོ་དེ་རྣམས་ཀྱང་། །གཙོ་བོ་གོས་སྔོན་ལ་བསྐོར་ལྷན་ནེའི་ཚུལ། །དཀྱིལ་འཁོར་ཚུལ་གྱིས་བསྒོམ་ཐབས་དང་། །ཡང་ན་སོ་སོ་ རེ་རེ་དང་།།རྗེ་ཁོལ་ཚུལ་དུ་གནས་ནས་ཀྱང་། །ལས་རྣམས་ཀུན་ལ་མངགས་པ་དང་། །ཡང་ན་སྦྱོར་ཐབས་ཚུལ་གནས་ནས། །གསང་མཆོད་འབུལ་ཞིང་ཕྱག་རྒྱ་བསྒྲུབ། །གནོད་སྦྱིན་མཁའ་འགྲོ་མའི་སྦྱོར་ཀ་སྟེང་བདུན་པའོ།། །།རྡོ་རྗེ་ལྷ་མོ་རྣམས་ལ་ཕྱག་འཚལ་ལོ། ། ལྷ་མོ་འདི་རྣམས་ཆོ་ག་ཡང་། །མཁའ་འགྲོ་བཞིན་དུ་འདིར་ཤེས་བྱ། །འོད་སྐྱེད་མ་ཞལ་གཅིག་ཕྱག་གཉིས་སྐུ་མདོག་དཀར་མོའོ། །ཕྱག་གཉིས་མེ་ཏོག་བསྣམས་པའོ། །ཡིད་འཕྲོག་མ་ཞལ་གཅིག་ཕྱག་གཉིས་པ། །སྐུ་མདོག་སེར་མོ་མཛེས་པའི་ཚུལ། །ཕྱག་གཉིས་དྲི ཡི་སྤོས་ཕོར་བསྣམས།།ཀུན་བཟང་མ་ཞལ་གཅིག་ཕྱག་གཉིས་པ། །སྐུ་མདོག་དམར་མོ་མཛེས་པའི་ཚུལ། །ཕྱག་གཉིས་ཞལ་ཟས་རོ་བརྒྱ་ལྡན་པ་བསྣམས། །གླུ་སྒྲ་ཅན་ནི་ཞལ་གཅིག་ཕྱག་གཉིས་པ། །སྐུ་མདོག་སྔོན་མོ་མཛེས་པའི་ཚུལ། །ཕྱག་གཉིས་སྒྲ་སྙན་གར་གྱིས་ རོལ།།ལྷ་མོ་འདི་རྣམས་ཀུན་ལ་ཡང་། །དཀྱིལ་འཁོར་ལས་དང་མཆོད་པའི་ཚུལ། །གསུམ་པའི་མན་ངག་ཤེས་མོད་ཀྱང་། །ཁྱད་པར་མཆོད་པའི་ཚུལ་དུ་བསྟན། །མཆོད་པའི་ལྷ་མོའི་སྦྱོར་ཀ་སྟེ་བརྒྱད་པའོ།། །།སྒོ་མ་བཞི་ལ་ཕྱག་འཚལ་ལོ། །སྒོ་མའི་ཆོ་ག་ལ་སོགས་ཀྱང་། ། གོང་གི་ཆོ་ག་སྦྱོར་ཤེས་བྱའོ། །སྲོག་གཅོད་ཞལ་གཅིག་ཕྱག་གཉིས་པ། །སྐུ་མདོག་མཐིང་ག་འཇིགས་པའི་ཚུལ། །ཕྱག་གཉིས་ཐོ་བ་ཞགས་པ་བསྣམས། །དབུགས་རྔུབ་མ་ཞལ་གཅིག་ཕྱག་གཉིས་པ། །སྐུ་མདོག་སེར་མོ་འཇིགས་པའི་ཚུལ། །ཕྱག་གཉིས་ཧོམ་གཟར ཞགས་པ་བསྣམས།།ཁྲག་འཐུང་མ་ཞལ་གཅིག་ཕྱག་གཉིས་པ། །སྐུ་མདོག་དམར་མོ་འཇིགས་པའི་གཟུགས། །ཕྱག་གཉིས་གྲི་གུག་ཞགས་པ་བསྣམས། །ཤ་ཟ་མ་ཞལ་གཅིག་ཕྱག་གཉིས་པ། །སྐུ་མདོག་སྔོན་པོ་འཇིགས་པའི་ཚུལ། །ཕྱག་གཉིས་རྣོན་པོ་ཞགས་པ་བསྣམས། ། ཁྲོ་མོ་འདི་རྣམས་སྤྱད་ཚུལ་ཡང་། །དཀྱིལ་འཁོར་ལས་སྦྱོར་བའི་ཚུལ། །ཁྱད་པར་གསད་པའི་ལས་ལ་ཤིས། །སྒོ་མ་བཞིའི་སྦྱོར་ཀ་སྟེ་དགུ་པའོ།། །།བཅོམ་ལྡན་འདས་རྡོ་རྗེ་བསྣམས་པ་ལ་ཕྱག་འཚལ་ལོ། །རྣལ་འབྱོར་བློ་རྣམས་རིམ་པ་ཡིས། །བསྡུས་རྒྱས་རིམ་པ་བསྟན པར་བྱ།།པདྨ་འདབ་བརྒྱད་དཀྱིལ་འཁོར་ལ། །དབུས་དང་འདབ་བརྒྱད་ལྷ་དགུའོ། །ཕྱི་རིམ་ཀེང་རུས་འབར་བས་བསྐོར། །གྲུ་ཆད་བཞི་ལ་ལྷ་མོ་བཞི་པོ་གནས། །སྒོ་རྣམས་བཞི་ལ་སྒོ་མ་བཞི། །འདི་ནི་རྣལ་འབྱོར་རྒྱས་པའི་ཚད། །རྣལ་འབྱོར་བསྡུས་ལ་མོས་པ་ཡིས། ། ལྷ་ནི་བཅུ་གསུམ་བསྒོམ་པར་བྱ། །དེ་ལས་ཀྱང་ནི་བསྡུས་འདོད་ན། །ལྷ་ནི་དགུ་པོ་བསྒོམ་པར་བྱ། །དེ་ལས་ཀྱང་ནི་བསྡུས་འདོད་ན། །ལྔ་དང་གསུམ་དང་གཉིས་དང་གཅིག་།མན་ངག་ཆོ་ག་མཐོང་བས་བྱ། །མ་མཐོང་བས་ནི་དམ་ཚིག་ཉམས། །དེ་དག་ཐམས ཅད་ཀུན་ལ་ཡང་།།ཚོགས་བསག་ལྷ་བསྐྱེད་མཁས་པས་བྱ། །བསྡུས་རྒྱས་ཀྱི་སྦྱོར་ཀ་སྟེ་བཅུ་པའོ།། །།བཅོམ་ལྡན་འདས་རྡོ་རྗེ་བསྣམས་པ་ལ་ཕྱག་འཚལ་ལོ། །ལྷ་རྣམས་མཆོད་པའི་རིམ་པ་ནི། །ཤ་ཆེན་པོ་ལས་བྱུང་བ་ཡི། །དྲི་མཆོག་དུད་པ་རྒྱུན་མི་གཅད། །བདེ་གཤེགས་ ཤངས་ལ་ཕུལ་གྱུར་པ།།སྐུ་གསུང་ཐུགས་མཆོག་མཉེས་གྱུར་ཅིག་།ཤ་ཆེན་བདུག་སྤོས་དབུལ་བའོ། །བྷ་ག་རང་བྱུང་མེ་ཏོག་འདི། །ཡིད་འོང་ནམ་མཁའ་ཁྱབ་ཙམ་དུ། །བདེ་གཤེགས་དབུ་ལ་ཕུལ་བ་ཡིས། །སྐུ་གསུང་ཐུགས་མཆོག་མཉེས་གྱུར་ཅིག་།རཀྟའི་མེ་ཏོག་ དབུལ་བའོ།།ཚིལ་ཆེན་དུར་ཁྲོད་རས་ལས་ནི། །མ་རིག་མུན་སེལ་སྒྲོན་མ་བྱུང་། །བདེ་གཤེགས་སྤྱན་ལ་ཕུལ་གྱུར་པས། །སྐུ་གསུང་ཐུགས་མཆོག་མཉེས་གྱུར་ཅིག་།ཚིལ་ཆེན་མར་མེ་དབུལ་བའོ། །མཚན་དང་ལྡན་པའི་ཀ་པཱ་ལར། །རྡོ་རྗེ་དྲི་ཆུས་བཀང་ནས་སུ། །བདེ་ གཤེགས་ཐུགས་ལ་ཕུལ་གྱུར་པས།།སྐུ་གསུང་ཐུགས་མཆོག་མཉེས་གྱུར་ཅིག་།རྡོ་རྗེ་ཆུ་ཡིས་མཆོད་པའོ། །མཚན་དང་ལྡན་པའི་ཀ་པཱ་ལར། །རྡོ་རྗེ་དྲི་ཆེན་གཏམས་ནས་སུ། །བདེ་གཤེགས་ལྗགས་ལ་ཕུལ་གྱུར་པས། །སྐུ་གསུང་ཐུགས་མཆོག་མཉེས་གྱུར་ཅིག་།དྲི་ཆེན་ལྷ་ བཤོས་མཆོད་པའོ།།སིལ་སྙན་རོལ་མོ་དཔག་མེད་རྣམས། །ཡིད་འོང་མཛེས་པར་སྤྲུལ་ནས་སུ། །བདེ་གཤེགས་སྙན་ལ་ཕུལ་གྱུར་བས། །སྐུ་གསུང་ཐུགས་མཆོག་མཉེས་གྱུར་ཅིག་།སྒྲ་དང་རོལ་མོས་མཆོད་པའོ། །རྡོ་རྗེ་ལྷ་མོ་འོད་སྐྱེད་མ། །རྡོ་རྗེ་མེ་ཏོག་བསྣམས་ནས་ ནི།།མཛེས་པའི་ཚུལ་གྱིས་མཆོད་ཕུལ་ན། །མཆོད་པ་དམ་པའི་ཚུལ་གྱིས་བཞེས། །རྡོ་རྗེ་ལྷ་མོ་ཡིད་འཕྲོག་མ། །དྲི་ཡི་དུང་ཕོར་བསྣམས་ནས་སུ། །གསེར་འོད་བཞད་པའི་ཚུལ་གྱིས་སུ། །མཆོད་པ་དམ་པ་འབུལ་གྱིས་བཞེས། །རྡོ་རྗེ་ལྷ་མོ་ཀུན་བཟང་མ། །ཞལ་ཟས་རོ་མཆོག་ བསྣམས་ནས་སུ།།དམར་མོ་བཞད་པའི་ཚུལ་གྱིས་ནི། །མཆོད་པ་དམ་པ་འབུལ་ལོ་བཞེས། །རྡོ་རྗེ་ལྷ་མོ་གླུ་སྒྲ་ཅན། །སྒྲ་སྙན་གར་གྱི་རོལ་མོ་ཡིས། །འོད་སྔོན་འཕྲོས་པའི་བཞད་ཚུལ་གྱིས། །མཆོད་པ་དམ་པ་འབུལ་ལོ་བཞེས། །སྒེག་མོ་ལ་སོགས་བརྒྱད་རྣམས་ཀྱང་། ། རྒྱུད་རྣམས་གཞན་དང་མཐུན་པས་ན། །དེ་བཞིན་འདིར་ཡང་དབུལ་བར་བྱ། །རྡོ་རྗེ་གླུ་རྣམས་མཛེས་པ་ཡིས། །བསྟུན་ནས་ལྷ་ལ་མཆོད་པ་འབུལ། །མཆོད་པའི་སྦྱོར་ཀ་སྟེ་བཅུ་གཅིག་པའོ།། །།བཅོམ་ལྡན་འདས་རྡོ་རྗེ་ཅན་ལ་ཕྱག་འཚལ་ལོ། །ལྷ་རྣམས་བསྟོད་པའི་རིམ པ་ནི།།བཅོམ་ལྡན་རྡོ་རྗེ་གོས་སྔོན་ཅན། །སྐུ་མདོག་སྔོན་པོ་འཇིགས་པའི་ཚུལ། །རྡོ་རྗེ་སྟོབས་ཀྱིས་འབྱུང་པོ་འདུལ། །རྡོ་རྗེ་བསྣམས་ལ་ཕྱག་འཚལ་བསྟོད། །རྣམ་རྒྱལ་རྡོ་རྗེ་ཁྲོ་བོ་ནི། །དབུ་གསུམ་ཕྱག་དྲུག་འཇིགས་པའི་གཟུགས། །སྐུ་མདོག་འོད་དམར་བགེགས་རྣམས་ བསྲེག་།བདུད་ལས་རྒྱལ་ལ་ཕྱག་འཚལ་བསྟོད། །དཔལ་ལྡན་མགོན་པོ་ནག་པོ་ནི། །ནག་པོའི་ཞགས་པ་འཛིན་མཛད་ཅིང་། །ཙནྡན་བིང་གིས་ཐམས་ཅད་འཇོམས། །མཐུ་ཆེན་ཁྱོད་ལ་ཕྱག་འཚལ་བསྟོད། །ལུས་ངན་པོ་ནི་རྒྱལ་པོའི་མཆོག་།མཆོད་པའི་རྟེན་གྱིས་དོན་རྣམས འགྲུབ།།ནེའུ་ལེ་རིན་ཆེན་གཏེར་བརྟན་བསྣམས། །དགོས་འདོད་སྐོང་ལ་ཕྱག་འཚལ་བསྟོད། །ཁྲོ་བོ་བདུད་རྩིས་བདུད་རྣམས་འཇོམས། །ཕྱག་རྒྱ་སྡིགས་མཛུབ་མཛད་པ་ཡིས། །སྡང་མིག་མི་འགྱུར་ཞེ་ལ་གནོན། །འོད་སྔོན་པོ་ལ་ཕྱག་འཚལ་བསྟོད། །གནོད་སྦྱིན་ཁྲོ་བོ་ འཇིགས་པའི་གཟུགས།།སྐུ་མདོག་དམར་ནག་འོད་ཟེར་ཅན། །གྲི་གུག་འབར་བས་གཅོད་མཛད་མ། །ཅང་ཏེའུ་སྒྲོགས་ལ་ཕྱག་འཚལ་བསྟོད། །རོ་ལངས་མ་ནི་མཐུ་མོ་ཆེ། །སྔོ་སྐྱ་རྡོ་རྗེ་ལྕགས་སྒྲོག་སྡོམ། །ཕྱག་རྒྱ་སྤྱི་བོར་བསྣོལ་མཛད་མ། །རོ་ལངས་མ་ལ་ཕྱག་འཚལ་བསྟོད། །རྡོ་རྗེ་མཁའ་ འགྲོ་དཔལ་འབར་མ།།དམར་སྐྱ་མེ་ལྕེ་ཕྲེང་བ་འཛིན། །རྡོ་རྗེ་མེས་ནི་ཐམས་ཅད་བསྲེག་།རྡོ་རྗེ་མཁའ་འགྲོ་ཕྱག་འཚལ་བསྟོད། །འཇིགས་བྱེད་མ་ནི་ཐམས་ཅད་འཇོམས། །སྔོ་ནག་ཞལ་གསུམ་ཕྱག་དྲུག་པ། །ཕྱག་མཚན་དྲུག་གིས་འབྱུང་པོ་འདུལ། །འཇིགས་བྱེད་མ་ལ་ཕྱག་ འཚལ་བསྟོད།།རྡོ་རྗེ་ལྷ་མོ་འོད་སྐྱེད་མ། །ཞལ་གཅིག་ཕྱག་གཉིས་སྐུ་མདོག་དཀར། །རྡོ་རྗེ་མེ་ཏོག་ཕྱག་ན་བསྣམས། །འོད་སྐྱེད་མ་ལ་ཕྱག་འཚལ་བསྟོད། །རྡོ་རྗེ་ལྷ་མོ་ཡིད་འཕྲོག་མ། །ཞལ་གཅིག་ཕྱག་གཉིས་སྐུ་མདོག་སེར། །དྲི་མཆོག་དཔག་ མེད་ཕྱག་ན་བསྣམས།།ཡིད་འཕྲོག་མ་ལ་ཕྱག་འཚལ་བསྟོད། །རྡོ་རྗེ་ལྷ་མོ་ཀུན་བཟང་མ། །ཞལ་གཅིག་ཕྱག་གཉིས་སྐུ་མདོག་དམར། །ཞལ་ཟས་རོ་མཆོག་བརྒྱ་ལྡན་བསྣམས། །ཀུན་བཟང་མ་ལ་ཕྱག་འཚལ་བསྟོད། །རྡོ་རྗེ་ལྷ་མོ་གླུ་སྒྲ་ཅན། །ཞལ་གཅིག་ཕྱག་ གཉིས་སྐུ་མདོག་སྔོ།།སྒྲ་སྙན་གར་གྱི་རོལ་པས་གནས། །གླུ་སྒྲ་ཅན་ལ་ཕྱག་འཚལ་བསྟོད། །རྡོ་རྗེ་ཁྲོ་མོ་སྲོག་གཅོད་མ། །ཞལ་གཅིག་ཕྱག་གཉིས་སྐུ་མདོག་གནག་།སྒྲུབ་ལ་གནོད་པའི་སྲོག་གཅོད་མ། །ཐོ་བ་ཞགས་པ་བསྣམས་ལ་ཕྱག་འཚལ་བསྟོད། །ཁྲོ་མོ་ རྡོ་རྗེ་དབུགས་རྔུབ་མ།།ཞལ་གཅིག་ཕྱག་གཉིས་སྐུ་མདོག་སེར། །སྒྲུབ་ལ་གནོད་པའི་དབུགས་རྔུབ་མ། །ཧོམ་གཟར་ཞགས་པ་བསྣམས་ལ་ཕྱག་འཚལ་བསྟོད། །ཁྲོ་མོ་ཆེན་མོ་ཁྲག་འཐུང་མ། །ཞལ་གཅིག་ཕྱག་གཉིས་སྐུ་མདོག་དམར། །སྒྲུབ་ལ་གནོད་པའི་ཁྲག་ འཐུང་མ།།གྲི་གུག་ཞགས་པ་བསྣམས་ལ་ཕྱག་འཚལ་བསྟོད། །ཁྲོ་མོ་ཆེན་མོ་ཤ་ཟ་མ། །ཞལ་གཅིག་ཕྱག་གཉིས་སྐུ་མདོག་སྔོ། །སྒྲུབ་ལ་གནོད་པའི་ཤ་ཟ་མ། །རྣོན་པོ་ཞགས་པ་བསྣམས་ལ་ཕྱག་འཚལ་བསྟོད། །རྡོ་རྗེ་གླུ་ནི་མཛེས་པ་ཡིས། །བསྟོད་པ་རྣམས་ཀྱིས་ལྷ་བསྟོད་པས། ། ཚོགས་ཆེན་དཔག་མེད་སོགས་པར་འགྱུར། །བསྟོད་པའི་སྦྱོར་ཀ་སྟེ་བཅུ་གཉིས་པའོ།། །།བཅོམ་ལྡན་འདས་རྡོ་རྗེ་འཛིན་པ་ལ་ཕྱག་འཚལ་ཏེ། །རྡོར་དྲིལ་བྱིན་བརླབས་མཆོད་པ་བསྟན། །རྡོར་དྲིལ་རབ་གནས་བྱས་པ་དང་། །དང་པོ་སྟོང་དང་སྙིང་རྗེ་ལས། །ཡི་གེ་ཨོཾ་ཧཱུཾ་རྣམ་གཉིས ཕྱུང་།།དེ་ལས་རྡོར་དྲིལ་བསྐྱེད་པར་བྱ། །ཡེ་ཤེས་རྡོར་དྲིལ་བྱིན་བརླབ་བསྟིམ། །ཡང་ན་རབ་གནས་བྱས་པ་ལ། །དང་པོ་བྱིན་བརླབས་གསལ་བས་ཆོག་།ལག་ན་རྡོ་རྗེ་བྱིན་བརླབས་ལ། །ལག་མཐིལ་ཉི་ཟླར་བྱིན་གྱིས་བརླབས། །ལག་གཡོན་མཐེ་བོང་སྲིན་ལག་གིས། ། རྡོ་རྗེ་དྲིལ་བུ་བླང་བར་བྱ། །དྲིལ་བུ་འོག་ལ་རྡོ་རྗེ་སྟེང་། །བརླ་གཡོན་སྟེང་དུ་གཞག་པར་བྱ། །ལག་གཡས་སྲིན་ལག་མཐེ་བོང་གིས། །རྡོ་རྗེ་ར་དབྲག་བཙུགས་ནས་ནི། །བསྐོར་བའི་ཚུལ་གྱིས་ཐུགས་ཀར་བླང་། །རྒྱུ་ཡི་ཡི་གེ་གཉིས་པོ་ཡང་། །རྡོར་དྲིལ་ལ་ནི་མཚན་མར་བསམ། ། ཕྱག་ན་རྡོ་རྗེའི་ཏིང་འཛིན་གྱིས། །འགྱིང་བག་ཚུལ་གྱིས་བསྟན་པར་བྱ། །དང་པོ་གཡོན་དུ་གར་གསུམ་བསྒྱུར། །དེ་ནས་གཡས་སུ་གར་གསུམ་བསྒྱུར། །དེ་ནས་ཐུགས་ཀ་མགྲིན་པ་དང་། །སྤྱི་བོ་དག་ཏུ་གར་གསུམ་བསྒྱུར། །དེ་ནས་སླར་ལ་ཕབ་ནས་ནི། །ལྟེ་བ་ལ་སོགས གནས་བརྒྱད་དུ།།རྡོ་རྗེ་དྲིལ་གཉིས་གསོར་བར་བྱ། །དེ་ནས་དྲིལ་བུ་བབས་གསུམ་དང་། །རྡོ་རྗེ་ལན་གསུམ་གསོར་བར་བྱ། །དེ་ནས་རྡོ་རྗེ་དྲིལ་ཐབས་ནི། །བརྒྱད་ཀྱི་ཚུལ་དུ་མཆོད་པར་བྱ། །དང་པོར་རྡོ་རྗེ་དྲིལ་བུ་གཉིས། །གསོར་ཞིང་ཐུགས་ཀར་བརྟན་པར་གཟུང་། །དེ་ནས་རྡོ་ རྗེ་དྲིལ་བུ་གཉིས།།བསྣོལ་ཞིང་འཁྱུད་ནས་མཆོད་པ་འབུལ། །དེ་ནས་རྡོ་རྗེ་དྲིལ་བུ་གཉིས། །ནུ་མ་གཡས་གཡོན་ཐད་ཀ་རུ། །རྡོ་རྗེ་སྟེང་ལ་དྲིལ་བུ་འོག་།བསྣོལ་ཞིང་འགྱིང་བག་ཕན་ཚུན་བཀྱེར། །དེ་ནས་རྡོ་རྗེ་དྲིལ་བུ་གཉིས། །གར་གྱི་ཚུལ་དུ་བསྐོར་ནས་ཀྱང་། །རྡོར་དྲིལ་ལན་གཉིས་ གསོར་བར་བྱ།།དྲིལ་བུ་ཐུགས་ཀའི་ཐད་ཀར་གསིལ། །རྡོ་རྗེ་དཔུང་གཡོན་ཐད་གསོར་ནས། །དེ་ནས་ས་ལ་བཀྱེར་བར་བྱ། །སླར་ལ་ལོག་ཅིང་དཔུང་གཡོན་བསྐོར། །དྲིལ་བུ་ཐུགས་ཀའི་ཐད་གསིལ་ལ། །རྡོ་རྗེ་གསོར་ནས་ཐུགས་ཀར་ནི། །ཐད་ཀར་དཀྲོལ་ཞིང་གཟུང་བར་ བྱ།།རྡོ་རྗེ་དང་ནི་དྲིལ་བུ་གཉིས། །གར་གྱི་ཚུལ་དུ་བཀྱེར་བ་དང་། །རྡོ་རྗེ་དང་ནི་དྲིལ་བུ་གཉིས། །གཡས་གཡོན་དབང་དུ་བཀྱེར་བ་དང་། །དེ་ལྟར་རྡོ་རྗེ་དྲིལ་ཐབས་ཀྱིས། །རྡོ་རྗེ་གླུ་དང་བསྟུན་ནས་སུ། །བདེ་གཤེགས་རྣམས་ལ་མཆོད་པ་འབུལ། །གླུ་གར་རྩེད་འཇོའི་ཕྱག་རྒྱ་ཡིས། ། འཛུལ་ལམ་ནམ་མཁར་འཕུར་བར་འགྱུར། །རྣལ་འབྱོར་ཚོགས་འཁོར་ཚོགས་མཆོད་ཀྱི། །སྤྲོས་ལ་དགལ་བའི་དུས་སུ་བྱ། །རྣལ་འབྱོར་བསྡུས་པ་འདོད་པ་ཡིས། །སྦྱོར་ཐབས་ཚུལ་གྱིས་བཞི་པོ་བྱ། །ཤིན་ཏུ་བསྡུས་པ་འདོད་པ་ཡིས། །ལྷ་རྣམས་བསྟོད་པ་བར་བར་དུ། ། རྡོ་རྗེ་དྲིལ་ཐབས་གསོར་བར་བྱ། །ཡང་ན་དྲིལ་བུ་རྒྱུན་དུ་ལ། །རྡོ་རྗེ་མཚམས་སུ་ཤེས་པར་བྱ། །དེ་རྣམས་བསམ་པའི་མཆོད་པ་ཡང་། །ཡི་གེ་གཉིས་ཀྱི་མན་ངག་གམ། །ཐབས་དང་ཤེས་རབ་མཆོད་པའམ། །ཕྱག་འཚལ་ཚུལ་དུ་བྱ་བའོ། །རྡོ་རྗེ་དྲིལ ཐབས་ཀྱི་སྦྱོར་ཀ་སྟེ་བཅུ་གསུམ་པའོ།། །།བཅོམ་ལྡན་འདས་རྡོ་རྗེ་འཛིན་པ་ལ་ཕྱག་འཚལ་ལོ། །ཕྱག་རྒྱའི་རིམ་པ་བསྟན་པ་ནི། །གཡས་ཀྱི་གུང་མོ་དག་ལ་ནི། །སོར་མོ་བཞི་པོ་བཙུགས་ནས་ཀྱང་། །རྩེ་ལྔའི་ཚུལ་དུ་བྱ་བ་དང་། །གཡོན་པའི་སོར་མོ་སྤྲོ་པའམ། །སྒྲ་སྒྲོགས ཚུལ་དུ་བྱེད་པའམ།།ཡང་ན་མཐེ་བོང་མཐེ་ཆུང་གཉིས། །བཀུག་ནས་གསུམ་པོ་རྩེ་གསུམ་ཚུལ། །གཡས་པ་སྔ་མ་དང་འདྲ་ལ། །གཡོན་པའི་གུང་མོ་བཀུག་ནས་སུ། །མཛུབ་མོ་རྒྱ་བ་སྦྱར་བཀུག་པའོ། །སོར་མོ་རྣམས་ཀྱང་བཅིངས་ནས་སུ། །གུང་མོ་མཐེ་བོང་ངོས་ བཏུད་ནས།།གཞན་རྣམས་ཡོངས་སུ་བརྐྱང་པ་ཡིས། །ལག་གཡས་མཐེབ་མཛུབ་ཞགས་པ་བྱ། །གཡོན་གྱི་མཐེབ་མཛུབ་རལ་གྲིའི་ཚུལ། །གཉིས་ཀ་ལྷག་མ་རྣམས་ནི་བཅིང་། །གཡས་ཀྱི་ཁུ་ཚུར་བཅིངས་ནས་སུ། །མཐེ་བོང་ནང་ནས་གདོན་པར་བྱ། །གཡོན་གྱི་ མཐེ་བོང་མཛུབ་མོར་སྦྱར།།ལྷག་མ་རྣམས་ནི་བཅིང་བར་བྱ། །ལག་གཉིས་རྡོ་རྗེ་ཐལ་མོ་ལས། །གུང་མོ་ལ་ནི་མཛུབ་མོ་སྦྱར། །མཐེ་བོང་བསྣོལ་ཏེ་སྦྱར་བར་བྱ། །ཡང་ན་ལག་གཉིས་སྦྱར་བའམ། །གཡོན་གྱི་སོར་མོ་སྤྱིར་བསྡུས་པའོ། །ལག་གཉིས་ཁུ་ཚུར་བཅངས་ ནས་ནི།།མཛུབ་མོ་བསྒྲེང་སྟེ་བྲང་དུ་བསྣོལ། །གཡས་ཀྱི་ཁུ་ཚུར་བཅངས་ནས་ནི། །མཛུབ་མོ་དང་ནི་གུང་མོ་དགུག་།གཡོན་གྱི་ཁུ་ཚུར་བཅངས་ཏེ་བསྐོར། །གུང་སྲིན་ལ་སོགས་གསུམ་པོ་རྣམས། །དམ་པོར་བཀུག་ནས་ཡོངས་སུ་བསྡམ། །མཐེབ་མཛུབ་བཞི་རྣམས་རབ་ བརྐྱང་སྟེ།།སྤྱི་བོར་ངེས་པར་བསྣོལ་ནས་གནས། །ཕྱག་གཉིས་སྤྱི་བོར་ཐལ་སྦྱར་ནས། །མེ་ལྕེ་ཕྲེང་བ་ཡོངས་སུ་འཛིན། །ལག་པ་གཡས་གཡོན་འཛིན་ཚུལ་དང་། །གཡས་པ་ཁུ་ཚུར་བཅངས་ནས་ནི། །གུང་མོ་བཀུག་པའི་རྒྱབ་ཏུ་ནི། །མཛུབ་མོ་ངེས་པར་སྦྱར་བར་ བྱ།།མཛུབ་མོ་ལྕགས་ཀྱུའི་ཚུལ་དང་ནི། །གཡོན་གྱི་སོར་མོ་བསྡུས་ཏེ་བསྐོར། །ལག་གཉིས་མཐེབ་མཛུབ་སྦྱར་ནས་ནི། །གསུམ་པོ་བརྐྱང་སྟེ་རྩེ་མོར་སྦྱར། །ལག་གཡས་ཁུ་ཚུར་བཅངས་ནས་ནི། །གུང་མོ་བརྐྱང་སྟེ་གཡོན་པ་ཡི། །ཁུ་ཚུར་བཅངས་ཏེ་གྲུ་མོ་གཟུགས། །ལག་ པ་སྦྱར་ཏེ་བསྐོངས་པ་དང་།།སྒྲ་སྙན་གར་གྱི་རོལ་པས་གནས། །ལག་གཡས་ཁུ་ཚུར་ཐོ་བའི་ཚུལ། །གཡོན་པ་མཐེབ་མཛུབ་ཞགས་པའི་ཚུལ། །ལག་གཡས་སོར་མོ་བསྐོངས་པ་དང་། །གཡོན་པ་མཐེབ་མཛུབ་སྦྱར་ཏེ་བཅངས། །ལག་གཡས་གུང་མོ་སྲིན་ལག་གཉིས། ། བཀུག་སྟེ་གསུམ་པ་བཅིང་བར་བྱ། །ལག་གཡོན་མཐེབ་མཛུབ་སྦྱར་ཏེ་བཅང་། །གཡས་ཀྱི་གུང་མོ་མཛུབ་མོ་བརྐྱང་། །སྲིན་ལག་མཐེའུ་ཆུང་མཐེ་བོས་མནན། །གཡོན་གྱི་མཐེབ་མཛུབ་སྦྱར་ཏེ་བཅང་། །ཕྱག་རྒྱའི་སྦྱོར་ཀ་སྟེ་བཅུ་བཞི་པའོ།། །།བཅོམ་ལྡན་འདས་ཕྱག ན་རྡོ་རྗེ་ལ་ཕྱག་འཚལ་ལོ།།ོཾ་ནཱི་ལཱམྦ་རདྷ་ར་བཛྲ་པཱ་ཎི་ཧཱུཾ་ཧཱུཾ་ཕཊ། ཨོཾ་ཏྲཻ་ལོཀྱ་བི་ཛ་ཡ་ཧཱུཾ་ཕཊ། ཨོཾ་མ་ཧཱ་ཡཀྵ་སེ་ནཱ་པ་ཏ་ཡེ། ནཱི་ལཱམྦ་ར་དྷ་ར་བཛྲ་པཱ་ཎི་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ། ཨོཾ་བཛྲ་ཡཀྵ་ཧཱུཾ་ཕཊ། ཨོཾ་ནཱི་ལཱམྦ་ར་དྷ་ར་མ་ཧཱ་ཡཀྵ་སེ་ནཱ་པ་ཏ་ཡེ་བཛྲ་པཱ་ཎཱི་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་མ་ཧཱ་ཀཱ་ལ་ རོ་ཥ་ཎ་ཧཱུཾ་ཕཊ།ོཾ་བཻ་ཤྲ་བ་ཎ་ཧཱུཾ་ཕཊ། ཨོཾ་ནཱི་ལཱམྦ་ར་དྷ་ར་བཛྲ་པཱ་ཎི་མ་ཧཱ་ཡཀྵ་སེ་ནཱ་པ་ཏ་ཡེ་ཧཱུཾ་ཕཊ། ཨོཾ་པྲ་བི་ཏ་པ་ཏ་ཡེ་ཧཱུཾ་ཕཊ། ཨོཾ་ན་མོ་མེ་ཧ་རཱ་ཡ་ཧཱུཾ་ཕཊ། ཨོཾ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ཨོཾ་ས་མནྟ་བཀྟྲ་ཡེ་ཧཱུཾ་ཕཊ། ཨོཾ་ཤབྡ་གཱིརྟ་ཡེ་ཧཱུཾ་ཕཊ། ཨོཾ་བཛྲ་བེ་ཏཱ་ལཱི་ཧཱུཾ་ཕཊ། ཨོཾ་ པྲ་ཏཾ་སྟ་ནཱ་ཡ་ཧཱུཾ་ཕཊ།ོཾ་ཤ་སོ་གུ་པཱ་ཡ་ཧཱུཾ་ཕཊ། ཨོཾ་ར་ག་དྷ་པྲི་ཡ་ནི་ཧཱུཾ་ཕཊ། ཨོཾ་བཛྲ་ཌཱ་ཀ་ཡེ་ཧཱུཾ་ཕཊ། ཨོཾ་ཡ་མནྟ་ས་པཀྵི་ནི་ཧཱུཾ་ཕཊ། ཨོཾ་བཛྲ་བེ་ར་ཡེ་ཧཱུཾ་ཕཊ། ཨོཾ་རཀྟ་ཀ་ར་ལོ་ཀ་བི་ཤ་ན། ནཱི་ལཱམྦ་ར་དྷ་ར་བཛྲ་པཱ་ཎཱ་ཡེ། ན་གྭ་ལ་ག་ར་བ་ར་ཏ་ཀེ་ཏྭ་བྱཱ་གྷྲ་ཙརྨ་ཎི་བ་ས་ནི་ཡ་བྷ་མ་ཀོ་རེ་ག་ རུ་ར་རུ་སྟིམ་ཏི་མཾ།ཀྲོ་དྷ་མུ་རྟེན་ཏྲཻ་ལོཀྱ་ཏྲ་ཧ་ཡ། །བྷྲཱུཾ་མེ་ན་ཀོ་པ་ཡ་ས་ན་རུ་དྲཱ་ཡ་ནཱ་ག་ར་ཙ་ཏུ་རྨཱ་ར་བྷཀྵ་ཡ་ཧཱུཾ་ཕཊ། ཨོཾ་ཏྲེ་ལོ་ཀྱ་བི་ཛ་ཡ་ཧཱུཾ་ཕཊ། ཨོཾ་ནཱི་ལཱམྦ་ར་དྷ་ར་བཛྲ་པཱ་ཎི་མཎྜལ་དེ་བ་ཏཱ་ནཱཾ། པུཥྤ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཨོཾ་ནཱི་ལཱམྦ་ར་དྷ་ར་བཛྲ་པཱ་ཎི་མཎྜལ་དེ་བ་ ཏཱ་ནཱཾ།དྷཱུ་པ་པཱུ་ཛ་མེ་གྷ་ས་མུ་དྲ་སྥར་ཎ་ས་མ་ཡེ་ཧཱུཾ། ཨོཾ་ནཱི་ལཱམྦ་ར་དྷ་ར་བཛྲ་པཱ་ཎི་མཎྜལ་དེ་བ་ཏཱ་ནཱཾ། ཨཱ་ལོ་ཀེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཨོཾ་ནཱི་ལཱམྦ་ར་དྷ་ར་བཛྲ་པཱ་ཎི་མཎྜལ་དེ་བ་ཏཱ་ནཱཾ། གནྡྷེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཨོཾ་ནཱི་ལཱམྦར་དྷར་བཛྲ་པཱ་ ཎི་མཎྜལ་དེ་བ་ཏཱ་ནཱཾ།ནཻ་བི་ཏྱེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཨོཾ་ནཱི་ལཱམྦ་ར་དྷ་ར་བཛྲ་པཱ་ཎི་མཎྜལ་དེ་བ་ཏཱ་ནཱཾ། ཤབྡ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཨོཾ་ནཱི་ལཱམྦ་ར་དྷ་ར་བཛྲ་པཱ་ཎི་མཎྜལ་དེ་བ་ཏཱ་ནཱཾ། ཙ་རི་པཱུ་ཛ་མེ་བྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཨོཾ་ནཱི་ལཱམྦ་ར་དྷ་ར་བཛྲ་པཱ་ཎི་མཎྜལ་ དེ་བ་ཏཱ་ནཱཾ།ཏ་ར་ནི་རྱཱ་ཏ་ཡཱ་མི་ཧཱུཾ། ཨོཾ་ནཱི་ལཱམྦ་ར་དྷ་ར་བཛྲ་པཱ་ཎི་མཎྜལ་དེ་བ་ཏཱ་ནཱཾ། བསྟྲ་ནི་ཪྱཱ་ཏ་ཡཱ་མི་ཧཱུཾ། ཨོཾ་ནཱི་ལཱམྦ་ར་དྷ་ར་བཛྲ་པཱ་ཎི་མཎྜལ་དེ་བ་ཏཱ་ནཱཾ། གནྡྷ་རྦ་ནི་རྱཱ་ཏ་ཡཱ་མི་ཧཱུཾ། ཨོཾ་ནཱི་ལཱམྦ་ར་དྷ་ར་བཛྲ་པཱ་ཎི་མཎྜལ་དེ་བ་ཏཱ་ནཱཾ། མ་ཎི་རཏྣ་སརྦ་བསྟུ་ནི་རྲྫཏྣ་ཡཱ་མི་ཧཱུཾ། ཨོཾ་ནཱི་ལཱམྦ་ར་དྷ་ར་བཛྲ་ པཱ་ཎི་མཎྜལ་དེ་བ་ཏཱ་ནཱཾ།སྥ་ཪྵེ་ནི་ཪྱཱ་ཏ་ཡཱ་མི་ཧཱུཾ། ཨོཾ་ཙཎྜ་མ་ཧཱ་རོ་ཥ་ཎ་ཨཱཪྱཱ་ཨརྠ་སིདྡྷ་ཡེ་ཧཱུཾ་ཕཊ་སྭཱ་ཧཱ། ཨོཾ་མ་ཎི་དྷ་རི་བཛྲ་པཱ་ཎི་ཧཱུཾ་ཕཊ་སྭཱ་ཧཱ། ཨོཾ་བསྟུ་རཏྣ་བ་ཏི་ཧཱུཾ་ཕཊ། ཨོཾ་ཨ་མྲྀ་ཏ་སི་ཏི་ཧཱུཾ་ཕཊ། ཨོཾ་སཾ་མ་ཤི་ཏ་ཡ་བ་ར་བ་ཧཱུཾ་ཕཊ། ཨོཾ་ཙམྦ་ཤ་ས་པ་རི་ཧཱུཾ་ཕཊ། ཨོཾ་ཀུ་མཱ་རི་བྷ་ཛ་ཤ་མ་ ནི་ཧཱུཾ་ཕཊ།ོཾ་བཛྲ་པཱ་ཎི་ཧཱུཾ་ཕཊ། ཨོཾ་བཛྲ་པཱ་ཎི་ཧཱུཾ་ཧཱུཾ། ཏདྱ་ཐཱ། བྷོ་བྷོ་བན་ནཱ་ག་ཨ་དྷི་པ་ཏ་ཡེ། ཨི་དཾ་ནཱི་ལཱམྦ་ར་དྷ་ར་ཤ་རཱི་རཾ་བཛྲ་པཱ་ཎཱི། ཧྲྀ་ད་ཡ་ན་ས་མ་ཡ་མ་ཏི་ཀྲ་མ་ཏེ་ཨུཙྪ་ཏ་ནཾ། བྷ་བི་ཤུ་ཏི། ཏདྱ་ཐཱ། བུདྡྷ་བུདྡྷ། བི་བུདྡྷ། མ་ཏི་པྲ་ཏི་བ་བ་ཏ། ཧ་ར་ཧ་ར་ནཱ་ག་ནཱཾ། པྲ་ཧ་ར་ པྲ་ཧ་ར།ཙྪིནྡ་ཙྪིནྡ། ནཱ་ག་ཧྲྀ་ད་ཡ་ནི། བིནྡ་བིནྡ། བི་སི་ནཱ་གེ་ཏ་མ་ནི་དཾ་མ་ན་ད། ནཱ་ག་ཤ་རཱི་ར་ན། བི་སྥོ་ཊ་ཡ། །ནཱ་ག་ཡ་ན་ནི། ཏདྱ་ཐཱ། ནཱ་ག་བི་དྷ་ར་ནཱ་མཱ་ཡ་ཧཱུཾ་ཕཊ། ནཱ་ག་ཨུཙྪ་ཊ་ནཱ་ཡ་ཧཱུཾ་ཕཊ། ནཱི་ལཱམྦ་ས་ནཱ་ཡ་ཧཱུཾ་ཕཊ། ཨ་པྲ་ཏི་ཧ་ན་བ་ལ་བ་ར་ཀྲ་མཱ་ཡ་ཧཱུཾ་ཕཊ། །ཀྲྀ་ཏཱ་ནྟཱ་ཡ་ ཕཊ།ཀྲྀ་ཏཱནྟ་རཱུ་པཱ་ཡ་ཕཊ། རོ་ཥ་ཎཱ་ཡ་ཕཊ། ཀུ་ཤ་ཏ་ན་ཨུཏྟ་ནཱ་ཡ་ཕཊ། པྲེ་ཏ་བི་ནཱ་ཤ་ཀ་རཱ་ཡ་ཕཊ། ཡཀྵ་ཨ་པསྨ་ར་བི་ནཱ་ཤ་ཀ་ར་ཡ་ཕཊ། ཧ་ས་ཧ་ས། དྷ་ར་དྷ་ར། མཱ་ར་ཡ་མཱ་ར་ཡ། ནཱི་ལཱམྦ་ར་དྷ་ར་བཛྲ་པཱ་ཎི། ནཱ་ཤ་ཡ་ནཱ་ཤ་ཡ། སརྦ་བིགྷ་ནཱཾ། བི་ནཱ་ཤ་ཀ་ར་ཡ་ཕཊ། སརྦ་ཤ་ཏྲཱུཾ་སཾ་གྷ་བི་ནཱ་ཤ་ཀ་ར་ཡ་ཕཊ། རཱ་ཛྙཱ་པ་ཡ་ཏི་སྭཱ་ཧཱ། སྔགས་ཀྱི་སྦྱོར་བའི་རིམ་པ་ཡང་། །བསྙེན་དང་བསྒྲུབ་པ་ལས་ཀྱི་སྦྱོར་ཀའི་སྔགས་ཀྱི་རིམ་པར་བྱའོ། །དབྱེ་བའི་རིམ་པ་མ་ཤེས་ན། །ལས་རྣམས་འགྲུབ་པར་མི་འགྱུར་རོ། །དེ་བརྩོན་སློབ་དཔོན་ལ་གུས་པས། །སེར་སྣ གཡོ་སྒྱུ་མེད་པས་སུ།།ཡོན་གྱིས་བླ་མ་མཉེས་བྱས་ལ། །ཡང་ཡང་མཉན་པས་མན་ངག་ནི། །ཐེ་ཚོམ་མེད་པ་ཤིན་ཏུ་གཅེས། །དེ་བས་མན་ངག་ཅན་ནི་བཙལ། །མན་ངག་མེད་པའི་ནན་རྟགས་ལ། །དངོས་གྲུབ་ཐོབ་པར་མི་འགྱུར་རོ། །སྔགས་ཀྱི་སྦྱོར་ཀ་སྟེ་བཅོ་ལྔ་པའོ།། །། བཅོམ་ལྡན་འདས་རྡོ་རྗེ་འཛིན་པ་ལ་ཕྱག་འཚལ་ལོ། །སྔགས་རྣམས་ཀྱི་ནི་བཏུ་བའི་མཆོག་།བྱས་པས་ཐེ་ཚོམ་སེལ་བར་འགྱུར། །ཕྱག་འཚལ་མགོ་ལ་བརྒྱན་པར་བྱ། །ཀཱ་ལིའི་སྡེ་ཚན་བཞི་པ་ཡིས། །བཞི་པ་དག་ལ་ཨིས་སུ་བརྒྱན། །ཀཱ་ལིའི་སྡེ་ཚན་དྲུག་པ་ཡི། །གསུམ པ་དག་ལ་མས་སུ་བརྒྱན།།བ་ཞེས་བྱ་བ་ཡི་གེ་ལ། །ཧ་ཞེས་བྱ་བའི་ཡི་གེ་བཏགས། །དེ་འོག་ར་ཡི་ཡི་གེའོ། །ད་ལ་ཧ་བཏགས་དེའོ་གར། །དེ་འོག་བ་དང་ཛ་ལ་ནི། །ར་བཏགས་པ་ནི་དེ་ཡི་འོག་།ན་ལ་ཨིས་སུ་བརྒྱན་ཧཱུཾ་ཕཊ། །ཡང་ན་ཧཱུཾ་གཉིས་སོགས་པའམ། །ཡི་གེ་བཅུ་གསུམ་ པ་ཞེས་བྱ།།ཚེག་བར་ཆོད་པའི་དབང་དུ་བྱས། །ོཾ་གྱི་ཡི་གེ་དང་པོར་མཚན། །ཡི་གེ་ན་ལ་ཨིས་སུ་བརྒྱན། །ཡི་གེ་ལ་ལ་མས་སུ་བརྒྱན། །བ་ལ་ཏ་ནི་གདགས་པར་བྱ། །ར་ཡི་ཡི་གེ་གཅིག་པུ་གནས། །ད་ལ་ཧ་ནི་གདགས་པར་བྱ། །ར་ཡི་ཡི་གེ་གཅིག་པུ་གནས། ། བ་དང་ཛ་ནི་སྡེབས་པ་ལ། །ཡི་གེ་ར་ནི་གདགས་པར་བྱ། །བ་ནི་གཅིག་པུ་གནས་པ་ལ། །ན་ལ་ཨིས་སུ་བརྒྱན་པར་བྱ། །མ་དང་ཧ་དང་ཡ་དང་གསུམ། །གདགས་པ་མེད་དེ་སོ་སོར་གནས། །ཀ་ལ་ཤ་ནི་གདགས་པར་བྱ། །ས་ལ་ཨིས་སུ་བརྒྱན་པར་བྱ། །ན་དང་པ་དང་ཏ་དང གསུམ།།གདགས་པ་མེད་དེ་ལུགས་སུ་གནས། །ཡ་ལ་ཨེས་སུ་བརྒྱན་པར་བྱ། །ཧ་ལ་ཨུ་ནི་བཏགས་ནས་སུ། །ཟླ་ཚེས་ཐིག་ལེས་བརྒྱན་པར་བྱ། །ཕ་ནི་གཅིག་པུ་ཏ་ནི་བཟློག་།ཡང་ན་ཧཱུཾ་གསུམ་ཕཊ་ཀྱང་གསུམ། །ཧཱུཾ་གཉིས་དང་ནི་ཕཊ་གཉིས་ནི། །ལས་གཞན་ དྲག་པོའི་སྐབས་དང་སྦྱར།།མན་ངག་ཅན་གྱིས་ཤེས་པར་བྱ། །ཡི་གེ་ཉི་ཤུ་རྩ་གཅིག་ཅེས། །ཚེག་བར་བཅད་པར་ཤེས་པར་བྱ། །ཡང་ན་ཧཱུཾ་གཉིས་བསྣན་པ་རྩ་གཉིས་པ། །ཡ་ཡི་ཡི་གེ་དྲག་པོ་གཉིས། །བསྣན་པས་རྩ་བཞི་པ་ཞེས་བྱ། །དེ་ཡང་དྲག་པོའི་ སྐབས་ཡིན་པས།།ཁྱད་པར་དུ་ནི་ཤེས་པར་བྱ། །ཡི་གེ་རྐང་གྲངས་དབང་བྱས་ན། །དེ་ལྟར་མ་ངེས་རྩ་དྲུག་ནས། །སུམ་ཅུ་རྩ་གཅིག་བར་དུ་ཡོད། །ོཾ་གྱི་ཡི་གེ་དང་པོར་མཚན། །མཚན་གྱི་ཡི་གེའི་སྟེང་དུ་ནི། །མ་དང་ཧ་དང་ཚ་དང་ན་དང་ནི། །ད་ལ་ཧ་ནི་གདགས་པར་བྱ། །ར་ལ་ ཨོས་སུ་བརྒྱན་པ་ནི།།ཤ་དང་ན་དང་ཧ་ལ་ཨུ། །ཟླ་ཚེས་ཐིག་ལེ་ཧ་ལ་བརྒྱན། །ཕ་དང་ཏ་ལོག་ཡི་གེའོ། །ཡི་གེ་བཅུ་གསུམ་ཞེས་སུ་བྱ། །ཡི་གེ་དྲུག་ཅེས་བྱ་བ་ནི། །མཚན་གྱི་མན་ངག་ཁོ་ནའོ། །སྭཱ་ཧཱ་ཨོཾ་དང་ཧོ་དང་གསུམ། །ཞི་རྒྱས་དབང་གི་ཡི་གེ་མཐའ། །ཛ་སོགས་པ་ ཡི་ཡི་གེ་རྣམས།།འགུགས་པ་ལ་སོགས་མཐའ་རུ་བསྟན། །མན་ངག་ཅན་གྱིས་སྦྱོར་ཞེས་བྱའོ། །ཡི་གེ་ཧཱུཾ་ནི་འབྲུ་གཅིག་པོ། །འདི་ཡང་བཟླས་པའི་ཡི་གེ་སྙིང་པོ་ཡིན། །ཡི་གེ་བཏུ་བ་མ་ཤེས་ན། །སྔགས་ཀྱི་མཐུ་ནི་ཉམས་པར་འགྱུར། །དེ་བས་ནན་ཏན་བསྐྱེད་དེ་བཏུ། །ལྷ་ རྣམས་གཞན་པོའི་སྔགས་རྣམས་ཀྱང་།།བདག་གིས་བཏབ་མ་ནུས་པས། །སློབ་དཔོན་ལ་ནི་གུས་བྱའི་ཕྱིར། །སློབ་དཔོན་རྣ་བརྒྱུད་མན་ངག་ལས། །ཡི་གེ་བཏུ་བ་ཤེས་པར་བྱ། །ཡི་གེ་བཏུ་བའི་སྦྱོར་བ་སྟེ་བཅུ་དྲུག་པའོ།། །།བཅོམ་ལྡན་འདས་རྡོ་རྗེ་འཛིན་པ་ལ་ཕྱག་ འཚལ་ལོ།།བཟླས་བརྗོད་མན་ངག་བསྟན་པར་བྱ། །ཕྱི་དང་ནང་དང་གསང་བ་དང་། །བླ་མེད་བཟླས་བརྗོད་བཞི་རུ་བསྟན། །དང་པོ་ཕྱི་ཡི་བཟླས་པ་ནི། །སེམས་དཔའ་སུམ་བརྩེགས་ཚུལ་དུ་བྱ། །དེ་ནི་ཀུན་གྱི་ཐུན་མོང་ཡིན། །ཁྱད་པར་རེ་རེའམ་གཉིས་སྡེབས་སུ། །ལས་ཀྱི་ཁྱད་ པར་སྐབས་དང་སྦྱར།།མཚོན་གང་ནས་དང་རྟ་རྔའི་ཚད། །མཚོན་གྱི་སུམ་ཆ་དེ་ཡི་ཕྱེད། །པདྨ་ལ་སོགས་མཚོན་གྱི་ཕྱེད། །རིན་ཆེན་སྨུག་པོ་གུར་ལྟ་བུ། །ངང་པའི་རྒྱུ་ཡི་ཚད་ཙམ་མོ། །ཡང་ན་དར་མོ་གྲུ་གསུམ་ནི། །ཙི་ཏའི་ཚད་ཙམ་ཉིད་དུ་ འདོད།།དེ་ལྟའི་གནས་ནི་ཉིད་དུ་ཡང་། །ཡེ་ཤེས་བཞུགས་པའི་གནས་སུ་འདོད། །ལ་ལ་དག་གི་བཞེད་ཀྱིས་ནི། །རང་བྱུང་ཉིད་དུ་ཡོད་པར་འདོད། །དེ་ནི་རྒྱུའམ་ནུས་པའི་ཚུལ། །ལ་ལ་དག་གི་བཞེད་ཀྱིས་ནི། །དེ་ཉིད་ལས་ནི་སྤྲུལ་པ་ཡི། །ཀུན་བརྟགས་དེ་ལ་དེ་སྐད་ གདགས།།གཞན་ཡང་གཞུང་ལུགས་མི་མཐུན་པའི། །དང་པོ་དབང་བསྐུར་དུས་སུ་ནི། །དང་པོར་དཀྱིལ་འཁོར་བཅུག་པའི་ལྷ་དང་ནི། །དེ་ཉིད་སོ་སོ་ཐ་དད་འདོད། །ཐུགས་ཀ་དབུ་སྟེང་གོང་འོག་གནས། །ལྷ་ཉིད་འཇུག་པའི་ཚུལ་ལ་ཡང་། །འཁོར་ལོ་རྫོགས་པའམ་ལྷ་དེ་ ཉིད།།བདག་ཉིད་མན་ངག་ཐོབ་གཞུང་གིས། །ལྷ་དེ་རྐྱེན་གྱི་ཚུལ་ཡིན་ལ། །རང་འབྱུང་ནུས་པ་རྒྱུ་ཡིན་པས། །གཉིས་མེད་གཅིག་ཏུ་སྡེབས་ཏེ་བསྒོམས། །དེ་ལྟར་ཐེ་ཚོམ་བཅད་ནས་ནི། །རང་གི་རིག་པ་ཕོ་བྲང་ཉིད། །ཤིན་ཏུ་གསལ་བར་སྦྱངས་ནས་ནི། །ཡེ་ཤེས་ལྷ་ ལ་བསྙེན་པ་འབུལ།།དང་པོ་འོད་ཟེར་སྤྲོས་ནས་ནི། །ཡེ་ཤེས་སྤྱན་དྲངས་ལྷ་དེ་ལ། །མཚན་མ་ལ་སོགས་གསལ་ནས་ནི། །འཁོར་ལོ་བཞིན་དུ་དབུལ་བ་དང་། །པདྨ་བརྩེགས་དང་རིན་ཆེན་ཐག་།དེ་ཉིད་ཐུན་མོང་ཤེས་པར་བྱའོ། །ལུགས་འབྱུང་ལུགས་བཟློག་འཁོར་ ལོའི་ཚུལ།།ཤེས་རབ་སྦྱོར་ཐབས་མཆོད་པའི་ཚུལ། །མཆོག་གི་དངོས་གྲུབ་འདོད་པའོ། །ལྕེ་ནི་རྡོ་རྗེ་དཀར་པོར་བསྒྱུར། །ཡང་ན་སྔོ་ལྗང་ཉིད་དུ་བྱ། །ཉི་མ་ཤར་བ་བཞིན་དུ་གདལ། །དེ་ནི་སྔོན་དུ་བསྙེན་པའི་ཚུལ། །དྲག་པོ་བསྒྲུབ་པའི་གནས་སྐབས་སུ། །མན་ངག་ གོང་བཞིན་བཟློག་སྟེ་གསལ།།ལྕེ་ནི་རྡོ་རྗེ་སེར་པོ་དང་། །དམར་པོ་རྒྱས་དང་དབང་ལ་ཤིས། །མཐིང་ག་དྲག་པོའི་ཚུལ་དུ་བསྟན། །འོད་ཟེར་འཁོར་ལུགས་གོང་བཞིན་ནོ། །ལས་ཀྱི་རིམ་པའི་སྐབས་དང་སྦྱར། །བ་ཐག་ཚ་ཚའི་ཚུལ་དང་ནི། །དྲག་པོ་ཁོ་ནའི་སྐབས་དང་ སྦྱར།།རྔུལ་ཆུ་བྲུག་པ་བཞིན་དུའམ། །སྲིན་པོ་ངུར་སྐད་ཇི་བཞིན་དུ། །ཤིན་ཏུ་དྲག་ཅིང་མྱུར་བར་བཟླས། །ལས་ཀྱི་ཁྱད་པར་གཞན་དག་ལ། །སྤྲོས་ཏེ་སྦྱང་བའི་ཚུལ་དང་ནི། །འོད་ཟེར་སྦུ་གུ་བཙུགས་པ་དང་། །མེ་ཡི་ཚུལ་གྱིས་བསྲེགས་པ་དང་། །ལྕགས་ཀྱུ་ལྟ་བུས་བཀུག་པ་དང་། ། མཚོན་ཆ་ཆར་བཞིན་དབབ་པ་དང་། །འཁོར་ལོ་བཞིན་དུ་བསྐོར་བ་དང་། །མནན་པའི་ཚུལ་དུ་བྱ་བ་དང་། །མདའ་ཟམ་ཚུལ་དུ་བྱ་བ་དང་། །འཁྲུལ་འཁོར་ཚུལ་དུ་བྱ་བ་དང་། །འཕེན་སྡུད་ཚུལ་དུ་བྱ་བ་དང་། །དང་པོས་བཀུག་ལ་གཉིས་པས་བསྲེག་། དང་པོས་བཀུག་ལ་གཉིས་པས་བསད། །དང་པོས་བཀུག་ལ་གཉིས་པས་མནན། །ཡང་ན་གསུམ་སྡེབས་ཚུལ་གྱིས་བྱ། །བཞི་སྡེབས་ལྔ་སྡེབས་པ་ཡང་ཡིན། །སྡེབས་སྦྱོར་ཆོ་ག་ཐམས་ཅད་ཀྱང་། །མན་ངག་བཞིན་དུ་ཤེས་པར་བྱ། །དེ་ལ་སོགས་པའི་མན ངག་རྣམས།།བརྒྱུད་པ་ལས་ནི་ཤེས་པར་བྱའོ། །དེ་རྣམས་བཟླས་བརྗོད་བྱེད་པ་ཡང་། །སེམས་ནི་གཞན་དུ་མི་གཡེང་ཞིང་། །ཚིག་གཞན་གྱིས་ནི་བར་མི་ཆོད། །ཡི་གེ་མན་ངག་མ་ཉམས་པར། །སྒྲ་ཡི་བརྗོད་ཚུལ་སྐབས་དང་སྦྱར། །དེ་ལ་ནན་ཏན་ཆེར་བསྐྱེད་ལ། །མཚན་ མའི་དངོས་གྲུབ་འབྱུང་བར་འགྱུར།།མཚན་མའི་དངོས་གྲུབ་གསུམ་པོ་ཡང་། །དང་པོ་རབ་ལ་གསུམ་དུ་བསྟན། །སྤྲུལ་དང་ཡང་སྤྲུལ་སུམ་སྤྲུལ་ལོ། །འབྲིང་ལ་སྒྲ་དང་དྲི་དང་ནི། །འོད་དུ་ཡང་ནི་བསྟན་པ་ཡིན། །ཐ་མ་ནམ་སྨད་ནམ་སྟོད་དང་། །ཉིན་མོ་དག་དང་གསུམ་དུ་ བསྟན།།དེ་དག་རྟགས་རྣམས་ཀུན་ལ་ཡང་། །གཟུགས་ནི་སྡུག་དང་མི་སྡུག་དང་། །དྲི་ནི་ཞིམ་དང་མི་ཞིམ་དང་། །སྒྲ་ནི་སྙན་དང་མི་སྙན་དང་། །རོ་ཡང་ཞིམ་དང་མི་ཞིམ་དང་། །འོད་དཀར་འོད་སེར་འོད་དམར་པོ། །ལྗང་དང་ནག་ལ་སོགས་པ་ཡི། །རྟགས་ལ་སོགས་པ་དེ་དག་ ལ།།གསུམ་དང་བདུན་དང་བཅོ་ལྔ་དང་། །ཉི་ཤུ་རྩ་གཅིག་ཞག་ཏུ་བརྟག་།ཐམས་ཅད་བརྟན་ཞིང་མི་འགྱུར་དང་། །ཕུང་པོ་ཁམས་གསལ་ཏིང་འཛིན་གསལ། །འོད་ལ་སོགས་པ་ཞི་བའི་ཚུལ། །དེ་སོགས་རྟགས་རྣམས་བྱུང་བ་ན། །ལྷ་ཡི་དངོས་གྲུབ་ཡིན་པར་བརྟག་།མཚན་ མ་ལ་སོགས་མི་བརྟན་ཞིང་།།ཕུང་པོ་ལ་སོགས་མོས་འགྱུར་ཞིང་། །ཏིང་འཛིན་རྣམས་ནི་མི་གསལ་བ། །འོད་དམར་གནག་ཅིང་རྩུབ་འགྱུར་ན། །དེ་ལ་སོགས་པའི་རྟགས་རྣམས་ཀྱང་། །བདུད་ཀྱི་རྟགས་སུ་ཤེས་པར་བྱ། །རྟགས་རྣམས་དེ་རྣམས་བྱུང་ན་ཡང་། ། དོན་དམ་རང་བཞིན་མེད་པ་ལ། །ཀུན་རྫོབ་སྒྱུ་མ་ལྟ་བུའི་སེམས། །རེ་དང་དོགས་པ་རྣམས་སྤངས་ཏེ། །དགའ་དང་མི་དགའི་སེམས་མི་བྱ། །འཇིགས་པ་ལ་སོགས་སེམས་སྤངས་ཏེ། །མཎྜལ་མེ་ཏོག་བཅས་ཕུལ་ནས། །སྦྱིན་སྲེག་འཁོར་ལོ་ལ་སོགས་བྱ། །དེ་ལྟར་བྱས ཚེ་མཁའ་འགྲོ་མས།།ལུང་བསྟན་གནས་སུ་ཁྲིད་པ་དང་། །མན་ངག་འཇིགས་པ་མེད་པས་བླང་། །བདུད་ཀྱི་ལྟས་རྣམས་འབྱུང་བ་ནི། །གོང་བཞིན་བྱས་པས་མེད་པར་འགྱུར། །ནང་ན་མཚན་མ་བསྙེན་པ་གཙོ། །དེ་འོག་གྲངས་ཀྱི་བསྙེན་པར་གཙོ། །དུས་ཀྱི་བསྙེན་ པ་ཐ་མའོ།།གྲངས་ཀྱི་རབ་འབྲིང་ཐ་མ་ནི། །གཙོ་བོ་འབུམ་དང་ཉིས་འབུམ་དང་། །སུམ་འབུམ་དག་ཏུ་ཤེས་པར་བྱ། །རྣམ་རྒྱལ་ལ་སོགས་བཞི་པོ་ལ། །འབུམ་ཕྱེད་འབུམ་དང་ཉིས་འབུམ་མོ། །འཁོར་རྣམས་ལྷག་མ་ཀུན་ལ་ནི། །ཁྲི་དང་ཉི་ཁྲི་སུམ་ཁྲིའོ། །ཡང་ན་ ལྷ་རྣམས་སོ་སོ་ཡི།།སྐུ་གཅིག་བསྙེན་པ་བྱེད་པ་ན། །རབ་ཀྱི་བསྙེན་པ་སུམ་འབུམ་མོ། །འབྲིང་གི་བསྙེན་པ་བདུན་འབུམ་མོ། །ཐ་མའི་བསྙེན་པ་བྱེ་བའོ། །དུས་ལ་ཡང་ནི་གསུམ་གསུམ་ཡོད། །ཟླ་གཅིག་ཟླ་གཉིས་ཟླ་གསུམ་བར། །ལོ་ཕྱེད་ཟླ་དགུ་ལོ་གཅིག་གི་། ལོ་གཉིས་དང་ནི་ལོ་གསུམ་དང་། །ལོ་བཞི་ཐ་མར་ཤེས་པར་བྱ། །དེ་ལྟར་བྱས་ཀྱང་མ་བྱུང་ན། །དམ་ཚིག་ཉམས་པ་ཡིན་པས་ན། །སྦྱིན་སྲེག་ཚོགས་འཁོར་ལ་སོགས་ཀྱིས། །དམ་ཚིག་ཉམས་པ་བསྐང་ནས་ནི། །སླར་ལ་སོགས་པའི་ཆོ་ག་བྱ། །དེ་ལྟར་བྱས་ཀྱང་མ བྱུང་ན།།རྣལ་འབྱོར་སྡིག་སྒྲིབ་ཆེ་བས་ན། །སྦྱིན་སྲེག་ཚོགས་འཁོར་ལ་སོགས་ཀྱིས། །སྡིག་སྒྲིབ་ལ་སོགས་སྦྱངས་ནས་ནི། །སླར་ལ་སོགས་པའི་ཆོ་ག་བྱ། །དེ་ལྟར་བྱས་ཀྱང་མ་བྱུང་ན། །ཡང་ན་བསྒོམ་པ་གཅིག་པུས་བྱ། །ཡང་ན་བཟླས་བརྗོད་གཅིག་པུས་སོ། ། བསྒོམ་དང་བཟླས་པའི་དངོས་གྲུབ་ནི། །བྱུང་བར་དེ་ནི་མ་གྱུར་ན། །ཚོགས་འཁོར་ཚོགས་མཆོད་སྦྱིན་སྲེག་དང་། །གཏོར་མ་ལ་སོགས་སོ་སོ་ལ། །མན་ངག་ཆོ་ག་ཐོབ་པས་ན། །དངོས་གྲུབ་ངེས་པར་འབྱུང་བར་འགྱུར། །དེ་དག་ཐམས་ཅད་ཀུན་ལ་ཡང་། །ཐེ་ཚོམ་ཅན གྱིས་མི་འགྲུབ་སྟེ།།ཐེ་ཚོམ་མེད་ངེས་འགྲུབ་པར་འགྱུར། །དེ་ལྟར་བྱས་ཀྱང་མ་བྱུང་ན། །མཚན་མ་གསུམ་མམ་ནུས་པ་བརྟག་།ཡུངས་ཀར་དག་ལ་སྔགས་བཟླས་ནས། །ཤིང་ལྗོན་ལ་སོགས་མེ་ཏོག་ལ། །བཏབ་ནས་བསྐམས་གྱུར་རབ་ཡིན་ནོ། ། ཆུ་ལ་བཟླས་ཏེ་གཏོར་བ་ན། །ཆར་པ་ལ་སོགས་འབེབས་པ་དང་། །ཐལ་བ་ལ་ནི་སྔགས་བཟླས་ན། །ཆར་བ་ལ་སོགས་གཅོད་པར་འགྱུར། །དེ་ནི་འབྲིང་གི་ནུས་པའི་རྟགས། །ཡུངས་ཀར་ཕྱག་མཚན་ལ་སོགས་པས། །སྔགས་བཟླས་གཏོར་ཞིང་བྲབས་པ་ཡིས། །གདོན དང་ནད་ལ་སོགས་པ་སེལ།།དེ་ནི་ཐ་མའི་ནུས་པའི་རྟགས། །དེ་ལྟར་བྱས་ཀྱང་མ་བྱུང་ན། །ལྷ་སོགས་མན་ངག་ཐམས་ཅད་སྤྲོ། །ཁམས་དང་བག་ཆགས་མེད་ཕྱིར་རོ། །ཆོ་ག་ཐམས་ཅད་གོང་བཞིན་ནོ། །མན་ངག་མི་མཐུན་གཞན་ཡང་སྦྱར། །དེ་ལྟར་བྱས་ན་དངོས་ གྲུབ་འབྱུང་།།དངོས་གྲུབ་བྱུང་བར་མ་གྱུར་ཀྱང་། །སྒྲིབ་པ་རྣམས་ནི་མགོ་མནན་ནས། །ཚོགས་ཆེན་ཁྱད་པར་བསགས་ནས་ནི། །དམ་ཚིག་མ་ཉམས་རྣལ་འབྱོར་པས། །སྐྱེ་བ་ཕྱི་མ་ལ་སོགས་སུ། །དངོས་གྲུབ་རྣམས་ནི་ཐོབ་པར་འགྱུར། །དངོས་གྲུབ་ཁྱད་པར་མ་ཐོབ་ན། ། སྐྱེ་བ་བདུན་ལ་གདོན་མི་ཟ། །ནང་གི་བཟླས་བརྗོད་བསྟན་པ་ནི། །རྣལ་འབྱོར་ལམ་པ་རྣམས་ཀྱིས་ནི། །སྙིང་གའི་འཁོར་ལོ་ལ་སོགས་ལ། །རང་འབྱུང་ཡི་གེ་ནུས་པ་ནི། །རླུང་གི་རྟ་ལ་ཞོན་ནས་ཀྱང་། །སྙིང་གའི་འཁོར་ལོ་ལ་སོགས་བསྐོར། །གསང་བའི་བཟླས་བརྗོད མན་ངག་ནི།།བྱང་ཆུབ་སེམས་ཀྱི་མན་ངག་གམ། །ཕྱག་རྒྱ་ལ་བརྟེན་ཇི་བཞིན་ནོ། །མཐར་ཐུག་གི་ནི་བཟླས་པ་ཡང་། །སྣང་བ་གསུམ་གྱི་མཐའ་ལ་ནི། །མེ་རྟོག་ཡེ་ཤེས་སྟོང་ཉིད་གསལ། །དེ་ནི་བཟླས་པའི་མཆོག་ཡིན་ནོ། །བཟླས་པའི་རིམ་པའི་མན་ངག་ནི། །རྣལ་ འབྱོར་བློ་དམན་དོན་དུ་བསྟན།།བཟླས་བརྗོད་ཀྱི་མན་ངག་གི་སྦྱོར་ཀ་སྟེ་བཅུ་བདུན་པའོ།། །།བཅོམ་ལྡན་འདས་རྡོ་རྗེ་བསྣམས་ལ་ཕྱག་འཚལ་ལོ། །རྫོགས་རིམ་མན་ངག་ཅུང་ཞིག་བསྟན། །དངོས་པོ་གནས་པའི་གནས་ལུགས་དང་། །བློས་སུ་བསམ་པའི་རིམ་པ་ཡི། དངོས་པོ་གནས་པའི་གནས་ལུགས་དག་ལ་ཡང་། །རྩ་དང་རླུང་དང་བྱང་ཆུབ་སེམས། །ཙ་ཡི་གཙོ་བོ་དྷཱུ་ཏཱི་ཡིན། །དྷཱུ་ཏཱ་ཉིད་ཀྱི་གཞུང་ལུགས་ཀྱང་། །སྲོག་རྩ་ནང་དུ་རྒྱུ་བ་དང་། །དེ་ལ་བརྟན་པར་འདོད་པའོ། །དེ་ལ་སོགས་པའི་གཞུང་ལུགས་མང་། །བདག་གི་གཞུང་གིས་ནང་དུ་རྒྱུ། ། ཤིན་ཏུ་ཕྲ་བ་རྟ་རྔ་ཚད། །དེ་བས་ཕྲ་བར་འདོད་པའང་ཡོད། །དབུགས་ཀྱི་དངས་མ་ཤིན་ཏུ་ཕྲ། །འོད་དང་ལྡན་པ་ཉིད་ལ་ནི། །བྱང་ཆུབ་སེམས་ནི་ཏིལ་མར་བཞིན། །དེ་ལ་ཁྱབ་པར་བརྟེན་པ་ཡི། །གཡས་དང་གཡོན་གྱི་རྩ་གཉིས་ནི། །ལ་ལ་ནཱ་དང་ར་ས་ནཱ། །མདུན་གྱི་རྩ་ནི ད་ད་ཛྙ།།དེ་རྣམས་ཚད་ལ་སོགས་པ་ཡང་། །དྷཱུ་ཏཱི་ཉིད་དང་མཐུན་པའོ། །རྩ་ཡི་འཁོར་ལོ་རྣམས་ལ་ཡང་། །གཞུང་ལུགས་མི་འདྲ་མང་དུ་བསྟན། །འཁོར་ལོ་གཅིག་དང་འཁོར་ལོ་གཉིས། །འཁོར་ལོ་བཞི་དང་འཁོར་ལོ་དྲུག་།འཁོར་ལོ་བརྒྱད་དང་འཁོར་ལོ་དགུ། །རྡོ་ རྗེ་ནོར་བུའི་ཆ་ལ་ཡང་།།ཕོ་བྲང་བཞི་ཡི་གནས་རྟག་ཏུ། །འཁོར་ལོ་མི་མཐུན་འདོད་པ་དང་། །འཁོར་ལོ་མང་པོ་འདོད་པ་རྣམས། །ིནྡྲ་བྷཱུ་ཏི་གཞུང་ལུགས་ཡིན། །རླུང་གི་གཞུང་ལུགས་དག་ལ་ཡང་། །ལྟེ་བའི་ལྐོག་དང་ལྟེ་བ་དང་། །སྙིང་ག་མགྲིན་པ་ཡན་ལག་གི་།གནས་ ནི་ལྔ་པོ་དག་ལས་ཀྱང་།།སྲོག་གི་རླུང་དང་གྱེན་དུ་རྒྱུ། །མེ་དང་མཉམ་ནས་ཐུར་དུ་སེལ། །ཀུན་ལ་ཁྱབ་པའི་རླུང་རྣམས་ནི། །གནས་ལྔ་ཐ་དད་གཙོ་བོ་ཡིན། །ཡན་ལག་ལྔ་དང་དབང་པོ་ལྔ། །དེ་ལྟར་ཐ་དད་འདོད་པའང་ཡོད། །བདག་གི་གཞུང་གི་གནས་སྐབས་ཀྱིས། ། ལས་ཀྱི་སྒོ་ནས་ཕྱེ་བས་ན། །ཐམས་ཅད་ངོ་བོ་གཅིག་ཡིན་ནོ། །བྱང་སེམས་འབེབས་པའི་གཏུམ་མོ་ཡང་། །འཁོར་ལོ་བརྟེན་དང་མི་བརྟེན་པའི། །དྲེགས་འཛིན་མ་ནི་བཅུ་བཞི་པོ། །ིནྡྲ་བྷཱུ་ཏི་ལ་སོགས་གཞུང་། །རང་བཞིན་གཏུམ་མོ་འདོད་པར་ནི། །མཁས་པ་རྣམས་ནི ཀུན་ཀ་མཐུན།།བྱང་ཆུབ་སེམས་ལ་གཉིས་ཡོད་དོ། །དོན་དམ་དང་ནི་ཀུན་རྫོབ་བོ། །ཀུན་རྫོབ་ལ་ཡང་གཉིས་ཡོད་དེ། །སྙིགས་མར་གྱུར་དང་བཅུད་དུ་གྱུར། །བཅུད་དུ་གྱུར་ལ་གཉིས་ཡོད་དེ། །ཏིལ་མར་བཞིན་དུ་ཁྱབ་པ་དང་། །འཆི་བའི་དུས་ཚེ་འབྱུང་བའོ། ། དེ་ལ་བརྟེན་པའི་མན་ངག་ཚོགས། །རིམ་པ་བཞིན་དུ་ཤེས་པར་བྱའོ། །བསམ་ཞིང་བསྒོམ་པའི་རིམ་པ་ཡང་། །རང་འབྱུང་ཡི་གེའི་གནས་ཚུལ་ནི། །ཡི་གེ་ཧཱུཾ་དང་ཨ་དང་ནི། །ོཾ་དང་ཧཾ་གི་རྣམ་པ་བཞི། །མན་ངག་སྦྱོར་རྫོགས་ཤེས་པར་བྱ། །འཁོར ལོ་རྣམས་ནི་གསལ་བྱས་ལ།།ལྟེ་བར་ཀཱ་ལི་ཉིས་ལྔ་པ་པོ། །སྙིང་གར་དང་པོ་སྡེ་ཚན་དང་པོ་བརྒྱད། །མགྲིན་པར་ཨཱ་ལི་བཅུ་དྲུག་པོ། །དུང་ཁང་ལ་ནི་ཉིས་ལྡབ་བོ། །གཏུམ་མོ་ཞེས་བྱ་ལྟེ་བའི་ལྐོག་།སོར་གཉིས་སོར་བཞི་སོར་དྲུག་ཏུ། །མར་མེ་བཞིན་དུ་གནས་པ་ལས། ། རླུང་མ་ཉིད་མའི་སྟོབས་ཀྱིས་སུ། །ལས་ཀྱི་རླུང་ནི་སྔོན་མོ་བཅུས། །སྦར་ནས་དེ་ལ་གཏད་པར་བྱ། །རྟགས་བརྒྱད་བྱུང་ནས་ཤིན་ཏུ་སྤར། །དགའ་བ་ལ་སོགས་རིམ་སྐྱེས་པས། །རྟགས་ལྔའི་མཐར་ནི་སྟོང་པར་འགྱུར། །འཁོར་ལོ་གཅིག་དང་འཁོར་ལོ་གཉིས། །གསུམ ལ་སོགས་པའི་མན་ངག་ནི།།རིམ་པ་བཞིན་དུ་སྦྱོར་ཤེས་བྱའོ། །རླུང་རྣམས་གཡས་དང་གཡོན་དུ་ནི། །གཉི་གར་རྒྱུ་དང་དལ་བར་རྒྱུ། །དེ་ལ་གཏད་པའི་རིམ་གྱིས་ནི། །སྤྲོ་བར་ནུས་ན་བསྡུ་བར་བྱའོ། །རྟགས་ལྔའི་མཐར་ནི་སྟོང་ཉིད་འགྱུར། །ཡང་ན་ཐིག་ལེའི་རྣམ་པ་ལ། ། སྤྲོ་བ་དང་ནི་བསྡུ་བ་དང་། །ལྔ་རུ་བལྟ་དང་གཅིག་ཏུ་བལྟ། །རིམ་གྱིས་བསྟན་པར་གྱུར་ནས་ནི། །ཕྱག་རྒྱའི་དངོས་གྲུབ་ཐོབ་པའོ། །རྫོགས་པའི་རིམ་པའི་སྦྱོར་ཀ་སྟེ་བཅོ་བརྒྱད་པའོ།། །།བཅོམ་ལྡན་འདས་རྡོ་རྗེ་འཛིན་པ་ལ་ཕྱག་འཚལ་ལོ། །བགེགས་བསྐྲད་པའི་ཆོ་ག་བསྟན པ།བགེགས་བསྐྲད་པའི་ཐབས་ལ། ཆོ་ག་ཆེ་ཆུང་གི་རིམ་པ་བསྒྲུབ་བྱའི་སྐབས་དང་སྦྱར་ཏེ། ཐབས་དཔག་ཏུ་མེད་པར་བྱའོ། །དེ་ལ་རྫས་ཀྱིས་བསྐྲད་པ་དང་། སྔགས་ཀྱིས་བསྐྲད་པ་དང་། སྟང་སྟབས་ཀྱིས་བསྐྲད་པ་དང་། །ཕྱག་རྒྱས་བསྐྲད་པ་དང་། ཏིང་ངེ་འཛིན་ གྱིས་བསྐྲད་པ་དང་།།ཡང་ན་རྫས་དང་སྔགས་ཀྱིས་བསྐྲད་པ་དང་། རྫས་དང་སྟང་སྟབས་ཀྱིས་བསྐྲད་པ་དང་། རྫས་དང་ཕྱག་རྒྱས་བསྐྲད་པ་དང་། །རྫས་དང་ཏིང་ངེ་འཛིན་གྱིས་བསྐྲད་པ་དང་། །ཡང་ན་སྔགས་དང་གཉིས་འདུས་དང་། །སྟང་སྟབས་དང་གཉིས་འདུས་དང་། ཕྱག་རྒྱ་དང་གཉིས་འདུས་དང་། ཏིང་ངེ་འཛིན་དང་གཉིས་འདུས་དང་། ཕྱག་རྒྱ་སྟང་སྟབས་གཉིས་འདུས་པ་དང་། བཞི་ཀ་ལ་ནི་སྦྱར་བར་བྱ། །ཕྱག་རྒྱ་ལ་ཡང་དེ་བཞིན་ཏེ། །ཏིང་ངེ་འཛིན་ཀྱང་དེ་ལྟར་བྱ། །གཉིས་འདུས་གསུམ་འདུས་བཞི་འདུས་སུ། །ཐམས་ཅད་ཀུན་ལ་སྦྱར བར་བྱ།།ཡང་ན་ལྔ་འདུས་ཁོ་ནས་བྱ། །བགེགས་ཀྱི་རིམ་པའང་ལྔར་ཤེས་བྱ། །སྣེ་གདོན་ཕྲ་མོ་ཀུན་ལ་ནི། །སྦྱོར་ཀ་གཅིག་པུ་ཁོ་ནས་བཟློག་།རྒྱལ་འགོང་ལ་སོགས་གདོན་ལ་ནི། །སྦྱོར་བ་གཉིས་ཀྱིས་བཟློག་པར་བྱ། །དེ་བས་མཐོ་བའི་བགེགས་གཉིས་ལ། །གསུམ་ དང་བཞི་ནི་བྱ་བ་ཡིན།།བགེགས་ནི་ཆེན་པོ་ཐམས་ཅད་ལ། །སྦྱོར་བ་ལྔ་པོ་ཁོ་ནས་བྱ། །རྫས་ཀྱི་བྱ་ཐབས་བསྟན་པ་ནི། །གུ་གུལ་ཡུངས་ཀར་ཤ་ཆེན་དང་། །ཚིལ་ཆེན་དང་ནི་ཐལ་ཆེན་དང་། །དུར་ཁྲོད་སོལ་བ་གྲོག་མཁར་ས། །དེ་ལ་སོགས་པའི་རྫས་རྣམས་ལ། །གཟུགས་ བརྙན་བཅའ་བར་བྱ་བའམ།།བརྡེག་པའི་རྫས་སུ་བྱ་བ་དང་། །བདུག་པའི་རྫས་སུ་བྱ་བ་དང་། །བསྲུང་བའི་རྫས་སུ་བྱ་བ་ནི། །གླ་རྩི་དང་ནི་རྨ་བྱ་ཡི། །རྒྱལ་མཚན་ཀླུ་ལ་ཤིས་པར་བསྟན། །ཡང་ན་དུར་ཁྲོད་ཆེན་པོའི་རྫས། །རྒྱན་ཆ་རྣམས་ཀྱིས་བྱིན་བརླབས་ལ། །བསྐོན་ པས་སྲུང་བར་འགྱུར་བ་ཡིན།།སྐུ་ནི་བྱིན་གྱིས་བརླབས་ནས་སུ། །བསྲུང་བར་དེ་ནི་འགྱུར་བ་ཡིན། །སྐུ་དང་གླེགས་བམ་ལ་སོགས་པ། །བྱིན་གྱིས་བརླབས་ནས་མདུན་བཞག་པས། །བསྲུང་བར་དེ་ནི་འགྱུར་བ་ཡིན། །རྡོ་རྗེ་དྲིལ་བུ་ལ་སོགས་ཕྱག་མཚན་ལ། །བྱིན་གྱིས་ བརླབས་ནས་ལག་བཞག་ན།།བསྲུང་བར་དེ་ནི་འགྱུར་བ་ཡིན། །ཁྱད་པར་ནག་པོ་ཆེན་པོ་ཡི། །སྐུ་ནི་བྱིན་བརླབས་བཞག་པས་སུ། །བསྲུང་བར་དེ་ནི་འགྱུར་བ་ཡིན། །སྐུད་སྔོན་མདུད་པ་བདུན་བྱས་ནས། །མགུལ་དུ་བཅིངས་པས་བསྲུང་བར་འགྱུར། །ཡང་ན་སྨྱག་ཤད་ ལྕུག་མ་ཡིས།།བྱབས་པས་དེ་ནི་ཚར་གཅོད་དོ། །དེ་ལ་སོགས་པའི་མཐུན་རྫས་རྣམས། །ཐམས་ཅད་ཀྱིས་ནི་བྱ་བ་ཡིན། །འཁོར་ལོ་བཅས་ནས་ལུས་ལ་གདགས། །བསྲུང་བའི་མཆོག་ནི་ཡིན་པར་གསུངས། །སྔགས་ཀྱིས་བསྐྲད་པ་བསྟན་པ་ནི། །ོཾ་ན་མོ་ནཱི་ལཱམྦ་ ར་དྷ་ར་བཛྲ་པཱ་ཎི་ཆེ་གེ་མོ་ཧཱུཾ་ཧཱུཾ་ཕཊ།ཅེས་བསྐྲད་པའོ། །མཱ་ར་ཡ་ཕཊ་གདགས་པ་ནི་གསད་པའོ། །ཡང་ན་འཁྲུལ་འཁོར་སྦྱོར་བ་བཞིན་དུ་བྱའོ། །ོཾ་ན་མོ་ནཱི་ལཱམྦ་ར་དྷ་ར་བཛྲ་པཱ་ཎི་མ་ཧཱ་ཡཀྵ་སེ་ནཱ་པ་ཏི་ཡེ་ཧཱུཾ་ཧཱུཾ་ཕཊ། ཅེས་བྱ་བ་དང་སྤེལ་ཏེ་བྱའོ། །བསྒྲུབ་ བྱའི་མིང་གི་མཐའ་ལ་སྲེད་བྱེད་ཀྱི་ཡི་གེ་དང་ལྡན་པ་ནི་བགེགས་ཞི་བར་བྱེད་པའི་སྔགས་སོ།།མིང་གི་མཐའ་ལ་བསྲུང་བའི་སྔགས་དང་ལྡན་པ་ནི་བསྲུང་པའི་སྔགས་སོ། །མིང་གི་མཐའ་ལ་དགུག་པ་དང་། དབང་དུ་བྱ་བའི་སྔགས་ཀྱང་ཤེས་པར་བྱའོ། །སྔོན་དུ་བསྙེན་པ་ རྫོགས་པས་ནི།།སྔགས་རིང་ཁོ་ནས་བྱ་བ་ཡིན། །ཁྱད་པར་དུ་ནི་ཀླུ་ལ་ཤིས། །ཡང་ན་དྲག་པོའི་སྔགས་འདི་ནི། །ོཾ་མ་ཧཱ་ཙཎྜ་རོ་ཥ་ཎ་ཧཱུཾ་ཧཱུཾ་ཕཊ་ཅེས་བྱ་བ་དང་སྤེལ་ཏེ་བྱའོ། །ཡང་ན་རྒྱུད་བཞིན་བཏུབ་པ་དང་། །མི་བཏུབ་པ་ཡི་རིམ་པ་ནི། །སློབ་དཔོན་སོ་སོའི་གཞུང་ ལུགས་སོ།།ཇི་ལྟར་མོས་པས་འགྲུབ་པར་འགྱུར། །དྲག་པོའི་འཁྲུལ་འཁོར་གཞན་རྣམས་ཀྱང་། །མན་ངག་གཞན་གྱིས་སྦྱོར་ཤེས་བྱའོ། །སྟང་སྟབས་སྦྱོར་བས་ཚར་བཅད་ནི། །མཉམ་པའི་སྟང་སྟབས་ལ་སོགས་པ་བཅོ་བརྒྱད་ཀྱིས་ཚར་བཅད་པ་དང་། །ཕེག་རྡོབ་ སྐོར་བུ་ལ་སོགས་པ།།གྱད་འགྲོས་རྣམས་ཀྱིས་ཚར་བཅད་པ་དང་། གཡས་བརྐྱང་ལ་སོགས་པས་ཚར་བཅད་པ་དང་། དེ་གསུམ་གང་ཡང་རུང་བས་བྱའོ། །སྟང་སྟབས་ཀྱི་སྦྱོར་བ་ལས་ཤེས་པར་བྱའོ། །ཕྱག་རྒྱ་ལ་སོགས་པའི་སྦྱོར་བ་ཡང་། ལག་སྟབས་ལ་སོགས་ པའི་སྦྱོར་བ་ལ་སོགས་པ་ཤེས་པར་བྱའོ།།ཏིང་ངེ་འཛིན་གྱི་ཐབས་ནི། དང་པོར་བདག་ཉིད་ཕྱག་ན་རྡོ་རྗེ། གཏུམ་ཁྲོ་འབར་བ། མཆེ་བ་གཙིགས་པ། སྤྱན་བགྲད་པ། གོས་སྔོན་པོ་གསོལ་བ། སྐུ་ཆེ་བ། ཡན་ལག་རགས་པ། གཡས་བསྐུམ་པ། གཡོན་བརྐྱང་བས་ བགེགས་ཀྱི་སྙིང་གར་མནན་པ།ཕྱག་གཡས་པས་རྡོ་རྗེ་གསོར་བ་ལས་འོད་ཟེར་འཕྲོས་པས། རྡོ་རྗེ་ཕྲ་མོའི་མཚོན་ཆ་གྲངས་མེད་པར་བརྒྱུད་མར་བྱུང་ནས། སྤྱི་གཙུག་ཏུ་བརྒྱབ་པས་རྐང་པའི་མཐིལ་དུ་འབྱིན་པ། ཧཱུཾ་སྒྲ་དང་ཞགས་པའི་སྒྲ་བསྒྲགས་པས་ཐམས་ཅད་ དང་རས་ཤིང་བརྒྱལ་བར་བྱེད་པ།།སྐུ་ལས་ཁྲོ་བོ་དཔག་ཏུ་མེད་པ་བྱུང་བས། བསྒྲུབ་བྱའི་བ་སྤུའི་བུ་གར་ཞུགས་ནས་ཁྲག་འཇིབས་པར་བྱེད་པ། ཐུགས་ཀ་ནས་ཁྲོ་བོ་དཔག་ཏུ་མེད་པ་བྱུང་ནས། བསྒྲུབ་བྱའི་སྙིང་གར་གཟིར་བ། སྐུ་ལས་མེ་དཔུང་བྱུང་ནས་སྲེག་པར་བྱེད་པ། ཞལ་ནས་ སྔགས་ཀྱི་སྒྲ་བརྗོད་པས་འབྱུང་པོ་ཐམས་ཅད་བརླག་པར་བྱེད་པ།དེ་ལྟ་བུའི་ཁྲོ་བོ་གཅིག་བསྒོམས་ལ། ཡེ་ཤེས་བསྟིམ། བྱིན་གྱིས་བརླབ། དབང་བསྐུར་ལ་ནུས་པའི་མཐུ་ཅན་དུ་བྱའོ། །བགེགས་ཆེན་པོ་བསྐྲད་པ་ཡང་། ཆོ་ག་ཕྲ་མོས་མི་ཐུབ་སྟེ། དང་པོ་ཁོ་ནར་སྔོན་དུ་ བསྙེན་པའི་ཆོ་ག་རྫོགས་པར་བྱས་ལ།བདག་ཉིད་ལྷའི་རྣལ་འབྱོར་དུ་བསྐྱེད་ལ། བདུད་རྩི་ལྔ་དང་ལྡན་པའི་གཏོར་མ་གཅིག་བྱིན་གྱིས་བརླབས་ལ། །བདེ་བར་གཤེགས་པ་ལ་དབུལ། མཐུ་བསྐྱེད་ལ་གསོལ་བ་གདབ། ཡང་གཏོར་མ་གཅིག་ལ་ཐུན་མོང་གི་རྫས་དང་ལྡན་ པའི་སྟེང་དུ།ཁྲག་སྣ་སྙིང་སྣ་ཤ་སྣ་གསུམ་དང་ལྡན་པའི་རྫས་ལ། བྱིན་གྱིས་བརླབས་ལ་ཆོས་སྐྱོང་བའི་སྲུང་མ་ལ་ཕུལ་ལ། བདག་གི་སྟོང་གྲོགས་མཛད་པར་ལས་བསྒོའོ། །གཏོར་མ་ཆ་གཅིག་ལ་དྲུག་ཅུ་པ་ལྡན་པའི་རྫས་ལ་བྱིན་གྱིས་བརླབས་ལ། འབྱུང་པོ་ཐམས་ཅད་ ལ་བྱིན་ལ།གནོད་པ་མ་བྱེད་པར་བསྒོ་བ་བྱ། ཡང་ན་ཞི་བའི་སྦྱིན་སྲེག་གིས་བགེགས་ཞི་བར་བྱ་སྟེ། དེ་ལྟར་ཡང་ནས་ཡང་དུ་བྱས་པས་བགེགས་ཞི་བར་འགྱུར་རོ། །དེ་ལྟར་བྱས་ཀྱང་འགྲོར་མ་བཏུབ་ན། དྲག་པོའི་ལས་བྱ་སྟེ། དང་པོ་ཁོ་ན་བདག་གི་ཐུགས་ཀ་ནས་ཁྲོ་བོའི་སྤྲུལ་ པ་བཀྱེ་བས།འབྱུང་པོ་ཐམས་ཅད་བཀུག་པ་དང་། ཡང་ན་ནད་པ་ཉིད་ལ་བསམས་ཏེ། ཡི་གེ་སུཾ་ལས་འཕྲོས་འདུས་པ་ལས། རི་རབ་ཏུ་གྱུར་ནས། རི་རབ་ཀྱིས་སྙིང་གར་མནན་པར་བསམ། དེ་ནི་མནན་པའི་སྦྱོར་བའོ། །བགེགས་བསྲེག་པ་ནི། ཡི་གེ་ཧཱུཾ་གི་འཕྲོ་ འདུས།ལྕེ་ནག་པོ་རྡོ་རྗེ་སྦུ་གུ་ཅན་དུ་གྱུར་ནས། དེའི་ནང་ན་ཚུར་འོད་ཟེར་མེ་འདྲ་བ་བྱུང་ནས་གང་ལ་གནོད་པའི་སར་གཏད་ལ་བགེགས་ཐམས་ཅད་བསྲེག་པར་བྱ་སྟེ། ཡང་ན་ལྕེ་རྡོ་རྗེ་སྔོན་པོར་བསྒྱུར་ལ། འོད་ཟེར་སྔོན་པོ་རླུང་འདྲ་བས་ཐམས་ཅད་གཏོར་ཞིང་བསྐྲད་པར་བསམ་ མོ།།ཡང་ན་སྲོག་གི་འོད་ཟེར་འཕྲོས་པས། བགེགས་ཐམས་ཅད་བཅོམ་ནས་སླར་འདུས་པས་སྙིང་གའི་ལྷ་ལ་མཆོད་པར་བསམ་མོ། །ཡང་ན་མདུན་གྱི་ལྷ་མཆོད་པར་བསམ་མོ། །བསྲེག་གཏོར་བཅོམ་པའི་སྦྱོར་བའོ། །ཡང་ན་གསད་པའི་སྦྱོར་བ་ནི། གོང་ གི་སྐུ་བསྐྱེད་པ་ལ་སོགས་པ་མན་ངག་སྦྱོར་བ་ཡོད་པ་རྣམས།རིམ་པ་བཞིན་དུ་ཤེས་པར་བྱའོ། །ཁྱད་པར་སྦྱོར་བ་བསྟན་པ་ནི། །ཐུགས་ཀྱི་འོད་ཟེར་འཕྲོ་བ་དང་། །གསུང་གི་ཡིག་འབྲུ་སྤྲོ་བ་དང་། །སྐུ་ཡི་སྤྲུལ་པ་སྤྲོ་བ་དང་། །ཡང་ན་ཐུགས་ཀྱི་ཕྱག་མཚན་ཡིན། །ལྟེ་ འོག་གནས་སུ་བསྟིམ་པ་དང་།།གནས་དགུ་དག་ཏུ་བསྟིམ་པ་དང་། །ཐམས་ཅད་ཀུན་དུ་བསྟིམ་པ་དང་། །དེ་ལྟར་བསྟིམ་ལ་ལུས་དགང་ངོ་། །ཐུར་དུ་བདའ་དང་གྱེན་དུ་བདའ། །སྲོག་འགྲོ་སྟེང་འོག་བདའ་བ་དང་། །འབྱུང་ས་གཉིས་ནས་གདོན་པ་དང་། །ཐམས་ཅད་ བཅོམ་ནས་གདོན་པ་དང་།།འདོད་པའི་ཚུལ་གྱིས་བདའ་བ་དང་། །བཏོན་ནས་བཞུ་བཏུལ་བྱ་བ་དང་། །དེ་ནས་ལྷ་ལ་མཆོད་པ་བྱ། །དེ་ལ་སོགས་པའི་མན་ངག་གིས། །སྦྱོར་བ་གཞན་ཡང་ཤེས་པར་བྱ། །དེ་ལྟའི་སྦྱོར་བ་བྱེད་པ་ཡང་། །ཕལ་དང་ཕལ་གྱི་ཐུན་མོང་ མིན།།ལུས་ཀྱི་རྒྱན་ཆ་ལ་སོགས་ལྡན། །ངག་གི་མ་ཉམས་ཡོན་ཏན་ལྡན། །བར་ཆད་རྡུལ་ཙམ་མ་ཤོར་བར། །དཔེར་ན་རྔུལ་ཆུ་བྲུག་པ་བཞིན། །དེ་གསུམ་གསལ་བར་བརྗོད་པ་ཡིན། །སྣོད་མིན་པ་ལ་གསང་འགྱུར་ཡིན། །དཔེར་ན་སྲིན་པོ་ངུར་སྐད་བཞིན། །ཚིག་མི་ གསལ་བར་དོན་གསལ་བ།།ཡིད་བརྟན་དྲག་ཏུ་བཟླ་བར་བྱ། །དེ་ལྟའི་བགེགས་བསྐྲད་སྦྱོར་བ་ཡང་། །ཐམས་ཅད་ཀུན་ལ་བྱ་བ་མིན། །བསྒོམ་སྒྲུབ་པར་ཆད་བྱུང་བ་དང་། །སློབ་དཔོན་གཞན་དོན་མཛད་པ་ལ། །འབྱུང་པོས་བར་ཆད་བྱས་པ་ལ། །སྦྱོར་བ་འདི་ནི་བྱ་ བར་གསུངས།།རྡོ་རྗེ་སྤུན་ལ་བྱ་བ་ཡིན། །གཞན་ཡང་སེམས་ཅན་གཞན་པོ་ནི། །མི་དགེ་སྤང་ཞིང་དགེ་བཅུ་སྤྱོད། །དེ་ལའང་བྱ་བར་གསུངས་པ་ཡིན། །གཉི་ག་མི་བྱེད་སེམས་ཅན་ལ། །སྦྱོར་བ་ཆུང་ངུ་བྱ་བར་གསུངས། །མི་དགེ་བཅུ་ནི་དང་ལེན་ཅིང་། །རྡོ་རྗེ་སློབ་ དཔོན་ལ་སྨོད་ཅིང་།།སངས་རྒྱས་བསྟན་པ་འཇིག་པ་དང་། །རྒྱལ་ཁམས་ཡོངས་སུ་གནོད་པ་དང་། །དགེ་འདུན་འདུ་བའི་སྒོ་འཕྲོག་དང་། །ཐེག་ཆེན་གསང་སྔགས་སྨོད་པ་དང་། །རྣལ་འབྱོར་སྤྱི་ཡི་དགྲར་འགྱུར་ལ། །སྦྱོར་བ་འདི་ནི་བྱར་མི་རུང་། །གལ་ཏེ་སེམས་ཅན་ དེ་དག་ཀྱང་།།གནོང་ཞིང་འགྱོད་པས་མཐོལ་བཤགས་ནས། །སངས་རྒྱས་ཐེག་པའི་སྒོར་འཇུག་ཅིང་། །ཡང་དང་ཡང་དུ་གསོལ་འདེབས་ན། །སྦྱོར་བ་འདི་ནི་བྱ་བར་གསུངས། །སྦྱོར་བ་འདི་ཡི་མན་ངག་ཀྱང་། །རང་གི་སྲོག་བཞིན་མ་བཙས་ན། །སྣོད་དང་མི་ལྡན་ལ་སྤེལ་ནས། །བེའུ་སྦྲེལ་ གཡང་གར་ཁྲིད་པ་བཞིན།།གཅིག་ལྷུང་བས་ན་གཉིས་ཀ་ལྷུང་། །དེ་བས་ནན་ཏན་ཆེར་གྱིས་ལ། །རིན་ཆེན་ལྟ་བུའི་གང་ཟག་ལ། །བཙས་ཀ་དམ་བཞག་བྱས་ཏེ་གཏང་། །བགེགས་བསྐྲད་པ་ལ་སོགས་པའི་སྦྱོར་ཀ་སྟེ་བཅུ་དགུ་པའོ།། །།བཅོམ་ལྡན་འདས་རྡོ་ རྗེ་བསྣམས་པ་ལ་ཕྱག་འཚལ་ལོ།།དུག་སྔགས་ཀྱི་ནི་གཙོ་བོ་རུ། །སྔོན་དུ་བསྙེན་པ་བྱ་བའི་ཕྱིར། །སྔོན་དུ་བསྙེན་པའི་མན་ངག་རྣམས། །ཅུང་ཞིག་བསྡུས་ཏེ་བསྟན་པར་བྱའོ། །དང་པོ་སྐད་ཅིག་ལྟར་བསམས་ཏེ། །སྙིང་གར་ཟླ་བའི་དཀྱིལ་འཁོར་བསམ། །དེ་སྟེང་ཧཱུཾ་གི་འཕྲོ་ འདུ་ཡིས།།མཆོད་པ་ལ་སོགས་རྫོགས་བྱས་ནས། །སྟོང་པ་ཉིད་དུ་བསྒོམ་པར་བྱ། །སྟོང་པ་ཉིད་ཀྱི་ངང་ལས་ནི། །པཾ་ལས་པདྨ་འདབ་མ་བརྒྱད་པ་བསམ། །པདྨའི་ལྟེ་བར་ཟླ་བའི་དཀྱིལ་འཁོར་བསམ། །དེ་སྟེང་ཧཱུཾ་གི་འཕྲོ་འདུ་ཡིས། །རྡོ་རྗེའི་གུར་དུ་གྱུར་ནས་ཀྱང་། །ཆོ་ ག་གསུམ་མམ་སྐད་ཅིག་མས།།ཕྱག་ན་རྡོ་རྗེའི་སྐུ་བསྐྱེད་ལ། །དོན་དུ་རྡོ་རྗེ་སེམས་ཤེས་བྱ། །རྡོ་རྗེ་བསྣམས་དང་ཆོས་ཉིད་ཀྱི། །དོན་ལ་སེམས་དཔའི་ཡེ་ཤེས་ལ། །ལས་སུ་མིང་དང་ཐ་དད་ཙམ། །དེ་ཉིད་སྐུ་མདོག་དཀར་ལ་འཚེར། །ཕྱག་གཉིས་རྡོ་རྗེ་དྲིལ་བུ་བསྣམས། ། རྒྱན་རྣམས་ཐམས་ཅད་རྫོགས་ལྡན་ཞིང་། །རྡོ་རྗེ་སྐྱིལ་ཀྲུང་ཚུལ་དུ་བཞུགས། །ཡེ་ཤེས་སྤྱན་དྲངས་སྙིང་གར་བསྟིམ། །སྐུ་གསུང་ཐུགས་ནི་བྱིན་བརླབས་དབང་བསྐུར་བྱ། །དེ་ལྟར་བརྟན་བསྒོམས་ཐུགས་ཀ་རུ། །ཟླ་བ་པདྨ་ལྟེ་བ་ལ། །མན་ངག་བཞིན་དུ་བསྒོམ་པར་བྱ། །དེ ལྟར་གསལ་ནས་བཟླས་བརྗོད་བྱ།།ཐུགས་འཁོར་གསལ་དང་ལྷ་མཆོད་དང་། །སྦྱང་དང་བསྡུ་བའི་ཚུལ་བཞིན་དུ། །འབུམ་གསུམ་བསྙེན་པ་བྱ་བ་དང་། །དུས་དང་གྲངས་དང་མཚན་མ་ཡི། །བསྙེན་པ་ལ་སོགས་ཚད་ཕྱིན་ནས། །དེ་ནས་འཁོར་རྣམས་ སོ་སོ་ལ།།འབུམ་ཕྲག་རེ་རེ་བསྙེན་པ་བྱ། །འཁོར་རྣམས་བསྙེན་པའི་མན་ངག་ནི། །མདུན་དུ་པདྨའི་གདན་བསྐྱེད་དེ། །སྐད་ཅིག་ཀླུ་བརྒྱད་སྤྲུལ་ནས་ནི། །སྤྱན་དྲངས་ལ་སོགས་རྫོགས་བྱས་ལ། །འོད་ཟེར་འཕྲོས་པས་མཆོད་མཉེས་ལ། །དོན་རྣམས་གང་ཡིན་གྲུབ་པར་ བསམ།།གོང་བཞིན་མཚན་མའི་རྟགས་ཕྱིན་ནས། །དེ་ནས་བསྒྲུབ་པ་བརྩམ་པར་བྱའོ། །ལྷ་བསྐྱེད་ལ་སོགས་ཆོ་ག་ནི། །བསྙེན་པའི་དུས་དང་མཐུན་པར་བྱ། །གཙོ་བོའི་བཟླས་བརྗོད་འབུམ་ཕྲག་གཅིག་།འཁོར་རྣམས་ཁྲི་དང་སྟོང་དང་ནི། །བརྒྱ་ཡི་བར་དུ་རབ་འབྲིང་ ངོ་།།དུག་གིས་ཟིན་པའི་བསྒྲུབ་བྱ་སྟེ། །མདུན་སོགས་བྱ་བ་རྫོགས་བྱས་ལ། །ལུས་ཀྱི་ཡན་ལག་བརྒྱད་པོ་ལ། །ཡི་གེ་དགོད་སོགས་བྱ་བ་ནི། །མགོར་ཀྵུཾ་སྣ་དང་རྣ་བར་ཡུཾ། །མིག་དུ་ཧཱུཾ་དང་ཁར་ནི་སུཾ། །མགྲིན་པ་སྨྲཾ་སྙིང་ཁར་ཡྨྲྱུཾ། །ལྟེ་བར་ཀྵྨྲྱུཾ་དུ་ཤེས་པར་བྱའོ། ། ཁ་དོག་དཀར་པོ་བསམ་པར་བྱ། །སྔགས་རྣམས་དེ་ཡི་མཐུས་སུ་ནི། །སྙིང་གའི་དུག་ནི་བཅིང་བར་བྱ། །ཡེ་ཤེས་ཡི་གེ་ཧཱུཾ་གིས་ནི། །དུག་འཕྲོག་ལ་སོགས་མན་ངག་སྦྱར། །དེ་འོག་ཕྱི་མའི་ལས་བརྩམ་མོ། །རིན་ཆེན་ལ་སོགས། བུམ་པ་ལ། །སྐྱོན་བྲལ་ཡོན་ཏན ལྡན་པ་རུ།།ཆུ་དང་འོ་མ་བསྲེས་པས་དགང་། །དང་པོ་བུམ་སྦྱང་བུམ་བསྐྱེད་ལ། །པདྨ་ཟླ་བའི་གདན་སྟེངས་སུ། །དེ་སྟེང་ཡི་གེ་སུཾ་ལས་ནི། །གྱུར་པའི་རྡོ་རྗེ་མཁའ་འགྲོ་མ། །གདུགས་དཀར་གྱིས་ནི་བརྒྱན་མཛད་ཅིང་། །སྐུ་མདོག་དཀར་པོ་ཕྱག་གཉིས་པ། །ཁ་ཊྭཱཾ་ཐོད་པ་ ཕྱག་ན་བསྣམས།།སྦྲུལ་གྱི་རྒྱན་དང་ལྡན་པ་ལ། །སེམས་དཔའ་ཡི་ནི་སྐྱིལ་ཀྲུང་བཅས། །ཀླུ་རྣམས་མགོ་བོའི་ཆ་རྣམས་ནི། །ཟླ་བའི་དཀྱིལ་འཁོར་འོག་བསྡུས་ནས། །དེ་སྟེང་རྡོ་རྗེ་མཁའ་འགྲོ་མ། །པདྨ་ཡི་ནི་འདབ་མ་ལ། །ཀླུ་ཆེན་བརྒྱད་པོ་བསྒོམ་པར་བྱ། །ཤར་ དུ་ནོར་རྒྱས་བུ་དཀར་པོ།།བྱང་དུ་འཇོག་པོ་སེར་པོའོ། །ནུབ་ཏུ་སྟོབས་རྒྱུ་དམར་པོ་སྟེ། །ལྷོར་ནི་པདྨ་སྔོན་པོའོ། །དབང་ལྡན་དུ་ནི་པདྨ་ཆེ། །དཀར་སེར་དུ་ནི་བསྒོམ་པར་བྱ། །མེ་མཚམས་སུ་ནི་དུང་སྐྱོང་དཀར་སྔོའོ། །བདེན་བྲལ་དུ་ནི་རིགས་ལྡན་སྔོ་དམར་པོ། །རླུང་མཚམས་ འཁྱིལ་པ་དམར་སེར་པོ།།དེ་ལྟར་ཀླུ་བརྒྱད་བསམ་པ་ནི། །མཆོད་དང་གཏོར་མ་ལ་སོགས་བྱ། །དེ་དུས་རྡོ་རྗེ་མཁའ་འགྲོ་རུ། །དུག་སེལ་བ་ཡི་དུས་འདི་རུ། །བདག་ཉིད་ལྷ་ཡི་རྣལ་འབྱོར་བྱ། །ཆོ་ག་བསྐྱེད་ཚུལ་ཐབས་དང་མཐུན། །རྨ་བྱའི་སྒྲ་ཡི་ཆུན་པོ་ཡིས། །མགོ་ བོ་ལ་སོགས་ལུས་ཀུན་ལ།།བྱབ་ཅིང་མན་ངག་སྦྱོར་ཤེས་བྱའོ། །རྐང་མཐིལ་བར་དུ་དྲངས་ནས་ནི། །བུམ་པའི་ནང་དུ་དབོ་བར་བྱ། །ལྷ་གསལ་ལ་སོགས་མན་ངག་བྱ། །ོཾ་ཧྲི་ཏནྡ་ར་ཧཱུཾ་ཕཊ་སྭཱ་ཧཱ། ཞེས་བྱ་བ་མན་ངག་ཏུ། །ཧཱུཾ་གསུམ་ཕཊ་གསུམ་ཤེས་པར་བྱ། །ོཾ་ བཱ་སུ་ཀི་ཧྲི་ཏནྡ་ར་སྭཱ་ཧཱ།ོཾ་ཏཀྵ་ཀ་ཧྲི་ཏནྡ་ར་སྭཱ་ཧཱ། ཕཊ་ཕཊ་ཕཊ་སྭཱ་ཧཱ། ཨོཾ་ཀརྐོ་ཊ་ཧྲི་ཏནྡ་ར་སྭཱ་ཧཱ། ཨོཾ་པདྨ་ཏྲི་ཏནྡ་ར་སྭཱ་ཧཱ། ཨོཾ་མ་ཧཱ་པདྨ་ཧྲི་ཏནྡ་ར་སྭཱ་ཧཱ། ཨོཾ་ཤཾ་ཁ་པཱ་ལ་ཧྲི་ཏནྡ་ར་སྭཱ་ཧཱ། ཨོཾ་ཀུ་ལི་ཤ་ལཾ་ཧྲི་ཏནྡ་ར་སྭཱ་ཧཱ། ཨོཾ་ཧུ་ལུ་ཏ་ཀེ་ལི་ཧྲི་ཏནྡ་ར་སྭཱ་ཧཱ། ཨོཾ་ཧྲི་ཏནྡ་ ར་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ། མུ་ཀ་ས་ནིརྦ་ཤིཾ་ཀུ་རུ་ཧཱུཾ་ཕཊ་སྭཱ་ཧཱ། ཨོཾ་བ་སུ་ཀི་ཧྲྀ་ཏནྡ་རེ་དེ་བ་དཏྟ་ནིརྦ་ཤིཾ་ཀུ་རུ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། བསྙེན་བསྒྲུབ་ལ་སོགས་བྱ་བ་ཡང་། །སྔགས་ཀྱི་དབྱེ་བ་ལ་སོགས་ཀྱང་། །མན་ངག་ཅན་གྱིས་སྦྱོར་ཤེས་བྱ། །དུག་ཕྲོགས་འོ་མ་ནག་པོར་ འགྱུར།།དེ་འོག་ཡུངས་ཀར་ལ་སོགས་ཀྱིས། །སྔགས་བཟླས་པས་སུ་བརྡེག་པར་བྱ། །བརྡེགས་པ་ཙམ་གྱིས་བསྒྲུབ་བྱ་ཡི། །སྙིང་ནི་འབར་བ་ལ་སོགས་འགྱུར། །དེ་ཡི་སྙིང་གར་ཡི་གེ་ཧཱུཾ། །བསྒོམས་པས་རྣམ་ཤེས་བཅིངས་ཤིང་གཟུང་ས། །དེ་ཙམ་གྱིས་ནི་དབུགས་གཡོ་ འགྱུར།།བདག་གི་སྣ་སྒོའི་འོད་ཟེར་གྱིས། །མཆེ་བས་ཟིན་པའི་སྣ་སྒོར་ཐིམ། །ལུས་བཀང་བས་ནི་རྐང་ལག་འདར། །དེ་ནས་ཧཱུཾ་གི་གླུ་བླང་བྱ། །དེ་ཡང་སྔོན་དུ་སེ་གོལ་གཏོགས། གསུམ་གྱི་སྒྲ་ཡིས་ལྡང་བར་འགྱུར། །ལངས་ནས་རྡོ་རྗེ་མཁའ་འགྲོ་བསྒོམ། །ཡན་ལག་ཐམས་ཅད་ བསྲུང་བར་བྱའོ།།ཀླུ་སྨན་དཀར་གསུམ་སྣ་ཚོགས་ཀྱིས། །མཆོད་དང་གཏོར་མ་ཀླུ་ལ་ཤིས། །དེ་སོགས་སྦྱོར་བ་གཞན་ཡང་། །སློབ་དཔོན་མཁས་པས་སྦྱོར་ཤེས་བྱ། །དུག་གིས་ཟིན་པའི་གནས་བསྟན་པ། །ཁ་དང་སྨིན་མ་རྐན་དང་ནི། །སྣ་རྩེ་སྣ་སྒོ་མཚན་ མ་དང་།།བཤང་བ་མཐེ་བོང་གཟུང་བ་རྣམས། །གསོ་རུ་མི་རུང་སྤང་བར་བྱ། །རིགས་ལྡན་མགོ་བརྒྱ་གཙིགས་པ་དང་། །ཀ་མ་ལ་ནི་དུག་གི་མཆེ་བ་སྟེ། །བཞིས་ཟིན་པ་ནི་འཆི་བར་འགྱུར། །ལྷག་མ་རྣམས་ནི་གསོར་རུང་བས། །རྣལ་འབྱོར་སྙིང་རྗེ་དང་ལྡན་པ། །དབང་ བསྐུར་མན་ངག་ལྡན་པ་ཡིས།།ཆོ་ག་གཞུང་བཞིན་བྱས་པ་དང་། །གཞན་སྒྲོལ་སྟོབས་ཀྱིས་བདག་ཀྱང་སྒྲོལ། །དངོས་གྲུབ་ཀྱང་ནི་ཐོབ་པར་གསུངས། །དེ་བས་བརྩོན་འགྲུས་བསྐྱེད་དེ་བསྒྲུབ། །མཆོད་བསྟོད་ལ་སོགས་བྱས་ནས་ནི། །ལྷ་གཤེགས་ཏིང་འཛིན་བསྡུ་བར་བྱ། ། དེ་འོག་སྨོན་ལམ་གདབ་བྱ་བ། །དཔེར་ན་སྨན་རྣམས་མཐུ་ཡིས་ནི། །རྫས་ཀྱི་དུག་ནི་འཇོམས་པ་བཞིན། །དེ་བཞིན་ཀླུ་ཡི་དུག་རྣམས་ནི། །སྔགས་ཀྱི་མཐུས་སུ་འཇོམས་པར་འགྱུར། །རྣམ་པར་རྟོག་པའི་དུག་རྣམས་ནི། །ཡེ་ཤེས་མཐུ་ཡིས་འཇོམས་པར་འགྱུར། །རྫས་ཀྱི་མཐུ ཡི་སྟོབས་རྣམས་ཀྱིས།།དུག་རྣམས་མ་ལུས་ཞི་གྱུར་ཅིག་།སྔགས་ཀྱི་མཐུ་ཡི་སྟོབས་རྣམས་ཀྱིས། །དུག་རྣམས་མ་ལུས་ཞི་གྱུར་ཅིག་།ཡེ་ཤེས་མཐུ་ཡི་སྟོབས་རྣམས་ཀྱིས། །དུག་རྣམས་མ་ལུས་ཞི་གྱུར་ཅིག་།དུག་རྣམས་ཞི་བྱེད་མཐུ་ཡིས་ནི། །ཐམས་ཅད་བྱང་ཆུབ་ཐོབ་པར་ ཤོག་།དུག་ཞི་བར་བྱེད་པའི་སྦྱོར་ཀ་སྟེ་ཉི་ཤུ་པའོ།། །།བཅོམ་ལྡན་འདས་རྡོ་རྗེ་འཛིན་པ་ལ་ཕྱག་འཚལ་ལོ། །དགུག་པ་ལ་སོགས་སྦྱོར་བ་གཞན་ཡང་བསྟན། །ལྷ་བསྐྱེད་སྦྱོར་བ་རྫོགས་ནས་ནི། །སྔགས་རྣམས་སོ་སོའི་མཐའ་ལ་ནི། །དགུག་པའི་ཡི་གེ་གདགས་པར་བྱ། ། ཡང་ནཱ་ག་རཱ་ཛཱ་ཛ་ཛ་ཞེས་པས། ཐུན་མོང་གི་སྔགས་སུ་ཤེས་པར་བྱའོ། །སྔགས་ཀྱི་ཡི་གེའི་འོད་ཟེར་གྱིས། །གང་འདོད་གནས་ནས་བཀུག་ནས་ནི། །ཤིང་ཆེན་དག་གི་སྡོང་པོ་ལ། །ཤིང་གི་ཆོལ་ནི་ཕྱུང་ནས་སུ། གྲོ་ག་དག་ལ་ཀླུ་གཟུགས་བྲི། །འོད་ཟེར་འཕྲོས་པས་དེ་ལ བཀུག་།དེ་ནས་ཤིང་ཆེན་ནང་དུ་གཞུག་།ཁ་བཅད་ཚོན་གྱི་སྐུད་པས་བཅིང་། །ཐལ་སོགས་འདག་པས་ཞལ་ཞལ་བྱ། །ཡང་ན་ཕ་བོང་ལ་གོང་མ་བཞིན་དུ་ཤེས་པར་བྱའོ། །དེ་ལྟར་མི་བྱ་བསྐྲད་པ་ནི། །ཤིང་ཤུན་ལ་སོགས་དག་ལ་ནི། །རླུང་ངམ་ཤ་བའི་གཟུགས་བྲིས་ལ། །དེ་ཡི སྟེང་དུ་བསྒྲུབ་བྱའི་གཟུགས།།གང་འདོད་པས་ནི་བྲིས་ནས་བཞག་།རྩ་སྔགས་མཐའ་ལ་བསྐྲད་སྔགས་གདགས། །གང་ལྟར་འདོད་པའི་ས་ཕྱོགས་སུ། །སྔགས་ཀྱི་འོད་ཟེར་སྟོབས་ཀྱིས་འཕང་། །གོང་གི་སྦྱོར་བས་བཀུག་ནས་སུ། །གྲུ་གསུམ་ནག་པོའི་བྲུབ་ཁུང་ དུ།།ནག་པོའི་སྦྱོར་བས་ཁ་བཅད་ལ། །རི་རབ་གཟུགས་བྲི་མནན་པར་བྱའོ། །ལྷ་རྣམས་བཅུ་བདུན་སྟང་སྟབས་ཀྱིས། །ཇི་ཙམ་འདོད་པར་མནན་པར་བྱའོ། །གསང་བར་འདོད་པའི་སྦྱོར་ཀ་ཡིས། །གཟུགས་བརྙན་ལ་སོགས་གོང་བཞིན་བཅའ། །བསྙེན་པ་ལ་སོགས་རྫོགས་ པ་ཡིས།།གསང་སྔགས་ལ་སོགས་ཤེས་བྱས་ལ། །མཚོན་ཆ་ཕྱག་མཚན་བྱིན་བརླབས་ལ། །ཁྲོ་བོ་མཚོན་ཆ་ཐོགས་པ་ཡིས། །ལུས་རྣམས་གཏུབ་ཅིང་གསོད་བར་བསམ། །ཡང་ན་འཁྲུལ་འཁོར་སྦྱོར་བ་བྱ། །ཡང་ན་སྔགས་ཀྱི་འོད་ཟེར་གྱིས། །གང་འདོད་པར་ནི་བསྲེག་པར་ བྱ།།ཡང་ན་སྦྱིན་སྲེག་དག་གིས་བྱ། །དམ་ལ་མ་ཐོགས་ཀླུ་རྣམས་ནི། །སྒྲུབ་པ་པོ་ལ་བར་ཆད་བྱེད། །དང་པོ་ཞི་བས་གདུལ་བར་བྱ། །ཞི་བས་འདུལ་བར་མ་གྱུར་ན། །དེ་ལ་དྲག་པོའི་ལས་རྣམས་བརྩམ། །དམ་ལ་ཐོགས་པའི་ཀླུ་རྒྱལ་ནི། །བསྟེན་ཅིང་བསྒྲུབས་ན་དངོས་གྲུབ་སྟེར། ། བདེ་གཤེགས་སྤྲུལ་པ་བསྒྲུབས་ན་ནི། །དངོས་གྲུབ་མཆོག་ཀྱང་སྟེར་བར་བྱེད། །ཀླུ་རྒྱལ་དེ་བསྒྲུབ་སྦྱོར་བ་ཡང་། །སྔོན་འགྲོ་ཆོ་ག་རྫོགས་ནས་ནི། །དེ་ནས་སྟོང་པ་ཉིད་དུ་བསྒོམ། །སྟོང་པའི་ངང་ལས་པད་ཟླའི་གདན། །དེ་སྟེང་ཆོ་ག་གསུམ་གྱིས་བསྐྱེད། །ལྷག་པའི་ལྷ་ནི་གང འདོད་བསྐྱེད།།གཞན་དག་སྤྲུལ་པའང་གང་འདོད་པ་ཡང་ཡོད། །མདུན་དུ་པད་ཟླའི་གདན་སྟེང་དུ། །ཆོ་ག་གསུམ་མམ་སྐད་ཅིག་སྦྲུལ། །སྐུ་མདོག་དཀར་པོ་སྦྲུལ་ཞགས་བསྣམས། །ཀླུ་རྒྱལ་དེ་འདྲ་སྤྱན་དྲངས་བསྟིམ། །མཆོད་བསྟོད་ལ་སོགས་རྫོགས་བྱས་ལ། །དེ་ནས་ གང་ཡིན་བཟླས་བརྗོད་བྱ།།ཀླུའི་ཆོ་གའི་སྦྱོར་ཀ་སྟེ་ཉི་ཤུ་གཅིག་པའོ།། །།བཅོམ་ལྡན་འདས་རྡོ་རྗེ་འཛིན་པ་ལ་ཕྱག་འཚལ་ལོ། །རྣལ་འབྱོར་བསྙེན་པ་རྫོགས་པ་ཡིས། །འཁྲུལ་འཁོར་རིམ་པ་བརྩམ་པར་བྱ། །དང་པོ་ལས་བཞིའི་རིམ་པ་ནི། །ཞི་བ་གོ་རོ་ཙ་ ན་བླང་།།གྲོ་གའམ་སྨྱུག་མའི་ཤུན་པ་ལ། །རྩ་སོགས་དཀར་པོ་མ་ཡིན་སྤངས། །ཞི་བ་འདོད་པའི་སྨྱུ་གུ་ཡིས། །བསྒྲུབ་བྱ་སྒྲུབ་བྱེད་འཁོར་ལོ་བྲི། །འཁོར་ལོའི་དཀྱིལ་འཁོར་བྲི་བ་ནི། །བརྒྱད་དང་བཅུ་གཉིས་བཅུ་དྲུག་བྲི། །ཤེས་རབ་ཆོ་གས་ཡང་དག་བྲི། །ཡང་ན་གཅིག་ དང་གཉིས་སུ་བྱ།།སྔགས་ནི་ཐམས་ཅད་དགོད་པ་དང་། །གཅིག་དང་གཉིས་སུ་དགོད་པའོ། །ཡི་གེ་རེ་རེ་དགོད་པ་དང་། །ཐམས་ཅད་རྫོགས་པར་དགོད་པའོ། །ཤར་ནས་བརྩམས་ཏེ་བྲི་བར་བྱ། །དེ་མ་ཐག་ཏུ་དོར་བ་ཡང་། །བསྒྲུབ་བྱའི་མིང་དང་ནཱ་མ་དང་། །བསྐུལ་བའི་ཚིག་ དང་བཅས་པ་བྲི།།རྡོ་རྗེ་འཛིན་པའི་སྦྱོར་བ་ཡིས། །ཡི་གེ་ཧཱུཾ་གི་འོད་ཟེར་ལས། །སྔོན་པོའི་དཀྱིལ་འཁོར་སྤྱན་དྲངས་ནས། །མཆོད་བསྟོད་བསྙེན་པ་བྱས་ནས་སུ། །དཀྱིལ་འཁོར་ཉིད་ལ་གཞུག་པར་བྱ། །བྱིན་དང་ལྡན་པའི་ལྷ་ཉིད་ནི། །ཡི་གེའི་གཟུགས་ལས་འཕྲོས་པས་ན། ། དཀར་པོ་དོན་བྱེད་བརྟུལ་ཞུགས་ཅན། །མར་དང་སྦྲང་རྩི་དབུས་དཀར་ནས། །སྐུད་པ་དཀར་པོས་བཅིང་བར་བྱ། །མེ་ཏོག་དཀར་པོས་ཐུན་གསུམ་དུ། །ཞི་བའི་སེམས་ཀྱིས་གཏོར་བར་བྱ། །བདག་ཉིད་སྔོན་པོའི་དཀྱིལ་འཁོར་ནི། །བསྐྱེད་པའི་རིམ་པ་གང་འདོད་བྱ། །ཞི་བའི དཀྱིལ་འཁོར་དཀར་པོ་ལ།།དེ་ཡི་མདུན་དུ་བསྒྲུབ་བྱ་ནི། །པདྨ་ཟླ་བར་གནས་པ་སྟེ། །ཁོ་དོག་དཀར་པོ་ཟླ་བའི་མདངས། །བསྒྲུབ་བྱ་གནས་པར་མཐོང་ནས་ནི། །བུམ་པ་དཀར་པོའི་ཟླ་བའི་མདངས། །བདུད་རྩི་ལྔས་ནི་བཀང་བ་ཡིས། །དབང་བསྐུར་བ་ནི་བསམ་པར་བྱ། །རྫོགས་སངས་ རྒྱས་པ་གྲངས་མེད་དབང་།།ཐོབ་ནས་བསྒྲུབ་བྱ་གང་ཡིན་ལ། །བདུད་རྩི་སྤྱི་བོར་བླུགས་པར་བྱ། །བདག་ཉིད་སྔོན་པོའི་སྦྱོར་བ་ཡིས། །སྔགས་ཀྱི་འོད་ཟེར་སྤྲོས་པ་ལས། །བསྒྲུབ་བྱའི་མི་མཐུན་ཞི་བར་བྱ། །དེ་ནས་བཟླས་པ་བརྩམ་པར་བྱ། །ོཾ་ན་མོ་ནཱི་ལཱམྦ་ར་དྷར་བཛྲ་པཱ་ཎི་ཧཱུཾ་ཕཊ་སྭཱ་ཧཱ། ཆེ་གེ་མོ་ཞི་བར་གྱིས་ཤིག་།ན་མ་སྭཱ་ཧཱ། དུག་ནི་ཞི་བར་འདོད་པ་ནི། །གུར་གུམ་དག་གིས་འཁོར་ལོ་བྲི། །དཀར་པོའི་ཕྱོགས་ཀྱི་ཚེས་གཅིག་ནས། །ནག་པོའི་གཅིག་ཏུ་ལས་རྣམས་འགྲུབ། །དེ་ལྟར་རྣལ་འབྱོར་སྒྲུབ་པ་པས། །འཁོར་ལོའི་མན་ངག་ཡོད་པ་ན། །ཐེ་ཚོམ་མེད་པར བྱས་ནས་ནི།།སྔགས་ནི་ནན་ཏན་ཆེར་བསྐྱེད་ན། །ངེས་པ་ཁོ་ནར་འགྲུབ་པར་འགྱུར། །ཞི་བའི་འཁྲུལ་འཁོར་གྱི་སྦྱོར་ཀ་སྟེ་ཉི་ཤུ་གཉིས་པའོ།། །།བཅོམ་ལྡན་འདས་རྡོ་རྗེ་འཛིན་པ་ལ་ཕྱག་འཚལ་ལོ། །དེ་ནས་གཞན་ཡང་རྒྱས་པ་ཡི། །ཐམས་ཅད་སྔོན་བཞིན་བྱས་ནས་ནི། ། སྔགས་ནི་ཐམས་ཅད་དགོད་པ་ན། །མི་དགོད་པ་ནི་སྔོན་བཞིན་བྱ། །འཁོར་ལོ་ཡང་ནི་སྔོན་བཞིན་ནོ། །སྟོང་པའི་མཚམས་ནི་བླངས་ནས་སུ། །མིང་དང་བསྐུལ་ཚིག་སྭཱ་ཧཱ་སྤེལ། །གཞི་ནི་གྲོ་གའམ་རས་ལ་བྱ། །གུར་གུམ་ཁ་ཆེ་སྐྱེས་ལ་སོགས། །གང་འདོད་པ་ཡིས་བྲི་བར་བྱ། །ཁམ པོར་སེར་བོར་ཁ་སྦྱར་ནས།།སྐུད་པ་སེར་པོས་བཅིང་བར་བྱ། །བདག་ཉིད་རྒྱས་པའི་ལྷ་ཉིད་དུ། །བསྐྱེད་པ་ལ་སོགས་རྫོགས་པར་བྱ། །ཡི་གེ་ཧཱུཾ་ནི་སེར་པོ་ཡིས། །ལྕགས་ཀྱུའི་དབྱིབས་འདྲ་སྤྲོས་ནས་ནི། །རྒྱས་པའི་དཀྱིལ་འཁོར་བཀུག་ནས་ནི། །སྔོན་བཞིན་མཆོད་པ་ལ་སོགས་ བྱ།།དེ་ནས་འཁྲུལ་འཁོར་དག་ལ་བསྟིམ། །བྱིན་དང་ལྡན་པའི་ལྷ་རྣམས་ནི། །ཡི་གེའི་གཟུགས་ལས་འོད་འཕྲོས་པས། །སེར་པོའི་བྱེད་པ་བརྟུལ་ཞུགས་ཅན། །མར་དང་སྦྲང་རྩིས་སྣོད་བཀང་ལ། །སྐུད་པ་སེར་པོས་བཅིང་བར་བྱ། །མེ་ཏོག་སེར་པོས་ཐུན་གསུམ་དུ། །རྒྱས་པའི་ སེམས་ཀྱིས་གཏོར་ཞིང་མཆོད།།བདག་ཉིད་སྔོན་པོའི་དཀྱིལ་འཁོར་ནི། །ཆོ་ག་གང་འདོད་ལ་སོགས་བྱ། །ཡི་གེའི་གཟུགས་སུ་མཐོང་བྱས་ལ། །བསྒྲུབ་བྱའི་མི་མཐུན་རྒྱས་བྱས་ཏེ། །མེ་ཏོག་སེར་པོ་དུས་སུ་མཆོད། །ལྷ་ཡི་རྣལ་འབྱོར་ཤེས་པ་ཡིས། །ཐམས་ཅད་རྫོགས་ནས་ དཀྱིལ་འཁོར་ལ།།པདྨ་ཟླ་བའི་གདན་སྟེང་དུ། །བསྒྲུབ་བྱ་སེར་པོ་མདུན་བསམས་ལ། །གསེར་སོགས་བུམ་པས་དབང་བསྐུར་བྱ། །རྒྱས་པའི་མི་མཐུན་སྐྱོན་རྣམས་ནི། །བཀྲུ་ཞིང་དེ་ཉིད་རྒྱས་པར་བསམ། །སྔོན་དུ་གསུངས་པའི་ས་བོན་ལས། །མེ་ཏོག་སེར་པོས་དུས་ གསུམ་དུ།།སྔགས་བཟླས་སྐྱོན་རྣམས་སྦྱང་བར་བསམ། །ོཾ་ན་མོ་ནཱི་ལཱམྦ་ར་དྷ་ར་བཛྲ་པཱ་ཎི་ཧཱུཾ་ཆེ་གེ་མོ་རྒྱས་པར་གྱིས་ཤིག་སྭཱ་ཧཱ། རྒྱས་པའི་དུས་ནི་ཡང་དག་བསྟན། །ཉ་དང་དེ་བཞིན་རྒྱས་པའི་ཉ། །དེ་ཡི་དུས་སུ་ཡང་དག་སྦྱར། །རྒྱས་ པའི་ལས་ནི་འདི་དག་ལ།།རྣལ་འབྱོར་ཅན་གྱིས་བརྩོན་པར་བྱའོ། །རྒྱས་པའི་འཁྲུལ་འཁོར་གྱི་སྦྱོར་ཀ་སྟེ་ཉི་ཤུ་གསུམ་པའོ།། །།བཅོམ་ལྡན་འདས་རྡོ་རྗེ་འཛིན་པ་ལ་ཕྱག་འཚལ་ལོ། །དེ་ནས་དབང་གི་འཁྲུལ་འཁོར་འདི། །གྲཱ་བ་དམར་པོའི་རྫས་རྣམས་ལ། །འཁོར་ ལོ་གཉིས་ནི་སྔོན་བཞིན་བྲི།།སྔགས་སོགས་དགོད་པ་སྔོན་བཞིན་བྱ། །བསྙེན་པ་ཡང་ནི་སྔོན་བཞིན་བྱ། །རྒྱ་སྐྱེགས་ཙནྡན་ཁུ་བའམ། །སྲིན་ལག་ཁྲག་གིས་བྲི་བར་བྱ། །ཁམ་ཕོར་ནག་པོ་ལ་སོགས་མིན། །ཁ་སྦྱར་འཁོར་ལོ་གཞུག་པར་བྱ། །སྦྲང་རྩི་མར་གྱིས་ བཀང་ནས་སུ།།སྐུད་པ་དམར་གྱིས་བཅིང་བར་བྱ། །ལྷ་ཡི་རྣལ་འབྱོར་ལྡན་པ་ཡིས། །འོད་འཕྲོས་སྤྱན་དྲངས་སྔོན་བཞིན་མཆོད། །དེ་ནས་འཁོར་ལོ་དག་ལ་བསྟིམ། །དབང་དུ་བྱེད་པའི་ལྷ་རྣམས་ནི། །སྔགས་ཀྱི་གནས་སུ་ནུས་མཐུ་ཅན། །འོད་ཟེར་དམར་ པོའི་སྦྱོར་བ་ཡིས།།བསྒྲུབ་བྱ་དབང་དུ་བྱ་བར་བསམ། །མེ་ཏོག་དམར་པོས་དུས་གསུམ་མཆོད། །ཆོ་ག་ལས་བསྐྱེད་རྡོ་རྗེ་འཛིན། །དམར་པོ་ཁ་དོག་དབང་དུ་བྱེད། །ནུབ་ཕྱོགས་ངོས་སུ་ཁ་བལྟས་ལ། །ཟླ་བ་དམར་པོ་དག་ལ་ནི། །བསྒྲུབ་བྱ་བསམ་པར་ བྱས་ནས་ནི།།སྙིང་གའི་ཡི་གེའི་འོད་ཟེར་གྱིས། །བསྒྲུབ་བྱ་གནས་ནས་བཀུག་བསམས་ལ། །ཁྲི་ཡི་སྔགས་ནི་བཟླས་པར་བྱ། །བསྒྲུབ་བྱའི་ལུས་ལ་ཕོག་གྱུར་པས། །དེ་ཡི་སེམས་ནི་ཡེངས་གྱུར་ནས། །ཞབས་ཀྱི་དྲུང་དུ་འགྱེལ་བར་བསམ། །སྐྲ་གྲོལ་བ་ ལ་གོས་མེད་པ།།ཤིན་ཏུ་གཡེང་བའི་བསྒྲུབ་བྱ་བསམ། །དབང་དུ་མི་འགྱུར་གང་ཡང་མེད། །ོཾ་ནཱི་ལཱམྦ་ར་དྷ་ར་བཛྲ་པཱ་ཎི་མ་ཧཱ་ཙཎྜ་རོ་ཥ་ཎ་ཧཱུཾ་ཧཱུཾ་ཕཊ། ཆེ་གེ་མོ་དབང་དུ་བགྱིས་པས་མ་ཡ་ཧོ། །གང་དག་དབང་དུ་མི་འགྱུར་བ། །ཁ་ཏི་མ་ཡི་མེ་ནི་དུ་བ་ མེད།།སྔགས་བཟླས་འཁྲུལ་འཁོར་ལ་ནི་བསྲོ། །ལས་སུ་བྱ་བ་དུས་བསྟན་པ། །ནག་པོའི་བརྒྱད་ནས་བརྩམས་ནས་ནི། །དེ་བཞིན་ནག་པོའི་བརྒྱད་ཀྱི་བར། །བརྟུལ་ཞུགས་ཅན་གྱིས་དབང་ལ་སྦྱོར། །དེ་བཞིན་དབང་གི་འཁྲུལ་འཁོར་ལ། །རྣལ་འབྱོར་ཅན་གྱིས་ བརྩོན་པར་བྱའོ།།དབང་གི་འཁྲུལ་འཁོར་གྱི་སྦྱོར་ཀ་སྟེ་ཉི་ཤུ་བཞི་པའོ།། །།བཅོམ་ལྡན་འདས་རྡོ་རྗེ་བསྣམས་ལ་ཕྱག་འཚལ་ལོ། །དྲག་པོ་ཡི་ནི་འཁྲུལ་འཁོར་དག་།དུར་ཁྲོད་དག་གི་རས་མ་ལ། །སྐེ་ཚེ་ནི་མ་པའི་བྱེ་བྲག་གིས། །ཚ་བ་གསུམ་གྱི་ མར་དང་དུར་ཁྲོད་སོལ།།ད་དུ་ར་དང་གཏུམ་པོའི་ས་བོན་དང་། །ཁྲོ་མཛུབ་ཁྲག་དང་ཙི་ཏ་ཁུ་བ་དང་། །བྱི་བྲུན་གྱི་ནི་འཇིམ་པ་བླང་། །གཏུམ་བྱེད་ཀྱི་ནི་ཕྲུ་བའི་ཆུས། །ལྟོགས་ཆེན་སྒྲོ་ཡི་སྨྱུ་གུ་ཡིས། །བདག་ཉིད་ལྷ་ཡི་རྣལ་འབྱོར་ལྡན། །གཏུམ་པོ་ ཁྲོས་པའི་ས་བོན་གྱིས།།བརྟུལ་ཞུགས་ཅན་གྱིས་འཁོར་ལོ་བྲི། །བཅུ་ཡི་ཉི་མ་ཕྱེད་ན་བྲི། །སྔགས་ལ་སོགས་པ་དགོད་པ་ནི། །སྔོན་དུ་གསུངས་པའི་རྣམ་པ་ནི། །དེ་ནས་སྟོང་པའི་ལེའུ་ཚེ་རྣམས། །མིང་དང་བསྐུལ་ཚིག་ཧཱུཾ་ཕཊ་ལྡན། །རྣལ་འབྱོར་ ཁྲོས་པའི་གཟུགས་ཅན་གྱིས།།འོད་ཟེར་འཕྲོས་པས་ལྷ་རྣམས་དགུག་།ཆོ་ག་ལ་སོགས་བྱས་པ་ལ། །དེ་ནས་བཀུག་སྟེ་འཁོར་ལོར་གཞུག་།གསོད་དང་ལྡན་པའི་ཁྲོ་བོ་ནི། །ནུས་དང་ལྡན་པའི་ཡི་གེ་རྣམས། །གདུག་པའི་ཚོགས་ཀྱིས་གསད་ པར་བྱ།།དེ་ལྟར་བྱིན་གྱིས་བརླབ་པར་བྱ། །བྱི་བྲུན་འཇིམ་པ་གཏུམ་བྱེད་ཆུས། །ཁམ་ཕོར་སྦྱར་ཞིང་དགང་བར་བྱ། །མེ་ཏོག་ནག་པོས་དུས་གསུམ་མཆོད། །བདག་ཉིད་ཁྲོས་པའི་རྣལ་འབྱོར་གྱིས། །ལྷོ་ཕྱོགས་ཁ་བལྟས་བསྒྲུབ་བྱ་མདུན། །འབྲུབ་ ཁུང་ལ་སོགས་མན་ངག་རྫོགས།།གཟུགས་བརྙན་མདུན་དུ་བཞག་ནས་ནི། །གསོད་པའི་མན་ངག་ལ་སོགས་བྱ། །གནས་དེར་བདག་ཉིད་སྦྱོར་ལྡན་པས། །རྒྱལ་རིགས་ཐོད་པའམ་གཞན་ཡང་རུང་། །ནང་གི་འབྲུ་དང་སྨན་དག་དང་། །གླིང་རྟ་མི་ཁྲག་ཐོད་པ་བཀང་། ། བཀང་སྟེ་ཐོད་པ་གསུམ་སྒྱེད་བཞག་།དུར་ཁྲོད་དག་གི་རོ་ཤིང་བསྐུལ། །ཁྲོས་པའི་མེ་ཡིས་བསྐུལ་བར་བྱ། །དུར་ཁྲོད་རས་མར་བསྒྲུབ་བྱའི་མིང་གཟུགས་བྲི། །སྟེང་གི་ཐོད་པ་བཅུག་སྟེ་བཞག་།ཐོད་པ་ཁ་སྦུབ་ཐལ་བ་ཕྱོགས་སུ་གཏོར། །འདིས་ནི་ངེས་པར་གསོད པར་འགྱུར།།ཡང་ན་གཞན་སོགས་སྦྱོར་བ་ནི། །མཁས་པ་ཡིས་ནི་ཤེས་པར་བྱ། །ོཾ་ནཱི་ལཱམྦ་ར་དྷ་ར་བཛྲ་པཱ་ཎི་མཧཱ་ཡཀྵ་སེ་ནཱ་པ་ཏ་ཡེ་ཧཱུཾ་ཧཱུཾ་ཕཊ་ཕཊ། དེ་བ་དཏྟ་མཱ་ར་ཡ་ཧཱུཾ་ཕཊ། དྲག་པོའི་འཁྲུལ་འཁོར་གྱི་སྦྱོར་ཀ་སྟེ་ཉི་ཤུ་ལྔ་པའོ།། །།བཅོམ་ལྡན་འདས་རྡོ་རྗེ་འཛིན་པ་ལ་ ཕྱག་འཚལ་ལོ།།དེ་ནས་བསྐྲད་པའི་འཁྲུལ་འཁོར་བརྩམ། །དུར་ཁྲོད་རས་མ་ཁྲུ་གང་ལ། །སྔོན་དུ་གསུངས་པའི་རྫས་རྣམས་ཀྱིས། །འཁོར་ལོའི་སྔགས་སོགས་སྔོན་བཞིན་བྲི། །སྟོང་པའི་ལེའུ་ཚེ་བླངས་ནས་ནི། །གང་མིང་བསྐུལ་བའི་སྔགས་དང་ལྡན། །བདག་ཉིད་ལྷ་ཡི་སྦྱོར་ སོགས་ལྡན།།འོད་ཟེར་འཕྲོས་ནས་སྤྱན་དྲངས་མཆོད། །གསོལ་བསྟོད་བྱས་ནས་བསྙེན་པ་བྱ། །ཁྲི་ནི་ཐོས་ནས་ནག་པོའི་ཕྱོགས། །ནག་པོའི་ཕྱོགས་ཀྱི་ཚེས་བཞི་ལ། །གསོལ་བ་བཏབ་སྟེ་བསྟོད་པ་བྱ། །ཐེམ་པའམ་རྒྱ་གྲམ་ལམ་དུ་སྦ། །བསྒྲུབ་བྱ་ཇི་སྲིད་མནན་པ་རུ། །འཐབ་ ཅིང་འཐབ་པས་དབྱེ་བར་བསམ།།གཏོར་མ་བྱིན་ནས་སྐྲོད་ཅིག་ཅེས། །གསོལ་བ་མང་དུ་གདབ་པར་བྱ། །ཁྲོས་པས་ནུབ་བྱང་ཁ་བལྟས་ཏེ། །སྔགས་བཟླས་མྱུར་བར་འབྲོས་པར་འགྱུར། །ཁྱིམ་དུ་རྟག་ཏུ་འཐབ་འབྲོས་པས། །ོཾ་ནཱི་ལཱ་མྦ་ར་དྷ་ར་བཛྲ་པཱ་ཎི་མ་ཧཱ་ཡ་ཀྵ་སེ་ནཱ་པ་ཏ་ཡེ་ཧཱུཾ་ ཧཱུཾ་ཕཊ་ཕཊ།དེ་བ་དཏྟ་ཆེ་གེ་མོ་སྐྲོད་ཅིག་དཏྟཱ་ཡ་ཧཱུཾ་ཕཊ། སྦྱོར་བའི་མན་ངག་འདི་ཡིས་ནི། །ངེས་པར་གནས་ནས་སྐྲོད་པར་འགྱུར། །སྐྲོད་པའི་སྦྱོར་ཀ་སྟེ་ཉི་ཤུ་དྲུག་པའོ།། །།བཅོམ་ལྡན་འདས་རྡོ་རྗེ་འཛིན་པ་ལ་ཕྱག་འཚལ་ལོ། །གཞན་ཡང་འཁྲུལ་འཁོར་སྦྱོར་ཀ་ནི། །གོང་དུ་ བསྟན་པའི་རྫས་རྣམས་ཀྱིས།།འཁོར་ལོ་བྲིས་ནས་ཆོ་ག་བྱ། །བཟླས་པ་ཁྲི་ནི་ཐེམ་ནས་ནི། །བྲྀ་ཏི་ཀ་ཡེ་ཤིང་ལ་གདགས། །མི་ཡི་རྗེ་ངར་བསྒྲུབ་བྱ་ཡི། །དྲི་ཆེན་དག་གིས་ཐོད་པ་དགང་། །མིང་དང་བསྐུལ་བའི་སྔགས་ལྡན་པ། །འབུམ་ཚོ་བཞི་ནི་ཐོན་པ་དང་། །ཤིང་གི་གོང་མ་ དག་ལ་གདགས།།འཁོར་ཞིང་འཁྲུག་ཅིང་མྱོས་པར་འགྱུར། །ཡང་ན་སྐད་ཅིག་ཙམ་གྱིས་འགུགས། །ོཾ་ནཱི་ལཱམྦར་དྷ་ར་མ་ཧཱ་ཡ་ཀྵ་སེ་ནཱ་པ་ཏ་ཡེ་བཛྲ་པཱ་ཎི་ཡེ་ཧཱུཾ་ཧཱུཾ་ཕཊ་ཕཊ། དེ་བ་དཏྟ་མཱ་ར་ཡ་ཧཱུཾ་ཆེ་གེ་མོ་ཛཿ། ཞེས་བྱ་བ་ཡི་སྔགས་ཀྱིས་ན། །ཇི་ལྟར་འདོད་པ་འདི་རྣམས་འགྲུབ། ། འགུགས་པ་ལ་སོགས་པའི་འཁྲུལ་འཁོར་གྱི་སྦྱོར་ཀ་སྟེ་ཉི་ཤུ་བདུན་པའོ།། །།བཅོམ་ལྡན་འདས་རྡོ་རྗེ་འཛིན་པ་ལ་ཕྱག་འཚལ་ལོ། །ལུང་བསྟན་སྦྱོར་བའི་མན་ངག་ནི། །རྒྱུད་རྣམས་ཀུན་དང་མི་འགལ་བའི། །མཁའ་འགྲོ་མ་ཡིས་རྒྱས་བཏབ་ལ། །རྣལ་འབྱོར་བླ་དམན་དོན་དུ་ནི། ། ཡང་ནས་ཡང་དུ་གསོལ་བཏབ་པས། །ཡིད་ཆེས་བྲོད་པ་བསྐྱེད་པའི་ཕྱིར། །མན་ངག་རིམ་པ་བསྟན་པ་ལ། །བླ་མ་ལས་ནི་གསན་བར་གྱིས། །གསང་སྔགས་སྒོ་ནི་དཔག་མེད་ནས། །ཐབས་ཀྱི་རིམ་པ་མང་གསུངས་པ། །སེམས་ཅན་ལས་ནི་སྣ་ཚོགས་པས། །སོ་སོའི་མོས་པ མི་མཐུན་ཕྱིར།།དཔེར་ན་སྨན་རྣམས་ནུས་པ་ཡིས། །ནད་རྣམས་སོ་སོར་སེལ་བ་བཞིན། །མན་ངག་ཐབས་རྣམས་སོ་སོས་ཀྱང་། །དུག་གི་ནད་རྣམས་འཇོམས་པར་བྱེད། །དཔེར་ན་སྨན་ནུས་གཅིག་གིས་ཀྱང་། །ཕྲད་པ་ཙམ་གྱིས་ནད་འཇོམས་པའོ། །ཡང་ན་གཉིས་ འཇོམས་གསུམ་འཇོམས་དང་།།བཞི་འཇོམས་ལྔ་འཇོམས་ལ་སོགས་དང་། །མང་པོ་འདུས་ནས་འཇོམས་པ་དང་། །དེ་དག་ཀུན་གྱིས་མ་ཆོམས་པ། །སྦྱོར་བ་གཞན་སོགས་འཇོམས་པ་དང་། །གཞན་པོ་ཁོ་ནས་འཇོམས་པ་དང་། །སྨན་དང་སྦྱོར་བ་དེ་དག་ཀྱང་། །མཁས་ པ་ཡིས་ནི་འཇོམས་པར་འགྱུར།།མི་མཁས་པ་ཡིས་གནོད་པར་འགྱུར། །སྨན་པ་མཁས་པར་གྱུར་ཀྱང་ནི། །བརྩོན་འགྲུས་ནན་ཏན་མ་བྱས་ན། །དུག་རྣམས་འཇོམས་པར་མི་འགྱུར་རོ། །དེ་བཞིན་མཐུན་པའི་དཔེ་རྣམས་ནི། །མཁའ་འགྲོ་མ་ཡིས་ལུང་བསྟན་ནས། ། ཞིབ་པས་འདི་རུ་མ་ཕྱེའོ། །བསྒོམ་པའི་སྟོབས་ཀྱིས་ཉོན་མོངས་འཇོམས། །བསྒོམས་པ་ལས་བྱུང་དངོས་གྲུབ་ཀྱིས།། མཆོག་གི་དངོས་གྲུབ་ཐོབ་པར་འགྱུར། །ཏིང་འཛིན་ཐོབ་པར་མ་གྱུར་པས། །ཚོགས་འཁོར་ཚོགས་མཆོད་དངོས་གྲུབ་བོ། །དེས་མ་བྱུང་ན་སྦྱིན་སྲེག གིས།།དངོས་གྲུབ་བསྒྲུབ་པར་གསུངས་པ་ཡིན། །དེས་མ་བྱུང་ན་བཟླས་བརྗོད་དོ། །དེས་མ་བྱུང་ན་གཏོར་མའོ། །དེ་རྣམས་ཀུན་ལ་མ་བྱུང་ན། །ལས་ཀྱི་ཕྲན་ཚེགས་གཞན་ཡང་བསྟན། །ཡང་ན་དེ་དག་ཐམས་ཅད་ཀྱང་། །གཅིག་འདུས་གཉིས་འདུས་གསུམ་འདུས་ དང་།།བཞི་འདུས་ལྔ་འདུས་ལ་སོགས་པས། །འབྱུང་བར་འགྱུར་བར་གསུངས་པ་ཡིན། །ཡང་ན་མཆོག་འདོད་པ་ལ་ནི། །ཐམས་ཅད་རྫོགས་པར་དགོས་པར་གསུངས། །ཐུན་མོང་དངོས་གྲུབ་བསྒྲུབ་པ་ལ། །ཆེ་ཆུང་གི་ནི་རིམ་པས་གསུངས། །སྦྱོར་བ་རེ་རེས་ཀྱང་ནི་འགྲུབ། །གསང་ སྔགས་ལ་ལའི་བཞེད་ཀྱིས་ནི།།དཔེར་ན་སྦྲུལ་ནི་སྨྱུ་གུར་ཞུགས། །རྩ་བར་འགྲོ་དང་རྩེ་མོར་འགྲོ། །དེ་བཞིན་རྣལ་འབྱོར་སྔགས་པ་ཡང་། །རིག་འཛིན་ས་དང་རྡོ་རྗེ་དམྱལ། །ལ་ལ་དག་གི་གཞུང་གིས་ནི། །བར་མ་དོ་ནས་འགྲོ་བའོ། །ལ་ལ་སྐྱེ་བ་ཕྱི་མ་ལ། །ལ་ལ་དག་གི་ བཞེད་ཀྱིས་ནི།།གཉིས་པ་གསུམ་པ་དག་ལའོ། །བཞི་པ་ལྔ་པར་འདོད་པའང་ཡོད། །ལ་ལ་སྐྱེ་བ་བདུན་པ་ལ། །ཕྱག་རྒྱའི་དངོས་གྲུབ་ཐོབ་པར་བཤད། །དེ་ལྟར་གཞུང་ལུགས་མི་འདྲ་བ། །མང་དུ་གསུངས་པ་དེ་དག་ཀྱང་། །འགལ་བ་མེད་དེ་ཀུན་ཀ་བདེན། །གསང་སྔགས་ ཀྱི་ནི་གཞུང་གིས་ཀྱང་།།སྐྱེ་བ་བདུན་ལས་མི་འདའ་བས། །མ་བསྒོམས་ཀྱང་ནི་སངས་རྒྱས་ས། །ཞེས་སུ་རྒྱུད་ལས་གསུངས་པ་ཡིན། །སྐྱེ་བ་བདུན་ཞེས་བྱ་བ་ཡང་། །སྔགས་པའི་བྱང་ཆུབ་སེམས་དཔའ་ཡིན། །སྔགས་དང་སྨན་ལ་སོགས་པ་ཡི། །སྟོབས་ཀྱིས་ལུས་སེམས་ལས་ རུང་བའི།།ཤ་དང་ཐོད་པ་ལ་སོགས་པ། །བསྟེན་ཅིང་ཟོས་པས་དངོས་གྲུབ་ཐོབ། །དེ་བས་སྔགས་མཐུའི་ཡོན་ཏན་ནོ། །ས་དང་ཕ་རོལ་ཕྱིན་པ་ལ། །སྐྱེ་བ་བདུན་པ་འོང་སྲིད་ཀྱང་། །དེ་ལྟ་འོང་བ་ཤིན་ཏུ་དཀོན། །སྐྱེ་བ་བདུན་པ་ཞེས་བྱའི་གནས། ཕལ་ཆེར་དུར་ཁྲོད་ཆེན་པོ་ཡི། ། མཁའ་འགྲོ་མ་ཡི་གནས་སུ་སྐྱེ། །རིག་འཛིན་ས་ཞེས་བྱ་བ་ཡང་། །གཅིག་ནི་དེ་ལ་བྱ་བ་ཡིན། །རིག་འཛིན་ས་ལ་གསུམ་ཡོད་དེ། །དུར་ཁྲོད་རིག་འཛིན་ས་དང་ནི། །བར་སྣང་ལྷ་གནས་ས་རྟེན་དང་། །མཁའ་སྤྱོད་འོག་མིན་སྟུག་པོའི་ས། །གནས་ནི་དེ་གསུམ་ཡིན་པར་གསུངས། ། སྐྱེ་བ་བདུན་པའི་གང་ཟག་ནི། །མི་ཡུལ་གནས་ནི་ཁྱད་པར་ཅན། །སྔགས་སྤྱོད་པ་ཡི་གནས་དག་ཏུ། །འགའ་ཙམ་འབྱུང་བ་དག་ཀྱང་ཡོད། །སྐྱེ་བ་གཅིག་པ་ལ་སོགས་གཞན། །དེ་རྣམས་གནས་ཀྱང་དེ་བཞིན་ནོ། །སྐྱེ་བ་བདུན་པའི་གང་ཟག་ནི། །དད་དང་སྙིང་རྗེ་ལ་སོགས ལྡན།།ཕ་རོལ་ཕྱིན་བཅུའི་ཆོས་ལ་སྤྱད། །མཐུན་འཇུག་སྤྱོད་པ་ཀུན་ལ་མཁས། །བཟོ་དང་རིག་པའི་གནས་ལ་མཁས། །ལྟ་བ་མ་ནོར་གདེང་དུ་གྱུར། །སྤྱོད་པ་ལ་དོར་ཐབས་ལ་མཁས། །མན་ངག་ཐོབ་པ་ཙམ་གྱིས་ནི། །ཐེ་ཚོམ་མེད་པར་འཇུག་པར་བྱེད། །མན་ངག་བསྒོམས་ མ་ཐག་ཏུ་ནི།།ཏིང་འཛིན་སྐྱེས་འགྱུར་རང་བཞིན་གྱིས། །ཁམས་དང་དུས་དང་བྱེ་བྲག་ཤེས། །རྒྱུད་ལུང་མཚན་གྱི་མན་ངག་ལ། །ཐོས་པ་ཙམ་གྱིས་དབུ་ཞབས་ཀྱི། །མན་ངག་རྣམས་ནི་ཁོང་དུ་ཆུད། །བཤད་པའི་རྒྱུད་དང་འགྲེལ་པ་དང་། །མངོན་པར་རྟོགས་པའི་རིམ་པ་ རྣམས།།མ་ཐོབ་པ་རུ་ཤེས་པར་འགྱུར། །དཔེར་ན་ཤིང་མཛེར་བསལ་བ་ཙམ། །རྒྱུད་ལུང་མན་ངག་མདོ་མདོ་ཡི། །མཁས་པ་ལ་ནི་བརྟེན་ནས་སུ། །ཐམས་ཅད་དོན་རྣམས་ཁོང་ཆུད་པས། །སྐབས་ཕྱེད་ཤིན་ཏུ་སྤྱི་དོན་རྒྱས། །དཀའ་འགྲེལ་མངོན་རྟོགས་རིམ་པ་ནི། །རྩོམ་ནུས་དོན་ ལ་ཤིན་ཏུ་མཁས།།མིག་ནི་ཡུན་རིངས་མི་འཛུམས་ཤིང་། །ཡི་དམ་ལྷ་བསྒོམ་དུས་སུ་ནི། །སྐྱེ་བ་བདུན་པའི་གྲིབ་མ་སྣང་། །སྐྱེ་བ་གཉིས་ལ་གྲིབ་མ་གཉིས། །གསུམ་ལ་གསུམ། བཞི་ལ་བཞི། །ལྔ་ལ་ལྔ། །དྲུག་ལ་སོགས་པ་གཞན་པོ་ལ། །གྲིབ་མའི་རྟགས་ཀྱང་དེ་བཞིན་ ནོ།།བསྒོམ་པའི་སྟོབས་ཀྱིས་ཁྱད་པར་ནི། །ཞག་བདུན་ཟླ་གཅིག་ཟླ་བདུན་དུ། །མཁའ་འགྲོ་མས་ནི་ལུང་སྟོན་ཅིང་། །ཆོས་བཤད་རྟགས་རྣམས་སྟོན་པར་མཛད། །ཆོས་སྟོན་པ་ཡི་མཛད་སྤྱོད་ཀྱང་། །དངོས་སུ་སྤྲུལ་ནས་སྟོན་པ་དང་། །ཡང་སྤྲུལ་སུམ་སྤྲུལ་ལ་སོགས་སུ། ། སྤྲུལ་ནས་སྟོན་དང་ཡང་ན་ནི། །སྐུ་ནི་མི་སྣང་སྒྲ་ཡིས་སུ། །ནམ་མཁའ་ལས་སུ་སྟོན་པ་དང་། །ཡང་ན་ཕྱག་མཚན་ལ་སོགས་ལ། །སྒྲ་བྱུང་ནས་ནི་སྟོན་པ་དང་། །ཡང་ན་རྨི་ལམ་མཚན་མས་སུ། །དུས་བཞི་དུས་གསུམ་དུས་གཅིག་ཏུ། །ཡང་ནས་ཡང་དུ་སྟོན་པའོ། །མ་ཐོས པ་ཡི་མན་ངག་རྣམས།།སྟོན་པར་བྱེད་ན་སྐྱེ་བདུན་སོགས། །སྔགས་ཀྱི་དངོས་གྲུབ་ཐོབ་པ་ཡི། །རྣལ་འབྱོར་རིག་འཛིན་བྱང་ཆུབ་སེམས། །ཡང་ན་དང་པོ་སྐྱེས་ནས་ནི། །ཐེག་ཆེན་ཆོས་ལ་མོས་ནས་ཀྱང་། །མན་ངག་བསྒོམ་ལ་ཤིན་ཏུ་དགའ། །སློབ་དཔོན་ལ་ནི་ མན་ངག་གི།།རྣ་བརྒྱུད་གཅིག་ཙམ་ཐོས་ནས་སུ། །བསྒོམས་པས་དངོས་གྲུབ་ཐོབ་པར་འགྱུར། །དེ་ནས་གོང་བཞིན་བྱུང་ནས་སུ། །གཞན་ལ་ཡང་ནི་སྟོན་པར་ནུས། །ཡང་ན་སྐྱེ་བདུན་གང་ཟག་དེ། །སྐྱེས་མ་ཐག་ཏུ་ཡི་དམ་ལྷས། །རྨི་ལམ་ལ་ནི་ཆོས་བསྟན་ནས། །མན་ངག་དེ་ བསྒོམས་དངོས་གྲུབ་ནི།།ཕྲ་མོ་དག་གིས་ཐོབ་ནས་ཀྱང་། །གཞན་ལ་ཆོས་ནི་སྟོན་པར་ནུས། །དེ་ནས་རིམ་གྱིས་གཞན་ཡང་འབྱུང་། །ཡང་ན་སྐྱེ་བདུན་གང་ཟག་དེ། །རྐྱེན་ནི་གཉིས་པོ་འཛོམ་པ་ལས། །བསྒོམ་པ་ལ་ནི་དགའ་བར་འགྱུར། །སྔོན་གྱི་བསྒོམས་པའི་སྟོབས་ཀྱིས་སུ། ། འབད་རྩོལ་དྲག་པོ་མ་བྱས་པར། །ཐུན་གཅིག་ལ་ནི་བསྒོམ་པ་རྙེད། །དེ་ནས་རིམ་གྱིས་བསྒོམས་པས་སུ། །ཞག་བདུན་ནས་ནི་ལུང་སྟོན་འབྱུང་། །དེ་ནས་རིམ་གསུམ་གོང་མ་བཞིན། །དེ་ནས་མངོན་ཤེས་དྲུག་ལྡན་ནས། །ཕྱག་རྒྱའི་དངོས་གྲུབ་ཐོབ་པར་འགྱུར། །སྔགས་པའི རྣལ་འབྱོར་ཐམས་ཅད་ཀུན།།སྐྱེ་བ་འདི་ལ་ཕྱག་རྒྱ་ཐོབ། །དེ་ལྟར་མ་གྱུར་རྣལ་འབྱོར་པ། །གོད་མ་བཞིན་དུ་སྐྱེ་བདུན་དུ། །ལེན་པའི་རྟགས་ནི་གོང་བཞིན་འབྱུང་། །སྐྱེ་བ་འདི་ཐོབ་ཚུལ་རྣམས་ཀྱང་། །ཐེག་ཆེན་སྣོད་དུ་རུང་བ་ལས། །དབང་བསྐུར་མན་ངག་ཐོབ་པ་ཡིས། །དམ་ཚིག་ མ་ཉམས་བཤགས་ལ་བརྩོན།།བསྐྱེད་རིམ་བརྟན་པར་འགྱུར་བ་ཡིས། །ལུས་ཀྱི་རྣམ་རྟོག་བཟློག་ནས་ཀྱང་། །རྡོ་རྗེ་བཟླས་ལ་བརྟན་པར་བྱ། །རྡོ་རྗེ་བཟླས་ལ་བརྟན་ནས་ཀྱང་། །དག་གི་རྣམ་རྟོག་བཟློག་ནས་ནི། །སེམས་དབེན་པ་ནི་བརྟན་པར་བྱ། །སེམས་ཀྱི་འཁྲུལ་རྟོག་ བཟློག་ནས་ཀྱང་།།སྒྱུ་མའི་ཏིང་འཛིན་ལ་གནས་ནས། །འོད་གསལ་ལ་ནི་འཇུག་པར་བྱ། །དེ་ནས་སྤྲོས་མེད་མན་ངག་ལས། །ལྷུན་གྱིས་གྲུབ་འགྱུར་ཕྱག་རྒྱའི་མཆོག་།ཡང་ན་བསྐྱེད་རིམ་ལ་བརྟེན་ནས། །ཚེ་ལ་དབང་བའི་རིག་འཛིན་སྒྲུབ། །ཚེ་ལ་དབང་བའི་རིག་འཛིན་ གྱིས།།རྫོགས་པའི་མན་ངག་བསྒོམ་པར་བྱ། །ངེས་སུ་ཕྱག་རྒྱའི་དངོས་གྲུབ་འཐོབ། །ཡང་ན་བསྐྱེད་རིམ་བརྟན་པ་ཡིས། །རྫོགས་རིམ་མན་ངག་གང་བསྒོམས་ཀྱང་། །ཟླ་བ་དྲུག་གིས་ཕྱག་རྒྱ་འཐོབ། །རྫོགས་རིམ་བསྐྱེད་པ་ལ་བརྟེན་ནས། །དེ་ནས་རྫོགས་པའི་རྫོགས་པ་ཡིས། ། ཕྱག་རྒྱའི་དངོས་གྲུབ་ཐོབ་པར་གསུངས། །དེ་ནི་སློབ་དཔོན་ཆེན་པོའི་གཞུང་། །སྤྱིར་ན་ལྟ་བ་གདེང་གྱུར་གཙོ། །ལན་ཅིག་བཟློག་པའི་ཚུལ་དུ་ནི། །བྱས་ན་ཐེ་ཚོམ་མི་སྐྱེ་ཞིང་། །ལྡོག་པར་མི་འགྱུར་འབྱུང་པོས་ཀྱང་། །ཚུགས་པར་མི་འགྱུར་འབྲས་བུ་འབྱུང་། །དེ་ལྟ་མ་གྱུར་རྣལ འབྱོར་པས།།མན་ངག་ཉམས་སུ་ལོན་པར་བྱ། །མན་ངག་བསྒོམས་པའི་སྟོབས་ཀྱིས་སུ། །མཁའ་འགྲོ་མ་ཡི་ལུང་སྟོན་པས། །ལུང་སྟོན་པ་ཡི་དུས་སུ་ནི། །ལྟ་བ་མན་ངག་ཟབ་མོ་ནི། །བསྟན་པ་བསྒོམས་པས་ཕྱག་རྒྱ་འཐོབ། །ཡང་ན་རྣལ་འབྱོར་རིམ་པ་ནི། །བློ་ཡི་རབ་ འབྲིང་ཁྱད་པར་ནི།།བག་ཆགས་རྐྱེན་ལ་སོགས་པ་ཡིས། །རབ་འབྲིང་དགུ་དང་གསུམ་དང་ནི། །དབྱེ་བར་བྱ་བའི་དོན་ཤེས་བྱ། །རྒྱུ་རྐྱེན་ཚོགས་པའི་རྣལ་འབྱོར་ནི། །སྐྱེ་བ་འདི་ལ་ལུང་སྟོན་པས། །ཕྱག་རྒྱའི་དངོས་གྲུབ་ཐོབ་པར་འགྱུར། །རྐྱེན་ནི་རབ་ཏུ་མ་གྱུར་པ། །རབ་ཀྱི་ འབྲིང་སོགས་ལྡན་པས་ནི།།བར་མ་དོ་ལ་ལུང་སྟོན་འགྱུར། །རབ་ཀྱི་ཐ་མ་ལྡན་པ་ནི། །སྐྱེ་བ་ཕྱི་མ་ལུང་སྟོན་ནོ། །འབྲིང་གི་གསུམ་པོ་རིགས་ལྡན་ཡང་། །གཉིས་དང་གསུམ་དང་བཞི་རུ་སྦྱར། །ཐ་མའི་རིགས་ལྡན་གསུམ་པོ་ཡང་། །ལྔ་དང་དྲུག་དང་བདུན་དུ་སྦྱར། །ཡང་ན་ རྐྱེན་སོགས་ལྡན་འགྱུར་ཡང་།།རྒྱུ་ལ་སོགས་པའི་ནུས་པ་རྣམས། །དྲག་ཞན་གྱི་ནི་ནུས་པ་ཡིས། །རྐྱེན་གྱི་ཚུལ་བཞིན་སྦྱོར་ཤེས་བྱའོ། །རྒྱུ་རྐྱེན་གཉི་ག་འབྲིང་སོགས་ཀྱི། །རིམ་པ་ནི་ལྡན་པ་རྣམས། །གོང་མ་གཉིས་དང་མི་མཐུན་པས། །གསུམ་དང་བདུན་དུ་སྦྱོར་ཤེས་ བྱའོ།།གཉིས་ཀ་གཞན་པར་གྱུར་པ་ནི། །གསང་སྔགས་སྣོད་དུ་མི་རུང་བས། །དབང་བསྐུར་མི་བྱ་འཇུག་པ་ཙམ། །དགེ་བའི་ས་བོན་ཆུང་འགྱུར་ཡང་། །སྨོན་ལམ་བཏབ་པའི་དད་ལྡན་ཏེ། །གསང་སྔགས་ལས་ནི་མོས་འགྱུར་ནས། །ཡང་དང་ཡང་དུ་གསོལ་འདེབས་ལ། ། ཕྱི་ཡི་དབང་བསྐུར་ཙམ་བྱས་ལ། །མི་ཟབ་དབྱིངས་ཀྱི་མན་ངག་བསྟན། །དེ་ལ་བསྟན་པའི་གང་ཟག་ལ། །ལྷག་པ་རྣམས་ནི་རིམ་གྱིས་བསྟན། །ཡང་ན་རྣལ་འབྱོར་རིམ་པ་ནི། །ཡི་དམ་ལྷ་སོགས་སོ་སོ་རུ། །སོ་སོར་བག་ཆགས་བཞག་པ་དང་། །མོས་པ་ལ སོགས་རིམ་པ་ཡིས།།ཐེ་ཚོམ་ལ་སོགས་མེད་མོད་ཀྱི། །དངོས་གྲུབ་འགྲུབ་པར་མ་གྱུར་ན། །སྒྱུ་མ་ལྟ་བུའི་འདུ་ཤེས་ཀྱིས། །ཐ་མི་དད་པར་བསྒོམས་ནས་ཀྱང་། །མན་ངག་ཡང་ཡང་སྦོས་ཀྱང་ནི། །འགལ་པ་མེད་དེ་དངོས་གྲུབ་འགྲུབ། །དེ་ལྟར་བྱས་ཀྱང་མ་བྱུང་ན། །སྒྲིབ་པ་ ཤིན་ཏུ་ཆེ་གསུངས་པས།།སྦྱིན་སྲེག་ཚོགས་འཁོར་བཟླས་བརྗོད་དང་། །གཏོར་མ་ལ་སོགས་ཆོ་ག་ཡིས། །བདུན་ནས་སྟོང་གི་བར་དུ་ནི། །མཁས་པས་ཅི་ནུས་རྒྱུད་བརྟགས་ལ། །ཆོ་གས་སྡིག་པ་བྱང་བར་གསུངས། །དཔེར་ན། །ལུས་ཀུན་ལ་ནི་གནོད་པ་ཡི། །ཚེར་མའི་ཕུང་ པོས་ལམ་རྣམས་འགགས།།མེ་ཡི་སྦྱོར་བ་མཁས་པ་ཡིས། །བསྲེགས་པས་ཐམས་ཅད་མེད་པར་བྱེད། །དེ་ནས་ལམ་ནི་བསྐྱེད་ནས་ནི། །གང་དུ་ཕྱིན་པར་འགྲོ་བར་བྱེད། །དེ་བཞིན་སྔགས་སོགས་མཐུ་རྣམས་ཀྱིས། །སྒྲིབ་པ་ལ་སོགས་བཅོམ་ནས་ཀྱང་། །ཏིང་ངེ་འཛིན་ གྱི་ལམ་བསྐྱེད་ནས།།དངོས་གྲུབ་ཀྱང་ནི་ཐོབ་པར་འགྱུར། །དངོས་གྲུབ་ཁྱད་པར་མ་ཐོབ་ན། །ཕྲ་མོ་ལ་སོགས་ཐོབ་པར་འགྱུར། །མཚན་མའི་ལུང་སྟོན་ཕྲ་མོ་འབྱུང་། །གལ་ཏེ་དེ་ལྟར་མ་གྱུར་པར། །ཚེ་དབང་མ་ཐོབ་རྣལ་འབྱོར་པས། །སྒྲིབ་པ་རྣམས་ནི་བྱང་གྱུར་ནས། །སྐྱེ་ བ་ཕྱི་མ་ལ་སོགས་སུ།།དངོས་གྲུབ་ཀྱང་ནི་ཐོབ་པར་འགྱུར། །ཡང་ན་སྔགས་ཀྱི་མཐུ་ཡིས་ནི། །སྡིག་སྒྲིབ་རྩད་ནས་མ་ཆོད་ཀྱང་། །ཆེ་ལོང་རགས་པ་མགོ་བཅོམ་ནས། །གཞན་དག་མི་སྤྱོད་མགོ་གནོན་ཅིང་། །དམ་ཚིག་མ་ཉམས་བཤགས་ལ་བརྩོན། །སྨོན་ལམ་དགེ་བ་ བསྔོ་ལེགས་པས།།སྐྱེ་བ་འདི་བརྗེས་གཞན་དག་ཏུ། །དུས་དང་གནས་དང་སློབ་དཔོན་དང་། །རིགས་དང་ཕྱག་རྒྱའི་མན་ངག་སོགས། །སྐྱེས་མ་ཐག་ཏུ་རྙེད་པར་འགྱུར། །དེ་རུ་དམ་ཚིག་ལྡན་སོགས་པས། །རིམ་གྱིས་སྐྱེ་བདུན་བརྒྱུད་ནས་སུ། །འབད་རྩོལ་དྲག་པོ་མ་བྱས་ བར།།སངས་རྒྱས་ས་ལ་འགྲོ་བར་གསུངས། །དེ་སོགས་ལུད་བསྟན་སྦྱོར་བ་རྣམས། །མཁའ་འགྲོ་མ་ཡི་ལུང་སྟོན་དུ། །རྣལ་འབྱོར་མཁས་པས་ཤེས་པར་བྱའོ། །འདིར་ནི་བློ་དམན་དོན་ཆེད་དུ། །ཅུང་ཟད་བསྡུས་ཏེ་བསྟན་པ་ཡིན། །མཁའ་འགྲོ་མ་ཡི་ལུང་བསྟན་ ཡང་།།འཇིག་རྟེན་པ་དང་འཇིག་རྟེན་འདས། །འཇིག་རྟེན་འདས་ལ་གཉིས་ཡོད་དེ། །ས་གནས་རིག་འཛིན་མཁའ་འགྲོ་དང་། །བདེ་གཤེགས་བྱིན་བརླབས་མཁའ་འགྲོའོ། །མཁའ་འགྲོ་དེ་དག་གཉིས་ཀ་ཡང་། །མཛེས་པའི་གཟུགས་དང་མི་མཛེས་པའི། །གཟུགས་དང་ སྣ་ཚོགས་སྤྲུལ་ནས་སྟོན།།དེ་ལ་འཇིགས་དང་མི་འཇིགས་དང་། །རོ་དང་དོགས་པའི་སེམས་སྤངས་ཏེ། །ཕྱག་རྒྱ་བརྡ་ལ་སོགས་པ་ཡི། །སྟོན་པའི་དུས་སུ་ལན་རྣམས་ནི། །སྟོན་པར་ཤེས་པར་མ་ནུས་ན། །དངོས་གྲུབ་མེད་དེ་ཉམས་པར་འགྱུར། །དེ་བས་ནན་ཏན་ཆེར་བསྐྱེད་ དེ།།མན་ངག་ཐོས་པ་ཆེ་བ་གཅེས། །ཐོས་པ་ཆེ་བར་མ་གྱུར་ཀྱང་། །གང་བསྒྲུབ་རྒྱུད་སྐོར་ལ་སོགས་ལ། །སློབ་དཔོན་ལ་ནི་ཡང་ནས་ཡང་། །ཐེ་ཚོམ་ཆོད་པར་མཉན་པར་བྱ། །རྒྱུད་རྣམས་ཐོས་པར་མི་ནུས་པས། །བསྒྲུབ་པའི་ཆ་རྐྱེན་བཅུ་བདུན་པོ། །ཤེས་པར་དེ་ནི་མ་བྱས་ན། ། དངོས་གྲུབ་འགྲུབ་པར་མི་འགྱུར་རོ། །སློབ་དཔོན་བླ་མ་ལ་བརྟེན་པས། །མ་ཚང་ཡང་ནི་འགྲུབ་པར་གསུངས། །འཇིག་རྟེན་པ་ལ་གཉིས་ཡོད་དེ། །རྒྱལ་བས་བཀའ་ལ་བཏགས་པ་ཡིས། །སངས་རྒྱས་བསྟན་པ་བསྲུང་བ་དང་། །བདུད་ནི་ནག་པོ་ལ་སོགས་པ། །དམ་ལ་མ་ཐོགས བར་ཆོད་མཁན།།དེ་ལྟར་གཉིས་སུ་མ་ཤེས་ན། །དངོས་གྲུབ་ཐོབ་ཀྱང་སླར་ལ་འཆོར། །དེ་གཉིས་གཟུགས་དང་རྟགས་སོགས་ཀྱང་། །གོང་མ་བཞིན་དུ་སྟོན་པས་ན། །དེ་ཡི་རིམ་པའང་གོང་བཞིན་བྱ། །དེ་ཡང་བརྟག་པའི་ཆོ་ག་ཡང་། །ཞག་གསུམ་ཞག་བདུན་རྩ་གཅིག་ཏུ། ། རེ་དོགས་ལ་སོགས་ཐམས་ཅད་ཀུན། །སྤངས་ནས་རྣལ་འབྱོར་ཏིང་འཛིན་ལ། །ནན་ཏན་དུ་ནི་བརྩོན་འགྲུས་བྱ། །ཚོགས་འཁོར་ལ་སོགས་ཡང་དང་ཡང་། །བྱེད་པའི་དུས་སུ་རྡོ་རྗེ་གླུ། །བྱེད་ཅིང་ཕྱག་རྒྱ་སོགས་སྟོན་པས། །ཏིང་འཛིན་ཕྱག་རྒྱ་གསལ་བ་དང་། །མཚན་མ་ལ་སོགས གསལ་འབར་ཞིང་།།གཟུགས་དང་སྒྲ་དང་དྲི་ལ་སོགས། །ཐམས་ཅད་བརྟེན་ཞིང་མི་འགྱུར་བ། །ལྷ་ཡི་མཚན་མར་ཤེས་པར་བྱའོ། །དེ་ལས་བཟློག་པ་ཐམས་ཅད་ཀུན། །བདུད་ཀྱི་རྟགས་སུ་ཤེས་པར་བྱའོ། །དེ་ལ་སོགས་པ་མཐའ་ཡས་མཆོག་། མཁའ་འགྲོའི་ལུང་དུ་བསྟན་པས་ན། །འདིར་ནི་བསྒྲུབ་པའི་དོན་དུ་བསྡུས། །བསྒྲུབ་པའི་ཆ་རྐྱེན་མན་ངག་རྣམས། །སྒྲུབ་པ་ཉམས་སུ་ལེན་པ་ལ། །བསྟན་ཅིང་སྤེལ་ན་བསོད་ནམས་འཕེལ། །ཉམས་སུ་མི་ལེན་སེར་སྣ་ཅན། །རྫས་དང་ལུས་སྲོག་ལ་སོགས་པ། །བླ་མ་ལ་ནི འབུལ་མི་ནུས།།དེ་ལ་མན་ངག་བསྟན་མི་བྱ། །དེ་ལ་མན་ངག་བསྟན་པ་ན། །དངོས་གྲུབ་ཉམས་ཏེ་སྡིག་པ་འཕེལ། །དམ་ཚིག་ཉམས་ཏེ་མཁའ་འགྲོས་གསོད། །ཆ་རྐྱེན་ལ་སོགས་བཅུ་བདུན་པོ། །སྟོན་པ་ཕྱག་ན་རྡོ་རྗེ་ཡིས། །སེམས་དཔའ་ཕྱག་ན་རྡོ་རྗེ་ལ། །རྣ་བ་བརྒྱུད་ པའི་མན་ངག་དེ།།རྡོ་རྗེ་མཁའ་འགྲོ་མ་ལ་བསྟན། །དེས་ནི་རོ་ལངས་མ་ལ་བསྟན། །གནོད་སྦྱིན་ཕྱག་ན་རྡོ་རྗེ་དང་། །སློབ་དཔོན་ཕྱག་ན་རྡོ་རྗེ་ལ། །བརྒྱུད་པའི་མན་ངག་རིམ་པ་རྣམས། །ནན་ཏན་གྱིས་ནི་བཙའ་བར་བྱ། །དེ་ལ་བཙའ་བ་མ་ཤེས་ན། །དཔེར་ན་ཡིད་བཞིན་ནོར་བུ་ ནི།།ཀླུ་རྒྱལ་གཙུག་ནས་རྙེད་ནས་ནི། །འདམ་རྫབ་ནང་དུ་སྟོར་བ་བཞིན། །དེ་བཞིན་མན་ངག་རིན་ཆེན་འདི། །ལུས་ངག་ཡིད་གསུམ་དཀའ་བ་ཡི། །སྒོ་ནས་སློབ་དཔོན་ལ་བཙལ་ནས། །དམ་མེད་རྨོངས་པའི་ལག་ཤོར་ན། །དངོས་གྲུབ་མི་ཐོབ་ཉམས་པར་འགྱུར། །དེ་བས་ ནན་ཏན་བསྐྱེད་དེ་བཙའ།།ལུང་བསྟན་པའི་སྦྱོར་ཀ་སྟེ་ཉི་ཤུ་བརྒྱད་པའོ།། །།བཅོམ་ལྡན་འདས་རྡོ་རྗེ་འཛིན་པ་ལ་ཕྱག་འཚལ་ལོ། །དེ་ནས་སེམས་ཅན་རྩོད་ལྡན་གྱི། །དུས་སུ་རྣལ་འབྱོར་སྒྲུབ་པ་པོས། །དམ་ཚིག་ཉམས་པ་མང་འབྱུང་བས། །ཡོ་བྱད་རྫས་ཆུད་སྒྲུབ་པ་པོས། ། ཉམས་པ་འཕེལ་དུ་མི་གཞུག་ཕྱིར། །མཎྜལ་ཆོ་གས་བསྐང་བ་ནི། །དང་པོ་རྣལ་འབྱོར་འགྱོད་སེམས་ཀྱིས། །ཤིན་ཏུ་གུས་པས་མཎྜལ་བཅའ། །མཎྜལ་བཅའ་བའི་ཐབས་བསྟན་པ། །ས་གཞི་ཤིན་ཏུ་མཉེན་པ་ལ། །སྐྱོན་སྤངས་ཡོན་ཏན་ལྡན་པ་ཡི། །མཎྜལ་ལྔ་ནི་བཅའ་བྱ་སྟེ། ། དང་པོ་མཎྜལ་དཀར་པོ་བཅའ། །གཉིས་པ་སྔོན་པོ་དག་ཏུ་བྱ། །གསུམ་པ་མཐིང་ག་དག་ཏུ་བྱ། །བཞི་པ་སེར་པོ་དག་ཏུ་བྱ། །ལྔ་པ་དམར་པོ་དག་ཏུ་བྱ། །དཀར་རྩི་དང་ནི་བ་བླ་དང་། །ཡང་ན་རྩཝ་སྔོན་མེ་ཏོག་གིས། །གཉིས་པ་དང་ནི་གསུམ་པ་ནི། །མཚལ་ལ་སོགས་པའི་རིགས དང་ནི།།གུར་གུམ་ལ་སོགས་རིགས་དག་དང་། །སྦྱར་བའི་ནག་པོའི་རིགས་དག་གིས། །ཁ་དོག་བསྒྱུར་བར་བསྟན་པ་ཡིན། །ཡང་ན་ཐམས་ཅད་དཀར་དང་སྔོ། །དེ་གཉིས་གཅིག་གིས་བྱ་བ་ཡིན། །བསྡུས་རྒྱས་མཁས་པས་ཤེས་པར་བྱ། །བ་ཡི་རྣམ་པ་ལྔ་དང་ནི། །བདུད་རྩི་རྣམ་པ་ལྔ་དག་ནི། །དངོས་གྲུབ་ཅན་ གྱི་སྣོད་དུ་གཞག་།རིན་ཆེན་བུམ་པ་ལ་སོགས་ཀྱི། །སྐྱོན་སྤངས་ཡོན་ཏན་ལྡན་པ་ཡི། །སྣོད་དུ་ཐུན་མོང་ཁྱད་པར་རྫས། །ཙནྡན་མེད་དུ་མི་རུང་ངོ་། །ཁ་རྒྱན་འབྲས་བུ་ཅན་གྱིས་བྱ། །དང་པོར་བདག་ཉིད་རྣལ་འབྱོར་པས། །ཐ་མལ་འདུ་ཤེས་སྤངས་ནས་ནི། །ལྷ་ཡི་ང་རྒྱལ་ལྡན་པ་ཡིས། ། དང་པོ་བུམ་པ་བྱིན་གྱིས་བརླབས། །བདུད་རྩི་འཁྱིལ་པའི་སྔགས་ཀྱིས་གདབ། །ོཾ་ཨ་མྲྀ་ཏ་ཀུཎྜ་ལི་ཧཱུཾ། ཉི་ཤུ་རྩ་གཅིག་བདུན་དུ་གདབ། །གོང་གི་བཀྲ་ཤིས་སྣོད་ཀྱི་རྫས། །བདུད་རྩི་འཁྱིལ་པས་བཏབ་ནས་ཀྱང་། །དང་པོ་བུམ་པའི་ཆུས་སུ་བསང་། །བདུད་རྩི་འཁྱིལ པའི་སྔགས་ཀྱང་བཟླས།།ཐུགས་ཀའི་ཨ་ལས་ཟླ་བ་ཡི། །དཀྱིལ་འཁོར་ཆེན་པོ་ཉིད་དུ་བསམ། །ོཾ་ཨ་ཙནྡྲ་མཎྜལ་ཧཱུཾ། །བདུན་དང་ལྔ་དང་གསུམ་དུ་བཟླས། །ཙནྡན་ལས་ཀྱི་བུམ་པས་བསང་། །ཡི་གེ་དུ་འཕྲོས་ཙནྡན་ཕོག་།དེ་ལས་འཕྲོས་པས་མཎྜལ་གང་། །ོཾ་དྷཱུཾ་པ་སྥ་ ར་ཎ་ཧཱུཾ།ཞེས་པས་ལན་བདུན་བཟླས་སོ། །མེ་ཏོག་ལྔ་དང་གཉིས་གཅིག་ལ། །ཁ་དོག་མཚན་ཉིད་ཤེས་བྱས་ལ། །ཡི་གེ་པཾ་ལས་པདྨ་ནི། །སྟོང་ལྡན་བརྒྱད་ལྡན་དག་ཏུ་ནི། །གྱུར་པར་བསམས་ནས་སྔགས་བཟླས་དགྲམ། །ོཾ་བཾ་པདྨ་མཎྜལ་ཧཱུཾ། ཞེས་གོང་མ་བཞིན་དུ་ བརྗོད་པར་བྱའོ།།དེ་སྟེང་བྷྲཱུཾ་ལས་གཞལ་ཡས་ཁང་། །ལྔ་དང་གཉིས་དང་གཅིག་ཏུ་བྱ། །དེ་ནས་ཐམས་ཅད་ཀུན་ལ་ཡང་། །གསུམ་དུ་བྱ་བར་འདོད་པའང་ཡོད། །ཟླ་བ་པདྨ་གཞལ་ཡས་ཁང་། །གསུམ་དང་གཉིས་དང་གཅིག་ཏུ་ཡང་། །རྣལ་འབྱོར་བསྡུས་དང་རྒྱས་པ་ནི། ། ཉམས་པ་ཆེ་ཆུང་གོ་རིམས་སོ། །དེ་ནས་རྣལ་འབྱོར་བདག་ཉིད་དང་། །དམ་ཚིག་ཉམས་པའི་རྣལ་འབྱོར་ཀུན། །ཁྲུས་བྱས་གོས་ནི་བཟང་པོ་གོན། །རྒྱན་ཆ་ལ་སོགས་མཛེས་པར་བྱས། །ཤར་རམ་ནུབ་ཏུ་ཁ་བལྟས་ཏེ། །སོ་སོ་ལྷ་ཡི་ཏིང་འཛིན་བསྐྱེད། །རྡོ་རྗེ དྲིལ་བུ་བྱིན་གྱིས་བརླབས།།རྡོ་རྗེ་དྲིལ་བུས་བསྐུལ་ནས་ཀྱང་། །ཚིགས་བཅད་དག་གིས་གསོལ་བ་བཏབ། །སྔགས་ཀྱི་རྒྱལ་པོ་མཐའ་ལ་གདགས། །ཐུགས་ཀའི་ཟླ་བའི་དཀྱིལ་འཁོར་དུ། །ཡི་གེ་བཞི་འཕྲོས་ལྷ་མོར་གྱུར། །བླ་མ་ཡི་དམ་ལྷ་དང་ནི། །གསང་སྔགས་བདག་ པོ་དཀྱིལ་འཁོར་ལྷ།།དཀོན་མཆོག་གསུམ་སོགས་སྤྱན་དྲངས་ནས། །བླ་མ་སྦྱངས་ནས་མི་བསྐྱོད་འགྱུར། །མཆོད་ཡོན་མཆོད་སོགས་རྒྱས་པར་དབུལ། །དེ་ཡི་སྔོན་དུ་ཕྱག་རྣམས་བྱ། །གཞན་ཡང་མཆོད་པ་སྣ་ཚོགས་ཀྱིས། །མཆོད་ནས་བསྟོད་པ་རྒྱས་པར་བྱའོ། །དེ་ནས་ སྔགས་བཟླས་འོད་ཟེར་གྱིས།།ལྷ་རྣམས་ལ་ནི་ཕོག་ནས་སུ། །འོད་ཟེར་བསྐུལ་ནས་ཚུར་ལ་འདུས། །ཉམས་པའི་ལུས་ལ་ཕོག་ནས་སུ། །བ་སྤུའི་ཁུང་ཞུགས་སྡིག་པ་བསྡུས། །སྙིང་གར་ཡི་གེ་ཀཾ་ངམ་ནི། །འོད་ནག་ཏུ་ནི་གྱུར་པར་བསམ། །སྲོག་གོ་འདུས་ཀྱི་སྣ་ནས་བྱུང་། ། ལྷ་དང་བདག་གི་བར་དུ་ནི། །པདྨ་ནག་པོའི་གདན་བསམས་ལ། །སྡིག་པའི་གཟུགས་དེ་དེ་རུ་བཞག་།དེ་ནས་ཡི་དམ་ལྷ་ཡི་སྔགས། །བཟླས་པའི་འོད་ཟེར་འཁྲུལ་འཁོར་གྱིས། །སྡིག་པ་རྣམས་ནི་སྦྱང་བར་བྱ། །ཡང་ན་སྡིག་པ་དེ་ཉིད་སྦྱངས་ནས་ཀྱང་། །ལུས་ཀྱི་ལྷག་མ སྦྱང་བའམ།།དེ་ནས་ཡི་གེ་བརྒྱ་པ་ཡིས། །མན་ངག་བཞིན་དུ་བསྒོམས་ནས་ཀྱང་། །སྔ་མ་བཞིན་དུ་སྦྱང་བར་བྱ། །ཡང་ན་ཡི་གེ་བརྒྱ་པ་གཅིག་པུས་བྱ། །ཡི་གེ་བརྒྱ་པ་འབུམ་དང་ནི། །རང་གི་སྙིང་པོ་འབུམ་གྱིས་ནི། །རྩ་བ་ཉམས་པ་ཆེན་པོ་སྐོངས། །སུམ་ཆ་ཕྲི་བས་གཉིས་ པ་སྐོངས།།ཕྱེད་ཕྲི་བས་ནི་གསུམ་པ་སྐོངས། །སུམ་གཉིས་ཕྲི་བས་བཞི་པ་སྐོངས། །སུམ་ཆའི་སུམ་ཆ་ཕྲི་བས་ནི། །ལྔ་པ་སྐོངས་ཏེ་དྲུག་པ་ནི། །སུམ་གཉིས་ཕྲི་བས་སྐོངས་པའོ། །དེ་ཡི་ཕྱེད་ཕྱེད་ཕྲི་བས་ནི། །ཐ་མ་གསུམ་གྱིས་གོ་རིམས་སྦྱོར། །ཡན་ལག་བརྒྱད་དང་བརྒྱ་ ཕྱེད་དང་།།ཉི་ཤུ་རྩ་གཅིག་དག་གིས་སོ། །ཆེ་ཆུང་རིམ་པ་དག་གིས་ནི། །ཐ་མ་མེའམ་ཆུ་ཡི་ནི། །སྦྱིན་སྲེག་དག་གིས་སྦྱིན་པར་བྱ། །གསང་སྔགས་བདག་གམ་བདུད་རྩི་འཁྱིལ། །རྟ་མགྲིན་བུམ་པ་གོང་བཞིན་བཅས། །བྱིན་བརླབས་ལ་སོགས་བྱས་ནས་ནི། །ཐ་མ་དག་པར་ བཀྲུ་བའོ།།སྦྱིན་སྲེག་ཁྲུས་དང་ལྡན་པའམ། །ཡང་ན་མཎྜལ་བཟླས་པ་ཡི། །ཆོ་ག་གཅིག་པུས་བྱར་ཡང་རུང་། །དམ་ཚིག་ཉམས་པ་བསྐང་བ་ཡི། །སྦྱོར་ཀ་འདི་ལ་བརྩོན་པར་བྱའོ། །དམ་ཚིག་ཉམས་པ་བསྐང་པའི་སྦྱོར་ཀ་སྟེ་ཉི་ཤུ་དགུ་པའོ།། །།བཅོམ་ལྡན་འདས་རྡོ་རྗེ་ འཛིན་པ་ལ་ཕྱག་འཚལ་ལོ།།དབང་གི་རིམ་པ་བསྟན་པ་ནི། །བུམ་པ་གསང་བ་ཡེ་ཤེས་དང་། །བཞི་པར་བསྟན་པ་དེ་རྣམས་ལ། །གནས་ནི་ཡིད་འོང་ལ་སོགས་སུ། །དུས་ལ་སོགས་པ་འཇོམས་པ་དང་། །སློབ་དཔོན་སློབ་མ་མཚན་ཉིད་ལྡན། །སྔོན་གྱི་གླིང་གཞི་རྗེས་མཐུན་ པར།།དཀྱིལ་འཁོར་བྱས་ནས་སློབ་མ་གཞུག་།དབང་བསྐུར་རིམ་པ་མ་ནོར་བར། །རྣམ་གྲངས་རྣམས་ནི་ཤེས་པར་བྱ། །བསྐུར་ཐབས་མན་ངག་ཤེས་བྱས་ལ། །བསྐུར་བའི་གནས་ཀྱང་མ་ནོར་བརྟག་།དེ་ལྟར་བྱས་པས་སྒྲིབ་པ་འབྱང་། །ས་ཡང་རིམ་གྱིས་ནོན་པར་འགྱུར། ། དེ་ཕྱིར་མན་ངག་བསྟན་པར་བྱ། །རྟགས་ལ་སོགས་པའང་ཤེས་པར་བྱ། །བརྡ་མི་ཤེས་ན་སྔགས་པ་མིན། །ལས་དང་པོ་ཡིས་རྫས་ལ་བརྟེན། །དགོས་པ་ཤེས་ན་ཐེ་ཚོམ་མེད། །ནུས་པ་མཐུ་དང་ལྡན་པས་ནི། །འབྲས་བུ་ཁྱད་པར་ཐོབ་པར་འགྱུར། །དེ་དག་སྤྱི་དང་ཁྱད་པར་ནི། །ཆོ ག་མན་ངག་རྒྱས་པ་རྣམས།།རྒྱུན་འགྲེལ་ཀུན་ན་གསལ་བས་ན། །འདི་རུ་བདག་གིས་མདོ་ཙམ་བསྡུས། །བུམ་པའི་དབང་ནི་རྣམ་བཞི་སྟེ། །ཕྱི་དང་ནང་དང་གསང་བ་དང་། །མཐར་ཐུག་པ་རུ་ཤེས་པར་བྱ། །ཕྱི་ནི་ཕྱི་རྒྱུད་དག་དང་མཐུན། །ནང་ནི་ནང་རྒྱུད་དག་དང་མཐུན། །ཡང་ ན་གཉིས་ཀ་ཕྱི་རུ་བསྟན།།ནང་གི་སློབ་དཔོན་ལུས་ལ་གཞག་།གསང་བ་ཡུལ་ནི་ཉིད་ལ་སྦྱར། །མཐར་ཐུག་སློབ་མ་མགོ་བོ་རུ། །དགའ་བ་བསྐྱེད་པའམ་རྡོ་རྗེའི་རྩ། །དེ་རྣམས་མན་ངག་རྒྱས་བཤད་པ། །ལས་ཀྱི་ཕྲེང་བར་ཤེས་པར་བྱ། །གསང་བ་དབང་ལ་བཞི་རུ་བསྟན། །ཕྱི་ནི་ བདུད་རྩི་བྱིན་བརླབས་སྦྱིན།།ཡང་ན་མཚན་ལྡན་ཕབ་ནས་ནི། །སྲིན་མཐེབ་དག་གིས་སྦྱིན་པར་བྱ། །ནང་གི་གསང་བ་ཕོ་བྲང་ནས། །ལག་པའི་ཕྱག་རྒྱ་བཟུང་ནས་སྦྱིན། །གསང་བ་ཡུམ་གྱི་མཁའ་ནས་བླངས། །མཐར་ཐུག་གསང་བའི་ཕོ་བྲང་དུ། །མཆོག་དགའ་ སྐྱེས་པར་ཤེས་པར་བྱ།།ཤེས་རབ་ཡེ་ཤེས་ལ་ཡང་བཞི། །ཕྱི་ནི་ལས་ཀྱི་ཕྱག་རྒྱ་མ། །ནང་ནི་འོད་ཀྱི་རིག་མ་ཡིན། །གསང་བ་བྱ་གདོང་མ་ལ་བྱ། །མཐར་ཐུག་དྲེགས་འཛིན་གཏུམ་མོ་ཡིན། །མཐར་ཐུག་ལ་ནི་གཉིས་སུ་བསྟན། །རྟེན་བཅས་དང་ནི་རྟེན་མེད་དོ། །རྟེན་མེད་ལ་ཡང་ གཉིས་སུ་བསྟན།།སྤྲོས་བཅས་དང་ནི་སྤྲོས་མེད་དོ། །དབང་གི་མན་ངག་རྒྱས་བཤད་པ། །སློབ་དཔོན་ཞལ་གྱི་མན་ངག་དང་། །ལས་ཀྱི་ཕྲེང་བར་ཤེས་པར་བྱ། །བརྡ་ཡི་ཆོ་ག་མདོ་ཙམ་བསྟན། །ཀ་ལ་ཤ་ཨ་བྷེ་ཥེ་ཀ་ཞེས་པ་ནི། །བུམ་པའི་ངག་བརྡ་ལུས་ཀྱི་བརྡ། །ལག་པའི་སོར་མོ་བཀང་ནས་ ནི།།རྩེ་མོ་བསྡུས་པའི་བུམ་པའི་ཚུལ། །གུ་ཧྱ་ཨ་བྷི་ཥེ་ཀ་ཞེས་པ། གསང་བའི་ངག་བརྡ་ལུས་ཀྱི་བརྡ། །སྡོམ་པོས་ཁྲོ་མོ་གནོན་པ་ནི། །ལག་བརྡ་འདྲི་ན་ཤེས་པར་བྱ། །པྲཛྙཱ་ཛྙཱ་ན་གུ་ཧྱ་ཨ་བྷི་ཥེ་ཀ་ཞེས་པ་ནི། །ཤེས་རབ་ཡེ་ཤེས་ངག་གི་བརྡ། །ལུས་ཀྱི་བརྡ་ནི་ལྷ་སྦྱིན་བརྡ། །ཡང་ན་ཁྱད་ པར་དགའ་བ་མཚོན།།པྲ་ཛྙཱ་ཛྙཱ་གུ་ཧྱ་ཨ་བྷི་ཥེ་ཀ་ཞེས་པ། །བཞི་པའི་ངག་བརྡ་ལུས་ཀྱི་བརྡ། །ལྷན་ཅིག་དགའ་བ་སྐྱེས་ས་རུ། །མཐེ་བོ་བཅུག་ནས་མཚོན་པར་བྱའོ། །དེ་ལྟར་བརྡ་རྣམས་མ་ཤེས་ན། །མཁའ་འགྲོ་དངོས་གྲུབ་སྟེར་བ་ན། །བརྡ་རྣམས་དྲིས་ནས་སྟེར་བར་བྱེད། །བརྡ་ རྣམས་དྲི་ཤེས་སླར་ལ་འཆོར།།ཡང་ན་བརྡ་རྣམས་གཞན་པོ་ཡང་། །མ་ཤེས་ན་ནི་མཁའ་འགྲོས་གསོད། །བརྡ་ལ་སོགས་པ་མ་ཤེས་ན། །གསང་སྔགས་སྤྱོད་པའི་དུས་དང་ནི། །འབྱུང་པོ་ཉམས་གསོད་གསོལ་བ་དང་། །མུ་སྟེགས་ཤན་འདྲེས་འབྱུང་བ་དང་། །ཕྱག་དང་ཕྱག་གི་ ལན་དུས་སུ།།བརྡ་མི་ཤེས་ན་སྔགས་པ་མིན། །དབང་བསྐུར་བ་ཡི་རིམ་པ་ཡང་། །ཆགས་ལམ་གྲོལ་ལམ་གཉིས་ཤེས་བྱའོ། །དབང་བསྐུར་མེད་ན་འབྲས་བུ་མེད། །དེ་བས་དབང་བསྐུར་ནན་ཏན་བྱ། །དབང་གི་སྦྱོར་ཀ་སྟེ་སུམ་ཅུ་པའོ།། །།བཅོམ་ལྡན་འདས་རྡོ་རྗེ་འཛིན་པ་ལ་ཕྱག་ འཚལ་ལོ།།དམ་ཚིག་རྣམས་ནི་ཅུང་ཞིག་བསྟན། །དང་པོ་སྤྱོད་པའི་དམ་ཚིག་ནི། །ཆགས་ལམ་སྤྱོད་ལམ་གྲོལ་ལམ་སྤྱོད། །དེ་ལྟར་གཉིས་ཀ་སྤྱོད་པ་ལ། །དང་པོ་མཆོག་དང་རབ་མཆོག་གོ། །དེ་ལ་ཡང་ནི་ཕྱི་ནང་ངོ་། །དང་པོ་ཕྱི་ཡི་སྤྱོད་དུས་སུ། །ཡུལ་དང་དུས་ཀྱི་གནས་སྐབས་ ཀྱིས།།ཞི་བས་འདུལ་དང་དྲག་པོས་འདུལ། །མཐུན་འཇུག་སྤྱོད་པ་མཁས་ཤིང་ཟབ། །ཟས་དང་གོས་སོགས་ཐམས་ཅད་ཀྱང་། །རང་དང་གཞན་ནི་གཉིས་ཀ་ལ། །ཕན་སེམས་སྤྱོད་པས་འཇུག་བྱའོ། །ཕན་སེམས་མེད་པ་ཉོན་མོངས་ཅན། །བདག་གཞན་ལྷ་དང་སྙིང་རྗེ་སྤངས། ། འགྲོ་དོན་མཆོད་པ་སྤངས་པས་ན། །དམ་ཚིག་ཉམས་ཏེ་ངན་འགྲོར་ལྟུང་། །ནང་སྤྱོད་དུ་ནི་བསྟན་པ་ནི། །བདུད་རྩི་ལྔ་ལ་སོགས་པ་ལ། །ཆགས་པའི་ལམ་པས་འཇུག་པར་བྱ། །གྲོལ་བའི་ལམ་པས་བྱིན་གྱིས་བརླབས། །དེ་ལྟར་བྱིན་བརླབས་བདུད་རྩི་བ་ལྟ། །ཐམས་ཅད་ལྷ་བསྒོམས མཆོད་བྱས་ན།།བསོད་ནམས་ཆེན་པོ་ཐོབ་པར་འགྱུར། །ཁྱི་ཕག་སྤྱོད་པ་བཞིན་བྱས་ན། །དམ་ཚིག་ཉམས་ཏེ་ཡི་དགས་ས། །ཆང་ནི་བདུད་རྩི་ཆེན་པོ་སྟེ། །བཏུང་བར་བྱ་བ་ཁོ་ན་ཡིན། །ཞེས་རྒྱུད་ལས་གསུངས་པ་སྟེ། མཚན་དང་ལྡན་པའི་སྣོད་མཆོག་ཏུ། །རུལ་སོགས་ སྐྱོན་རྣམས་སྤངས་པ་ཡི།།བདུད་རྩི་རོ་ལྡན་སྣོད་བཀང་སྟེ། །བདག་ཉིད་ལྷ་ཡི་རྣལ་འབྱོར་བྱ། ། ལས་ཀ་པཱ་ལ་ནི་བསྐྱེད། །ཟླ་བ་དང་ནི་དེ་ཡིས་བསྐྱེད། །ཧས་ནི་གཟུགས་སོགས་རྣམ་རྟོག་སྦྱངས། །ཧྲཱིཿས་ནི་རོ་སོགས་རྣམ་རྟོག་སྦྱངས། །ཧོཿས་ནི་བདུད་རྩི་ཆེན་པོར་ བཞུ།།མཐེ་བོང་ཧཱུཾ་ལས་ས་གཞིའི་ཚུལ། །སྲིན་མཐེབ་སུཾ་ལས་རི་རབ་ཚུལ། །བར་ནས་མཾ་འཕྲོས་བདུད་རྩི་བཀུག་།བདག་གཞན་ལྷ་ནི་མཆོད་བྱས་པས། །བསོད་ནམས་ཆེན་པོ་ཐོབ་པར་འགྱུར། །དེ་ལྟར་མ་བྱས་གླང་ཆེན་བཞིན། །ཆགས་ཤིང་བརྐམ་སོགས་ མྱོས་འཐུང་ན།།སྐྱེ་བ་ལྔ་བརྒྱར་སྨྱོན་པར་སྐྱེ། །བྱིན་གྱིས་བརླབས་པའི་རིམ་པ་ཡང་། །ཡང་ན་རིགས་ལྔའི་སྦྱོར་སོགས་བྱ། །ཡང་ན་མཱ་མ་ཀཱི་ཡིས་སྦྱངས། །ཡང་ན་བདུད་རྩི་འཁྱིལ་སོགས་བྱ། །མཚན་ལྡན་སྣོད་དང་ཆོས་འབྱུང་དང་། །ཟླ་བ་ལ་སོགས་བསམས་བྱས་ པ།།མཆོད་པར་བྱ་བའམ་ཡང་ན་བདུན། །སྤྱི་གཙུག་བླ་མ་གཞག་བྱས་ལ། །སྐུ་གསུང་ཐུགས་ནི་གནས་གསུམ་གཞག་།དེ་ནས་འཐོར་ཞིང་མཆོད་པ་ཡིས། །ཕྱག་རྒྱ་སྔགས་ཀྱིས་དབུལ་བར་བྱ། །སོ་སོའི་རྩ་བའི་སྔགས་ལ་ཨ་མྲྀ་ཏ་ཀུཎྜ་ལི་ ཞེས་པའམ།། མྲྀ་ཏ་ཁཱ་ཧི་ཞེས་པ་གང་ཡང་རུང་། །གསུམ་གསུམ་ཀུན་ལ་དབུལ་བར་བྱ། །དེ་ནས་རང་སྙིང་ལྷ་གསལ་ལ། །ཅི་རན་གནོད་པ་མེད་ཙམ་བཏུང་། །ནད་ལ་གནོད་པར་གྱུར་ཀྱང་ནི། །ཐིགས་པ་གསུམ་ནི་དམ་ཚིག་གོ། །གྲོལ་བས་ཀྱང་ནི་མཆོད་པ་ཡི། །དུས་ སུ་བཏུང་བར་བྱ་ཕྱིར་ནི།།ཡུལ་དུས་གནས་སྐབས་སྦྱར་ཏེ་བཏུང་། །བཏུང་བ་ལ་སོགས་གཞན་པོ་ཡང་། །བདུད་རྩི་མ་བྱས་འཐུང་བྱེད་པ། །ཡི་དགས་གནས་སུ་སྐྱེ་བར་འགྱུར། །གསང་བའི་སྤྱོད་པའི་དུས་སུ་ནི། །ཕྱག་རྒྱ་མ་ནི་བསྟེན་པ་ཡང་། །རྣལ་འབྱོར་ཆགས་པའི་ལམ་ པས་ནི།།རྟགས་ལྡན་མཚན་ཉིད་ལ་སོགས་ལྡན། །དེ་ལྟར་བསྟེན་པའི་གནས་སྐབས་ནི། །དབང་བསྐུར་རྣམ་གཉིས་དུས་དང་ནི། །མཆོད་པའི་དུས་དང་ཏིང་འཛིན་ནི། །ཡེ་ཤེས་སྐྱེ་བ་བོགས་དབྱུང་ཕྱིར། །དམ་ཚིག་ཏུ་ནི་བསྟན་པ་ཡིན། །ཡང་ན་བསྐྱེད་རིམ་བསྟན་པ་དང་། ། རླུང་རྣམས་ལས་སུ་རུང་འགྱུར་ན། །ཕྱག་རྒྱའི་དངོས་གྲུབ་མྱུར་འདོད་ཕྱིར། །ཕྱག་རྒྱ་ལ་ནི་བརྟེན་པར་བྱ། །རྣལ་འབྱོར་གྲོལ་བའི་ལམ་པས་ནི། །ཡིད་ཀྱི་ལྷ་མོ་གཟུགས་མཛེས་མ། །མཆོད་པའི་དུས་སུ་དམ་ཚིག་གོ། །དེ་ནས་མཁའ་འགྲོ་ལུང་སྟོན་དུས། །དངོས་གྲུབ་མྱུར་དུ ཐོབ་འདོད་ན།།མཁའ་འགྲོའི་མན་ངག་ལ་བརྟེན་ནོ། །དེ་ལྟར་གོ་རིམས་མ་ཤེས་ན། །དམ་ཚིག་ཉམས་ཏེ་སྲིན་བུར་སྐྱེ། །སངས་རྒྱས་བསྟན་པ་འཇིག་པ་ལ། །འཁྲུལ་འཁོར་སྦྱོར་བ་ཤེས་བཞིན་དུ། །མི་རྩོམ་པ་ནི་དམ་ཚིག་ཉམས། །མི་ཤེས་གནོད་པ་མི་བྱེད་ལ། །བྱེད་ན་ ཡང་ནི་དམ་ཚིག་ཉམས།།དེ་སོགས་སྦྱོར་བ་གཞན་པོ་ཡང་། །མན་ངག་གིས་ནི་ཤེས་པར་བྱ། །མཆོག་གི་སྤྱོད་པའི་དུས་སུ་ནི། །བརྟུལ་ཞུགས་སྨྱོན་པ་ལྐུགས་པ་དང་། །གཅེར་བུ་ལ་སོགས་དུས་སྐབས་སྦྱར། །དེ་ལྟར་མ་ཤེས་དམ་ཚིག་ཉམས། །རབ་མཆོག་གི་ནི་ དུས་དག་ཏུ།།དོན་དམ་རང་བཞིན་མེད་པའམ། །སྒྱུ་མའི་ཏིང་འཛིན་ལ་བརྟེན་ནས། །རྫོགས་པའི་ཏིང་འཛིན་དུས་སུ་ནི། །སྤྱོད་པ་ལ་སོགས་བྱེད་པ་ནི། །དམ་ཚིག་ཉམས་ཏེ་བོགས་ཆུང་ངོ་། །མཐུན་འཇུག་སྤྱོད་པ་འགལ་བ་མེད། །ལྟ་བའི་དམ་ཚིག་བསྟན་པ་ནི། །ཆོས་ རྣམས་སེམས་ཀྱི་འཁྲུལ་པ་སྟེ།།སེམས་ལས་མ་གཏོགས་ཆོས་རྣམས་མེད། །ཆོས་སུ་སྣང་བ་འཁྲུལ་པའི་སེམས། །སེམས་ཉིད་དེ་ཡང་སྐྱེ་མེད་ཕྱིར། །ཡོད་མེད་མཐའ་ལས་འདས་པའོ། །བསམ་དུ་མེད་ཅིང་བརྗོད་དུ་མེད། །དཔེར་ན་ནམ་མཁའ་ཇི་བཞིན་ནོ། །ལྟ་སྤྱོད་ ཀྱི་དམ་ཚིག་གི་སྦྱོར་ཀ་སྟེ་སུམ་ཅུ་གཅིག་པའོ།། །།བཅོམ་ལྡན་འདས་རྡོ་རྗེ་འཛིན་པ་ལ་ཕྱག་འཚལ་ལོ། །རབ་གནས་ཆོ་ག་བསྟན་པར་བྱ། །སྐུ་གཟུགས་ལ་སོགས་ཀུན་ལ་ནི། །རབ་ཏུ་གནས་པ་མ་བྱས་ན། །མུ་སྟེགས་ལྷ་རྟེན་བཅས་དང་འདྲའོ། །རིགས་དང་ན་ཚོད་མེད པའི་མི།།ཐམས་ཅད་ཀུན་གྱིས་བཀུར་མི་བྱེད། །དེ་བཞིན་འདིར་ཡང་སྐུ་སོགས་ལ། །ཕྱག་ལ་སོགས་པ་བྱས་གྱུར་ཀྱང་། །བསོད་ནམས་ཆེན་པོ་ཐོབ་མི་འགྱུར། །བསོད་ནམས་ཆེན་པོ་ཐོབ་འདོད་ན། །རབ་གནས་བྱས་པས་ཐོབ་པར་འགྱུར། །དེ་བས་རབ་གནས་བྱ་བ་ གཅེས།།སློབ་དཔོན་མཚན་ཉིད་ལྡན་པ་ཡིས། །སྔོན་དུ་བསྙེན་པ་བྱ་བ་ནི། །སོ་སོ་རང་རང་བསྙེན་པ་བྱ། །དེ་ལྟར་མི་འགྲུབ་རྣལ་འབྱོར་པས། །ཤཱཀྱ་ཐུབ་བསྙེན་པ་ཀུན་གྱི་མ། །རྡོ་རྗེ་འཛིན་པའི་བསྙེན་པ་ཡིས། །གསང་སྔགས་ཐུན་མོང་བསྟན་པ་ཡིན། །བསྙེན་པ་རྣམ་ གསུམ་རྫོགས་བྱས་ལ།།དེ་ནས་ས་ཆོག་ལ་སོགས་པ། །གཞན་དང་མཐུན་པར་རྒྱས་པར་བྱ། །མཎྜལ་བྱི་དོར་ལེགས་བྱས་ལ། །རྒྱན་དང་རོལ་མོ་ལ་སོགས་དགྲམ། །ལྷ་ཡི་སྟ་གོན་རྫོགས་བྱས་ལ། །དེ་ནས་བུམ་པའི་སྟ་གོན་བྱ། །མཎྜལ་མེ་ཏོག་གཅལ་བཀྲམ་ལ། །བདག་ཉིད་ ལྷ་རུ་བསྒོམས་ནས་སུ།།ཡུངས་ཀར་ནིམ་པ་ལག་གཉིས་ཀྱིས། །བླངས་ནས་གསུམ་གསུམ་མེར་བསྟབས་བྱ། །ོཾ་སརྦ་པཱ་པཾ་ད་ཧ་ན་བཛྲ་ཡ། སརྦ་པཱ་པཾ་ད་ཧ་ན་བཛྲ་སྭཱ་ཧཱ། ཆུ་སྙིམ་པ་བཀང་བ་ལན་གསུམ་བླུགས་ལ། །བླ་མས་ཟན་ཆུ་བསྲེ་སྣོད་ཐོགས། །ལན་གསུམ་ བྱབས་ཏེ་མེར་བཅས་རྣམས།།ཕྱི་རོལ་དག་ཏུ་བསྐྱལ་བར་བྱ། །ནམ་མཁའ་ལྷ་བཀང་སྤོས་ཐོགས་ནས། །དཀྱིལ་འཁོར་ལྷ་ལ་གསོལ་བ་གདབ། །རིག་སྔགས་རྒྱལ་ལ་ཕྱག་འཚལ་ལོ། །ཞེས་ཚིགས་བཅད་ལ་སོགས་བསྒྲག་པར་བྱའོ། །དེ་ནས་ མཎྜལ་སྟེང་དུ་ནི།།སྐུ་གདུང་ལ་སོགས་གཞག་བྱས་ལ། །སློབ་དཔོན་ནུབ་ཏུ་གནས་ནས་ནི། །ོཾ་ཧཱུཾ་བཾ་ཨ་ཞེས་བརྗོད་པས། །བ་ཡི་རྣམ་ལྔ་གང་ཡིན་པ། །དེ་ནི་མར་ཆུ་སྦྱར་བ་དང་། །དྲི་ཞིམ་ཙནྡན་ཆུ་ཉིད་དང་། །འདག་ཆལ་ཤིང་ཤུན་ཆུ་གསུམ་ནི། །བྱིན་བརླབས་དཱུར་བས་རིམ་ བཞིན་བསྐུ།།ུ་དུམ+Wཱར་བྷང་ཏྲ་དང་། །ཙ་བ་ལེ་ཀེ་ན་དང་ནི། ། ཤྭད་བྱང་ཆུབ་ཤིང་གང་རྙེད། །ཞིབ་བཏགས་ཆུ་སྦྱར་སྣོད་གཡས་གཞག་།དེ་ནས་ཁྲུས་རྣམས་རིམ་པར་བྱ། །དེ་ལ་སོགས་པའི་ཆོ་ག་ཡིས། །སྐུ་གཟུགས་སྟ་གོན་གནས་པར་བྱ། །དེ་ནས་དཀྱིལ་འཁོར་ བསྒྲུབ་པར་བྱ།།དེ་རྗེས་རབ་གནས་བརྩམ་པར་བྱ། །སྐུ་རྣམས་སོ་སོའི་ས་བོན་ལས། །ཆོ་ག་གསུམ་སོགས་གང་འདོད་བསྐྱེད། །ཡེ་ཤེས་ལྷ་ཡང་སོ་སོར་བསྟིམ། །སྐུ་གདུང་བརྟན་པར་བསྐྱེད་ཅིང་བསྟིམ། །གླེགས་བམ་སོ་སོའི་སྙིང་པོ་ལ། །ཡང་ན་ཨཱ་ལི་ཀཱ་ལིའམ། །སོ་སོའི་ དཀྱིལ་འཁོར་དག་ཀྱང་རུང་།།ལྷ་ཁང་ལ་སོགས་ཀུན་ལ་ཡང་། །སོ་སོའི་དཀྱིལ་འཁོར་གང་འདོད་བྱ། །ཡང་ན་ཡི་གེ་བྷ+འྲཱུཾ་ནི་རྟེན་ཡིན་ལ། །དེ་ལ་བརྟེན་པ་གང་འདོད་པའོ། །རྡོ་རྗེ་དྲིལ་བུ་དག་ལ་ནི། །ཧཱུཾ་དང་ཨ་ཡི་ས་བོན་ལས། །དྷརྨ་ཨ་བཛྲ་ཧཱུཾ་ཞེས། །སྔགས་ཀྱིས་ བསྐྱེད་པ་བྱས་ནས་ནི།།ཕྱག་མཚན་ལྷ་ནི་གང་འདོད་བསྟིམ། །ཕྱག་མཚན་ལ་སོགས་གཞན་ལ་ཡང་། །ཕྱག་མཚན་སྙིང་པོ་ལྷ་གསུམ་དང་། །སྒྲུབ་པ་པོ་ཡི་ལས་དང་སྦྱར། །ཕྲེང་བ་ལ་ཡང་དེ་བཞིན་ནོ། །མཚན་ལྡན་ཡི་གེ་ཨ་ཡིན་ནོ། །རྒྱན་དང་རྒྱན་ཆ་ལ་སོགས་པ། ། བྱིན་གྱིས་བརླབ་པ་ཙམ་ནི་བྱ། །དེ་དག་ཐམས་ཅད་ཀུན་ལ་ཡང་། །བསྐྱེད་དད་བསྟིམ་པ་བྱས་ནས་ནི། །དེ་ནས་བྱིན་རླབས་དབང་བསྐུར་བྱ། །དེ་ནས་མཆོད་ལྔ་དབུལ་བར་བྱ། །དེ་འོག་ལཱ་སྱ་ལ་སོགས་བརྒྱད། །མཆོད་པ་ཉི་ཤུ་པོ་ཡང་བྱ། །གོས་དང་རྒྱལ་མཚན་ལ སོགས་པ།།རིན་ཆེན་བཀྲ་ཤིས་སྒྲ་དང་ནི། །རོལ་མོ་ལ་སོགས་ཆོ་ག་རྣམས། །རྒྱས་པར་ཕུལ་ནས་བསྟོད་པ་བྱ། །དེ་ནས་བཟླས་བརྗོད་ཅི་རན་བྱ། །སྤྱན་འབྱེད་སྔགས་ལ་སོགས་པ་ནི། །གློག་ཕྲེང་རྒྱུད་དུ་ཤེས་པར་བྱ། །ཡང་ན་ཕྱག་མཚན་ལ་སོགས་ཀྱི། །ཆོ་ག་བསྡུས་ པར་ཤེས་པར་བྱ།།ཤིན་ཏུ་བསྡུས་པའི་ཆོ་ག་སོགས། །བྱིན་གྱིས་བརླབས་ལ་སོགས་པ་ཙམ། །དེ་ལྟར་རབ་གནས་ཟིན་ནས་ནི། །བླ་མ་མཁས་པ་དེ་ལ་ནི། །ཅི་བདོག་ཡོན་རྣམས་དབུལ་བར་བྱ། །དེས་ནི་བསོད་ནམས་ཆེན་པོ་ཐོབ། །ཇི་ལྟར་ཕོངས་པར་འགྱུར་ཡང་ནི། ། མཆོད་པའི་ཡོ་བྱད་རྣམས་ནི་དབུལ། །སེར་སྣ་ཅན་ནི་དབུལ་མི་ནུས། །དེས་ནི་སྡིག་འཕེལ་བསོད་ནམས་མེད། །རབ་གནས་བཟང་པོ་ཟིན་ནས་ནི། །རབ་གནས་བཟང་པོར་གཤེགས་སུ་གསོལ། །རབ་ཏུ་གནས་པའི་སྦྱོར་ཀ་སྟེ་སུམ་ཅུ་གཉིས་པའོ།། །།བཅོམ་ལྡན་འདས རྡོ་རྗེ་འཛིན་པ་ལ་ཕྱག་འཚལ་ལོ།།འཆི་བ་བསླུ་བའི་མན་ངག་ནི། །འཆི་རྟགས་རྣམ་པར་བསྟན་པ་དང་། །འཆི་བསླུ་ཆོ་ག་རྒྱས་པ་རྣམས། །འཆི་བསླུ་ཆེན་པོར་ཤེས་པར་བྱ། །འདིར་ནི་བསྒྲུབ་པའི་དོན་དུ་ནི། །གོས་སྔོན་འཆི་བ་བསླུ་བ་མཆོག་།མན་ངག་ཅུང་ཞིག་བཀོལ་ ནས་བསྟན།།སྤྱིར་ནི་འཆི་བ་བསླུ་བ་ལ། །དགེ་བའི་ཕྱོགས་ནི་མཐའ་ཡས་མཆོག་།གང་བྱས་ཀྱང་ནི་བཟློག་པར་འགྱུར། །གོས་སྔོན་འཆི་བསླུའི་རིམ་པ་ཡང་། །ནད་པ་སེམས་ནི་དག་པ་ཡིས། །གོས་སྔོན་རྣ་བརྒྱུད་མན་ངག་ཅན། །མཁས་པ་དེ་ནི་སྤྱན་དྲངས་ལ། ། གནས་ཁང་དགོན་པར་མཎྜལ་བྱ། །མཎྜལ་བྱས་པའི་འོག་ཏུ་ནི། །རྒྱན་རྣམས་མ་ལུས་དགྲམ་པར་བྱ། །ནད་པ་ལ་ནི་ཆོས་བཤད་ལ། །དང་པོ་སེམས་ནི་དག་པར་བྱ། །སྒྱུ་མ་ལྟ་བུའི་སེམས་ཀྱིས་ནི། །ནོར་རྣམས་མ་ལུས་ཐམས་ཅད་དང་། །རང་ལུས་སྲོག་དང་བཅས་པ་དབུལ། ། དེ་ལྟར་འབུལ་བ་དེ་ལ་ནི། །དང་པོ་དབང་བསྐུར་རྫོགས་པ་ལ། །དེ་ནས་མན་ངག་གཞན་སོགས་བྱ། །དེ་ལྟར་བྱས་འོག་སོས་གྱུར་ལ། །རང་འཚོ་རྫས་ཙམ་སླར་ལ་སྦྱིན། །ནོར་རྫས་སྲོག་རྣམས་དབུལ་མི་ནུས། །སེར་སྣ་ཅན་ནི་བཟློག་པར་དཀའ། །དེ་ལྟར་སེར་སྣ་ཅན་དེ་ལ། །དབང བསྐུར་མི་བྱ་གཞན་པོ་བྱ།།ཆོ་གའི་རིམ་པ་བསྟན་པ་ནི། །རྒྱས་པར་བྱེད་ན་བསྐྱེད་རིམ་རྫོགས་པར་བྱ། །ཡང་ན་བསྡུས་དང་ཤིན་ཏུ་བསྡུས། །དེ་ལྟར་བྱས་འོག་ནད་པས་ནི། །ཁྲུས་ཀྱི་རིམ་པ་རྫོགས་བྱས་ལ། །གོས་བཟང་བྱིན་བརླབས་བསྐོན་ནས་ནི། ། ཤར་གྱི་ཕྱོགས་སུ་ཁ་བལྟས་ནས། །མདུན་དུ་མཎྜལ་ལྔ་བྱས་ཏེ། །དང་པོ་ཕྱག་འཚལ་མཆོད་པ་འབུལ། །དེ་ནས་སྡིག་བཤགས་ལ་སོགས་བྱ། །ནད་པ་དེ་ནི་མི་ནུས་ན། །མཆོད་གཡོག་དག་གིས་བྱེད་དུ་གཞུག་།དེ་ནས་སྐྱབས་གསོལ་ཚིགས་བཅད་བརྗོད། །བཅོམ ལྡན་རྡོ་རྗེ་གོས་སྔོན་ཅན།།སྐུ་མཆོག་སྟོབས་ལྡན་ཁྱོད་ཕྱག་འཚལ། །གསུང་མཆོག་སྒྲ་མཆོག་འབར་ལ་ཕྱག་འཚལ་ལོ། །ཐུགས་མཆོག་ཡེ་ཤེས་ལྡན་ལ་ཕྱག་འཚལ་ལོ། །སྐུ་མཆོག་སྟོབས་ཆེན་ཁྱོད་ལ་ཕྱག་འཚལ་ལོ། །དེ་ནས་ལུས་འབུལ་ཞེས་ནི་སྦྱར། །བདག་ལ་གནོད་པའི་ ནད་རྣམས་ཀུན།།ཁྱོད་ཀྱི་མཐུ་ཡིས་སྦྱང་དུ་གསོལ། །འབྱུང་པོའི་གནོད་པ་བཟློག་ཏུ་གསོལ། །ཟོར་དང་དུག་རྣམས་ཐམས་ཅད་ཀྱང་། །མཐུ་སྟོབས་བདག་པོས་བཟློག་ཏུ་གསོལ། །བཅོམ་ལྡན་ཁྲོ་ཆེན་རྣམ་པར་རྒྱལ། །སྐུ་གསུང་ཐུགས་ལྡན་ཁྱོད་ལ་ཕྱག་འཚལ་ལོ། །དཔལ་ ལྡན་མགོན་པོ་ནག་པོ་ཆེ།།ལུས་ངན་རྒྱལ་པོ་མཐུ་བོ་ཆེ། །ཁྲོ་བོ་ཆེན་པོ་བདུད་རྩི་འཁྱིལ། །རྡོ་རྗེ་གནོད་སྦྱིན་འཇིགས་ཆེན་པོ། །རོ་ལངས་མ་ནི་མཐུ་མོ་ཆེ། །རྡོ་རྗེ་མཁའ་འགྲོ་དཔལ་འབར་མ། །འཇིགས་བྱེད་མ་ནི་མཐུ་མོ་ཆེ། །རྡོ་རྗེ་ལྷ་མོ་འོད་སྐྱེད་མ། །རྡོ་རྗེ་ལྷ་མོ་ཡིད་འཕྲོག་ མ།།རྡོ་རྗེ་ལྷ་མོ་ཀུན་བཟང་མ། །རྡོ་རྗེ་ལྷ་མོ་ཀླུ་སྒྲ་ཅན། །ཁྲོ་མོ་ཆེན་མོ་སྲོག་གཅོད་མ། །ཁྲོ་མོ་ཆེན་མོ་དབུགས་རྔུབ་མ། །ཁྲོ་མོ་ཆེན་མོ་ཁྲག་འཐུང་མ། །ཁྲོ་མོ་ཆེན་མོ་ཤ་ཟ་མ། །སྐུ་གསུང་ཐུགས་ཞེས་བྱ་བ་ལ་སོགས་པར་སྦྱར་བར་བྱའོ། །དེ་ནས་སྡོམ་པ་འཛིན་དུ་གཞུག་། དེ་བཟླས་པས་ནི་བཟློག་པར་བྱའོ། །དང་པོ་སྐུ་ཡི་བཟླས་པའི་འོད་ཟེར་གྱིས། །ལུས་ཀྱི་ནད་རྣམས་སྦྱང་བར་བྱའོ། །དེ་ནས་ཐུགས་དང་གསུང་གིས་སྤྱད། །ཐལ་ཆེན་རཀྟ་བྱང་ཆུབ་སེམས། །སྦྱང་སོགས་བྱིན་བརླབས་བྱས་ནས་ནི། །གནས་གསུམ་དག་ཏུ་མཚན་ཅིང་བྱུག་། དེ་ནས་ཁྲུས་ཀྱི་བུམ་པ་ཡིས། །བཀྲ་ཤིས་ཚིགས་བཅད་བཏོན་ནས་ནི། །ནད་རྣམས་སྡིག་སྒྲིབ་བཀྲུ་བར་བྱ། །དེ་ནས་སྐུ་གསུང་ཐུགས་ཀྱི་སྔགས། །བཟླས་པས་བདེ་གཤེགས་འོད་ཟེར་བསྟིམ། །དེ་ནས་ནད་པའི་སྟེང་ཕྱོགས་སུ། །བདེ་གཤེགས་དཀྱིལ་འཁོར་བཞུགས བསམས་ལ།།འོད་ཟེར་འཕྲོ་འདུའི་སྦྱོར་བ་ཡིས། །ཡེ་ཤེས་བདུད་རྩི་སྙིང་གར་གཟུང་། །དེ་རྣམས་བྱས་པས་འཆི་བ་བཟློག་།འཆི་བཟློག་ཆེན་པོ་བྱ་བ་ནི། །སྦྱིན་སྲེག་ཚོགས་འཁོར་དབང་བསྐུར་བྱ། །གཏོར་ཆེན་ལ་སོགས་གཞན་ཡང་བྱའོ། །དེ་ལྟར་བྱས་པས་འཆི་བ་བཟློག་། རང་དང་གཞན་ནི་གཉིས་ཀ་ལ། །མན་ངག་སྟོབས་ཀྱིས་བཟློག་པ་ན། །རླུང་དང་ཐིག་ལེ་ཡི་གེ་དང་། །གཏུམ་མོ་འཁོར་ལོ་ལ་སོགས་ནི། །འཆི་བསླུ་ཆོ་ག་དག་དང་ནི། །བླ་མའི་མན་ངག་བརྒྱུད་པས་བྱའོ། །འཆི་བ་བསླུ་བའི་སྦྱོར་ཀ་སྟེ་སུམ་ཅུ་གསུམ་པའོ།། །།བཅོམ་ལྡན འདས་རྡོ་རྗེ་འཛིན་པ་ལ་ཕྱག་འཚལ་ལོ།།སྟང་སྟབས་རིམ་པ་ཅུང་ཞིག་བསྟན། །ཤར་ཕྱོགས་གཡས་བརྐྱང་ལ་གནས་ནས། །རྐང་པ་དང་ནི་ལག་པ་ཡིས། །རྡོ་རྗེ་རྩེ་གསུམ་སྟང་སྟབས་བྱ། །གར་བསྒྱུར་དེ་ནི་ཐབས་རེ་བྱ། །རྐང་ལག་མཐུན་པར་བསྒྱུར་བ་བཟློག་།ལྷོ་རུ་གཡོན་ བརྐྱང་ལ་གནས་ནས།།རལ་གྲིའམ་དབྱུག་ཏོ་འཛིན་པས་སུ། །རྐང་པ་ལག་པ་གཉིས་ཀས་སུ། །ས་དང་བར་སྣང་གཉིས་ཀ་ལ། །རིན་ཆེན་འབར་མ་བྲེ་བར་བྱ། །ནུབ་ཕྱོགས་གཡས་བརྐྱང་ལ་གནས་ནས། །འཁོར་ལོའམ་རལ་གྲི་དེ་བཞིན་བྲེ། །བྱང་ཕྱོགས་གཡོན་བརྐྱང་ལ་ གནས་ནས།།རྡོ་རྗེ་རྒྱ་གྲམ་ཚུལ་དུ་བྲེ། །ཡང་ན་ཟླུམ་པོ་ལ་སོགས་རིམ། །བསྲུང་བའི་ཚུལ་དུ་བྱ་བ་དང་། །ཕྱོགས་བཞིར་འབྱུང་པོ་བཀུག་ནས་ནི། །མནན་ཅིང་བསྣུན་པའི་ཚུལ་དུ་བྱ། །གཞན་ཡང་སྟང་སྟབས་རྒྱས་པ་ནི། །སྙོམས་འཇུག་ལ་སོགས་རྒྱུད་ན་གསལ། །མཁས་པས་དེ་རུ་ ཤེས་པར་བྱ།།འདིར་ནི་བསྒྲུབ་པའི་དོན་དུ་བསྡུས། །སྟང་སྟབས་སྦྱོར་བ་འདི་དག་ནི། །བགེགས་བསྐྲད་དོན་དུ་ནན་ཏན་བྱའོ། །སྟང་སྟབས་ཀྱི་སྦྱོར་ཀ་སྟེ་སུམ་ཅུ་བཞི་པའོ།། །།སྟོན་པ་ཕྱག་ན་རྡོ་རྗེ་ནས། །མཁའ་འགྲོ་མ་ནི་ཡན་ཆད་དུ། །བརྒྱུད་པའི་རིམ་པའི་མན་ངག་འདི། ། སྙིང་པོ་ལ་སོགས་སྒྲུབ་པའོ། །གསང་བའི་སློབ་མ། རིན་ཆེན་བཀྲ། །དེ་རྩར་ཧཱུཾ་གི་རྣལ་འབྱོར་དང་། །བརྟུལ་ཆེན་པོ་ནི་རྣལ་འབྱོར་ལ། །ལོ་གསུམ་བར་དུ་སྣོད་བརྟགས་ནས། །བདེ་ལྡན་རིན་ཆེན་ཡང་གཏེར་དུ། །བཙའ་དཀའ་དམ་བཞག་བྱས་ནས་གཏད། ། རིན་ཆེན་རྫས་དང་སྲོག་ལུས་ཀྱིས། །བླ་མ་མཉེས་པས་མན་ངག་ཐོབ། །དེ་བཞིན་ཕྱི་རབས་རྣལ་འབྱོར་གྱིས། །དེ་བཞིན་དུ་ཤེས་པར་བྱའོ། །ཕྱི་རབས་བློ་དམན་ལ་སོགས་ཤིང་། །སེར་སྣ་ལ་སོགས་གཡོ་སྒྱུ་ཅན། །སྒོམ་སྒྲུབ་ལ་སོགས་མི་ནུས་ལ། །མན་ངག་བསྟན་ན་དམ ཚིག་ཉམས།།དེ་བས་ཕྱི་རབས་རྣལ་འབྱོར་པས། །སྣོད་ལྡན་བརྟགས་ལ་སྦྱིན་པར་བྱ། །ཐབས་དང་ཤེས་རབ་ལས་བྱུང་བའི། །རིན་ཆེན་ཕྲེང་བ་སྦྱོར་ཀ་འདི། །བདག་གིས་སྣོད་ལྡན་དོན་བརྩམས་པས། །འདི་བརྩམས་པ་ཡི་དགེ་བ་ཡིས། །བདག་དང་སེམས་ཅན་ཐམས་ ་ཅད་ཀྱང་།